Roomi 7

Seera kela nataan sookeeta

1Hellaanno a kiristaanatiiyyi, hela sede a' uptane? Ha anti orrase seera upo'en haasawanni; ha seera oto nama co pattaayye nama qara hupna ukkumeeta' qapnaanni. 2Pahana'e, iskatteeta hemamte, haka diirtaadi co kara'e, seeranne diirtaadi quda' hidamte; oto diirtaadi to'o xoori, hidasene a seera' kelaayye ifuramte. 3Semmalla, oton a diirtaadi cooyye diirta pila opa, hemamtaayye, dahalmayteeta kidammi. Oton xoori diirtaadi to'aayye, seerase a ishin diirtaadi quda' hidamte kelaayye ifurammi. Kadi punu oori diirta pila opa hemamtaayye, idahalsatte in kidamto. 4Hellaanno a kiristaanatiiyyi, xaayshin kuli asseew pahata. Ishina' qoota dakinta Kiristoosi quda meella kodditen malla, a tootan sekaatta' mina kitto'e' seera kapa sekaatten. Semmalla akkan koda a Waaqati dalta dallo'e Kiristoosise tootoppa xa'e quda kodditen. 5Eta an heenna a so'atin kallaanninnaatiiyyi akkan toota dalta dallo'e, xajeeltase neeqa seeran xaxxaano meellaanno a dakinta' kara koda kooni. 6Amma xoori, seerase ino hide kapaayye qootan a tootan sekaatta' mina' kitto' sekaanne malla, hida a seera' kela nataan sookne; arepa desa saanta haaraya a hapuratinnin koda kooninna diisheey, saantase kerite a seera' taafamten an kooni an kinno.

Seera isho' juppoota

7Semmalla oori maanan kiina? Hela xawwi seera, juppoota? Inna! Juppoota maana akkima koddite akkan upnaado'e, a kode seera; katin seera in kiinini, “In xajeelaneeyye,” Xajeeleta maana akkima koddite upnaanni an heenne#sooka 20:17; ooreta 5:21. 8Juppoota ka ajajase seera quda de'en saanta teyte ka akka xajeelta piisa ana kara' xa'o' koote. Oton seera in kinniniiyyi, juppoota wa to'e'ey. 9Xatta, a seera in kinniniiyyi, anti caattannen kallaanni; ete ajaja seera' de'eyye xoori anti in to'e juppoota ka caatta akkatte. 10Ajajase a seera caatta' daasame ka ana qara' toota qeede. 11Juppoota ka ajajase a seera qudan saanta akkatte ka ana sassapatte ka ajaja minan ana ikasse#uuma 3:13 .

12Semmalla, seera qulqullitta, ajaja nefoow qulqullitta ka dukaata ka paxaari. 13Ka kuli wossen paxaara'e, ana qara' toota qeede kideeta? Inna! juppoota akka juppoota koddeetaadi, akkaatto'e wossen paxaara' minan ana qara' toota qeette. Semmalla juppoota ajaja minanne a qaran qapto juppoolayteeta koddite.

Soota a caatta nama' kara ca

14Seera akkiman seera hapura in upna. Anti' xoori an a so'a#7:14 an aso'a kideeta juppootase a xattaminen immakaade kideeta a karpishsha juppoota' koddeeta' katame. 15Anti waan koona an upo; waan jaalanna kodaan' diini ka wa sene an needda' kooni. #Kelaati 5:17 16Semmalla oton anti wa an heennini' koonooyye, seera akkima paxaarin maakkummi. 17Sede wa an anti an heennini koonitto, juppootase ana kara kitto diisheey, anan. 18Ana karaayye taakki qalpeetiyyo a so'a karaayye, wa paxaara takkan' nefo akkima in kinnin in upa. Kadin punu wa paxaara' koda heenaayye, wa paxaara' kodeeta' hupna an qapo. 19Waasene paxaara an koda heena an kooni an co ma, waasene neeqa an an heennini'in kooni. 20Oton waasene neeqa an koda an heennini koonooyye, a sede koonitto juppootase ana kara kitto diisheey, anan kideeta.

21Semmalla, a seera koda qara nakayen akkinni; an wa paxaara koda heenooyyen, wa a neeqa kodeeta kittessammi. 22Isi karan xata seera Waaqatin in xasoonni, 23a koddito ma uumatiyyoppaayye qinda an opa ellino a seera mattiyyo toorro ka meella dakintiyyo kara koono seera a juppoota kela' korpaame ana koonitto akka meella dakintiyyo' kara kitton akkini. 24Ata anti an nyorpeelayta atta paho! Dakintose are toonitto kela ayno anan paha? 25Waaqase Poqalla Yesuusi Kiristoosi qudan anan pahano, kalata a isha kayo!

Semmalla anti mattiyyo kara seera Waaqati'i in piddame ka qalpeetiyyo a so'atinni a seera juppootati piddame kodde.

Currently Selected:

Roomi 7: MaQu

Highlight

Copy

Compare