Roomi 5

Nakayta isho araarama a amanteetan teyanno

1Semmalla ino' qootan amanteetan hanqeellaawne malla, Poqallaanno Yesuusi Kiristoosinni Waaqa olli nakaytan qapna. 2Daassatase a Waaqa an amma amanteetan kokkonnaanne ka oppa kinno karopa qootan ishan kulline malla ka kippeetan a ulfeena Waaqa oppa qoottanna' koddine malla, in jeejjanninna. 3Sede pattanne ma rakkoota kela akkan duupatta teyno qootan upno malla, rakkootinno kulin jeejjanninna. 4Duupatta kelaayyeew ekkaysumaappa kokkonnaatta deeni, ekkaysumaappa kokkonnaatta kelaayyeew kippeeta deeni. 5Hapurase a Qulqulloota ino' daasame qudanne, jaalala Waaqa qoota kartinno kara immakaaden malla, kippeetose orra jeerinni in kitto.

6An nukkullaya koddineeyye ete xoorasene a Waaqa qapade' kayteeyye, Kiristoosi juppoolaya malla to'e. 7Nama paakka hanqeellayta oppa' to'o, teyeeta akata kokkoki. A koddito ma nama pakka a nama paxaara' oppa' toota' maxanyummo takka punu iteyada. #5:7 piita yihutaati “hanqeellayta” seera patta tooytini ma, orra olli takkumtan qapo; “nama fayya” xoori, orra'e koda fayya kooni ka orra suraysanni. 8Ma xoori, ino an juppoolaya koddineeyye, Kiristoosi paakkinnoppa' to'e. Sede nefo jaalala Waaqa ino' qapa a atta kitto akkima kutti la'anni. 9Semmalla oton diika Yesuusi Kiristoosin hanqeellaawneeyye, a qaran qapto'e, ishanneewwen aara Waaqa' kela pahana. 10Ino an paarakaala Waaqa' koddineeyye toota innaaditinnin Waaqa olli araaramme. Amma eten Waaqa olli araaramme kammaayye, caatta innaadi minannen a qaran qapto' dinnaaw. 11Umma sede pattannema, Poqallaanno Yesuusi Kiristoosi, isase an qudan Waaqa olli araaramme, qudannen Waaqa jeejjanninna.

Attaami qudan toota ka Kiristoosi qudan caatta akka de'e

12Nama takka minanne juppoota piita qaropa kalte, juppoota minan toota ka deete. Qoota nama piisa juppoota kode malla, toota ka nama piisa qara' deete#uuma 3:6. 13A seera Muuse in daasammin turanneew juppoota piita qaraayye kitta. A kodditoma pora oppa seera in kinnin oppa juppoota akka juppoota' mina' dikammi in kitto. 14Ma xoori, orra a Attaami mina' seera tooytaatta diissata minan juppoota in koonin kuli qara'e Attaami paayyatte haka Muuse'e, toota ka orra piisa qara' hupna ukkumeeta akkatte.

Attaamise, Kiristoosise itturopa de'o'e, pahana kodde. 15Ma xoori daassata Waaqa a pattayya akka juppoota nama' mina'en. Juppoota nama takka minan akka orra lekayta le'e mina'e, asseew daassata Waaqa isho Yesuusi Kiristoosi namase takka minanne daassatase a Waaqa' teyatte, ikoopte ka orra lekayta' daasamte. 16Akkamoose' mina'ew, tookta a daassatase a Waaqa a pattayya kela deete, wa a juppoota a nama takka' qeette minan. Firteeta a juppoota a nama takka minan daasamte qitaateta qeette. Daassase a Waaqa a pattayya a juppoota orra lekayta minan daasamte xoori, hanqeelluma qeette. 17Juppoota nama takka' minanne ete toota orra piisa qara' hupna ukkumeeta akkatteeyye, orra daassatase a Waaqa' koopte a pattayya teyyade ka hanqeellaawe piisa, Yesuusi Kiristoosi namase takka minanne putaymaan caattaan kallaada.

18Semmalla, juppoota Attaami a nama takka, akka orra piisa qara' firteeta qitaateta' qeette mina'e, koda a hanqeelluma a Kiristoosi a nama takka, asseew qitaateta kela orra lekaytan paha ka caatta daasha. 19Ajajama diissatta a Attaami a nama takka' minanne akka orra lekayta juppoolaya kodde mina'e, ajajama Kiristoosi a nama takka' minanne, asseew lekaya hanqeellaawa. 20Akka juppoota koopto'e seera de'e. A juppoota koopte kapa'ew, daassata Waaqa ka a qaran qapto' koopte. 21Sede nefo wa malla asse koddite, toota minan juppoota akka hupna ukkumeeta akkatte mina'e, Poqallaanno Yesuusi Kiristoosi minanne akka caatta parapara kinnaado'e, daassata Waaqa hanqeelluma hupna ukkumeeta akkatto malla.

Currently Selected:

Roomi 5: MaQu

Highlight

Copy

Compare