Roomi 11

Waaqa akka Isira'eeleta alle'en kannin

1Intoonno ana kaassadoowweey, hela kuli Waaqa isamaytaadi alle' kate? Inna'i, pakkanna alle in kanne. Anti mattiyyo an Isira'eelitta ka sanynyeeta Aprihaami oppaayye, an kafa Piniyaami#Fili 3:5. 2Waaqa, samayta a turanneew reexade alle in kanne. Mataafa qulqulloota qoota Eeliyaasi desa wa a kide matte a oorsanni a' kittane? Eeliyaasi'iw fuula Waaqa' tura'e, maana akkima kide ka samayta Isira'eeli' xasase a uptane? 3Sitiiyyi Eeliyaasi ikide, “Poqallaay, xuumampayaatti ileyshen ka poqaddaatti a kalisoota alle' pooten; anti' patta ka hase, ikka ana kuli ikassa faani#nuqu a 1ta 19:10, 14 .” 4Ma xoori, Waaqa atta kide ka ishi' oorshe? I'ishi' kide, “Anti orra killootase pa'ali kidammitto in sakatannin, nama kuma tappan hattisade#nuqu a 1ta 19:18.” 5Sapanoose a amma' nefo oppaayye, Isira'eeleta a daassata Waaqatin reexamte shakkayteeta ca. 6Reexosen oton daassata Waaqatinni koddeneeyye, kodaan in koddine kideeta. Kadin kodaanne koddini kiiteeyye, daassata Waaqa paata patta koddini heente.

7Ka kuli maana kamma de'e? Isira'eeleta, wa faate in akkanne. A reexxame xoori wa fadene i'akkaden, a ata hase' xoori karittaaysho'e dundunshen. 8Sede nefo akkimase a taafamte ka kiinitto, “Waaqa karittaaysho'e lulshe. Semalla haka awweti'i ildaassotin akkini in caan, umma nappaassotin dakayni in caan#ooreta 29:4; Issa 29:10 .” 9Taawwiti ikideewwe,

“Dantaaysho a turuura paata qapno,

ka a qaawa orra kanno koddito;

ka ishootta payyahisso;

neequmta a koden a ishootta qare'ew kayto#mas 69:22-23.

10Ildaasso akka paata in akkinini'i a lulen.

Surraaysho awta piisa a rakkootan xonnoono.”

11Intoonno ana oppa' ooro ka kaassadoowweey, hela Yihutaata ete pi'iteeyye, a lammatta in xaanini koddite? Inna'i! Ishin dapayta Yihutaata minanne, orra a Yihutaata in koddinini dina akkade. Sede nefo, akka Yihutaata a Yihutaata in koddinin a yoonitto koddito' koda malla. 12Ishin dapayta Yihutaata saka kuttayta kaskeella' qeede; pi'ittaaysho ka a Yihutaata in koddininiiti saka kodde; katin Yihutaata dinniiyyiiw, sakase oo atta koopni heene!

Orra Yihutaaata in koddinin akka dine

13Amma tooy, ishina a Yihutaata in koddininiti'in; haasawanni. Qootan erkamampayta a Yihutaata in koddinini kodde malla, kodiyyonne ulfeena ana' dakaanni. 14Waan malla sede kide' nefo, akkan samaytase' xayyo an oppa dalade yoota' nyarsho ka seden takka punu ishootta oppaayye orra demo dinissa ettansho malla. 15Ete Waaqa ishootta kateeyye, oto samayta piita a ata hase Waaqa olli araarameeyye; oto Waaqa ishootta teyyadooyyeew desa maana kodda ishina' pahata? Sede akkima tootoppa xaanaan mina.

16Pukeessa takkan oppaayye, ete a paayyota qulqullaaweneeyye, piisa qulqullaawe; akkimoose' mina'ew; oton hittina qoyra takka'e qulqullaawaayye, taammaadi kuli qulqullaawni. 17Yihutaatase taamma qoyra ekerta a eennaappa' koddite, kati muramta ka pi'itaayye; ishina a taamma qoyra ekerta a kappina' kodde orra a Yihutaata in koddininitiiyyi, ishina ka poraaysho oppa' kodditan ka teyantaaysho isho sakaaysho qoottattaneey; 18ishina a Yihutaata in koddinini, Yihutaatase a taama' mina' muramte ka piite qara issi an peepan. Oton issi peepnittaneeyye xoori, ishina' qoota taamma patta kodditen malla, akka hittinna ishin haanaan, ishina ka hittinna a' haani a' kinnin matte oorsada.

19Ma xoori takka punu ikkiitane, “Wa malla taammoosen qeqqepene ka seehene, akkan ino pakkaaysho oppa' koddino malla.” 20Asse kideetaayshin dukaata ma, ishootta a in amannin malla alle quuramen ka dakkamen. Ishina'ew qoota amanten malla' kokkonnaatten ka qa'atten. Semmalla fuureeta diisheey issi peepeta ishin parpaaccisni in co. 21Waaqa ete Yihutaatase uumataaysho oppa taamma koddite in suraysanniniiyyi, ishin' nefo in suraysado. 22Semmalla xoona Waaqa isho fuurissaadi tooya. Waaqa isasene' pi'e' qara'e fuurissaadi akkinni ka xoonaadi ishina akkinni. Sede nefo oto' ishina isha amaneetan kokkonnaannittan ka kallaannittaneeyye asse koda; oton a kokkonnaanni a kinnin xoori, ishina' kuli alle'e' muramtan ka pi'itan. 23Yihutaata kadi, sede a amanni in kinnin kamma oorrittaayye, poraadi a xatta qaropa oorta; Waaqa ka poraaysho a xatta' qaropa ishootta oorissa ettansha. 24Ishina, orra Yihutaata in koddininiti xoori, ishina a uumateeyye taamma qoyra ekerta kappina' koddeetiiyyi; ete poraayshin malliiyyi ekerta eennaappa' qara dishama ettanisseneeyye, Yihutaatose uumataaysho oppaayye taamma ekerta eennaappa' koddite atta poraaysho a xatta qaropa tiitaawa ka dishama in ettaninnin!

Diissata Waaqa akka nama piisa' parpaaccisnitto

25Hellaanno a kiristaanatiiyyi, an upnampaya in kidan ka in jeejjaadan; juuttota an ishina' lelo takka ca. Sede nefo Isira'eeleta amana tiittetaadi, haka a Yihutaata in koddinini piisa immakkootan Waaqopa deenaan kara'e koddita diisheey, amana tiitteta kammaaw in caatto. 26-27Semmalla akka taafamte ka kiinitto

“Dinshampayta Siyyooniiyyi de'a

ka sanynyeeta Yaayqoopi piisa karaayye, neequmta alle' pashsha#Issa 59:20; Er 31:33-34;

oton juppootaysho alle pashshooyye,

kodayteeta an ishootta olli kodado sede.” Mina'e Isira'eeleta piisa dina.

28Isira'eeleta qoota otootase a fayya in teyyannin malla, ishin a Yihutaata in koddini minanne paarakaala Waaqa' koddite. Ma xoori qinda reexaatinni aappada a kaffa' minanne, ishootta orra a Waaqa ishootta jaalade. 29Waaqa ete reexade ka daassataadi daashe kammaayye, koda a kode oppaayye dikattaadi purinni in co. 30Ishina a Yihutaata in koddininitiiyyi, ishina' turanne a orra a Waaqa ajajammon, amma xoori Yihutaata qoota in ajajammin malla, diissata Waaqa'e akkatten. 31Akkima ishina diissata akkatten mina'e, akka ishootta asseew diissata akkadane'e amma ishootta a Waaqa' ajajammi in kinnini'i kodden; 32Waaqa akka diissataadi nama piisa akkisho malla orra piisa akka in ajajammini' kode.

Kalata a Waaqa' dehaade

33Teyanta ka ookuma isho upna Waaqa oo atta kara seki! Firteetaadi kara qorammi in kitto; umma saantaadi upnaatammi in kitto#Issa 55:8!

34“Ayno dikatta poqalla' upa,

taakki ayno dehaamampaytaadi kodda?#Issa 40:13 ”

35“Ayno Waaqa' leqeessa;

ka wa ishi' leqeesse teyyada#Iyyo 41:11 ?” 36We' piisa isha qudaaw teyaden ka ishanneew kodden ka isha'ew kodden, haka paraparati a ulfeena isha kayo, Ameen#Qoro 1ta 8:6 !

Currently Selected:

Roomi 11: MaQu

Highlight

Copy

Compare