Юнус 1
1
Чи Худованди рит Юнуси пирайжак
1Худованди калом, Амитай жута Юнуси ғушиса авесу аво: 2"Ҷаху катта Нинве шаҳри шаву ӣ хипарик тав туфарумишт, вар фарёд куну халқи расун, чобахшак шим арктшинт то Ман ритиса растах". 3Лекин Юнус аҷах, то чи Худованди рит Таршиши шаҳриса пирайжот. Ах Ёфу шаҳри авес ӣ киштӣ авир, Таршишиса тирна хой. Юнус роти нахна атуфару кишти вора авӣ, ке Таршиши шаҳриса раҳакӣ авӣ, то чи Худованди рит пирайжот.
4Лекин Худованд ав баҳри сахт шамол аҷахун, ке авока сахт туфун авӣ. Киштӣ ит туфуни қариб тикка-тикка авӣ. 5Баҳрнавардт ҳама ачукайрор. Ҳар иш хап худойсашинт доду фарёд акуношту ҳар чизик киштӣ ой, баҳриса афируношт, то киштӣ субук воот. Ит вахт Юнус, киштӣ чи ҳамай таки катиш авес, ван ахаш анипиду сахт хумниш авар.
6Киштӣ сардор авипи наздик авию аво: "Ниҳит вахти ту чути нипидишт? Ҷах! Хапи Худоит фарёд кун! Шотим Ах мох ба ёд уроту мох нобит навиим".
7Баҳрнавардт ҳамдигариса авор: "Воwт қуръа партофим, фаҳмим кани кай бахша иш офат мох сари авес". Баъдик қуръа апартофор, ах Юнуси нуми аниж. 8Ке чи Юнуси апурсор: "Мохса во, чо бахша иш офат мох сари ухтах? Ту чо арк куништ? Чи ку воwишт? Чи кум сарзаминишт? Миллат чох?"
9Юнус автитиса аво: "Ман ибриим, чи Худованди осмуни Худо баҳру хушкиш ҳаст икта, чукайрумишт". 10Иш гап адуғушору одамт беҳад ачукайрору ависа авор: "Охир ту чо акунӣ?" Чобахшак чи хапи гаптиш дуғушташинт ойк ах чи Худованди пирайжчӣ.
11Ачаҳат туфуни ғулӣ сахт виякой, чи Юнуси апурсор: "Тавпи чо куним, иш баҳр уштот?"
12"Ман ност, баҳриса фирунт, ке ах баҳр уштчӣ. Чобахшак ман ғирифумишт, иш сахт туфун ман бахша шумох сари ухтах", — аво Юнус.
13Баҳрнавардт зур адеҳошт даррав бел деҳонту лаписа гардонт, лекин наатуношт, чобахшак туфун сахт авиишт. 14Ав вахти ахтит Худовандиса фарёд акунору аво: "Эй Худованд, хоҳиш кунумишт ит одами бахша ҳамаймох натухой, ити вахини гуноҳ мох камай намун. Чобахшак ту эй Худованд, чок ахоҳӣ, наҳах куништ".
15Ке Юнуси асухоёру баҳриса афирун, наҳав лаҳтай баҳр авушт . 16Ҳама чи Худованди сахт чукайрта иёр, ахтит қурбунӣ акунору ваъда атуфарор.
Currently Selected:
Юнус 1: yai
Highlight
Copy
Compare
Share
Want to have your highlights saved across all your devices? Sign up or sign in
© 2022, Оби Ҳаёт
