Mataafa orra Lewi 1
1
Kalisoota a kupannitto
1Yaahiwwe Muuse hale; ka tukkanaadi kelaxata ishi haasawade ka kide, 2“Hellaa Isira'eeliti haasawado ka kide,
‘Ishin oppaayye, nama oton Yaahiwwe'e kalisootan deeniiyyi, xelloota okkaya ka a kahirra isho a tela oppaayye ishin de'o.’ 3Oton xellootaadi a okkaya oppaayye kalisoota kupannitto Yaahiwwe dehanniiyyi, akka Yaahiwwe isha qara teyyado'e, a xorma toobuma in qapnin qeedo ka xarra tukkanase a Yaahiwwe turopa dehaysho. 4Ka matta horeese kalisoota kupannitto dehaannitto qara'e a harka qapado; isheetta nefo akka juppootaadi ishi hasso'e pakkaadippa teyyatamta. 5Ka fuula Yaahiwwe tura'e haaritta xorma qalo; hella Arooni qeesewwasene ka diikaadi qeeden ka porase a kalisoota xarra tukkana Yaahiwwe tura co quda'e qindadda pisan fiden. 6namoose dehanno ka horeetase kalisoota kupannitto qudaayye a koka qalo ka meelo. 7Hellaasene a diira a qeesittase a Arooni a porase a kalisoota qara apitta opayshen ka qara qora qunen. 8Ka apittase isho qorasene pora kalisoota qara ca qara'e, meella isho matta ka moora xaxxaayen. 9Namase dehanno a hoppatta isho loqqa horeeseti pishaan jaqo; qeesitta ka meellaadi piisa porase a kalisoota qara kupo; isheetta kalisoota a Yaahiwwe alaawnitto ka isha xasannitto a apittan dehaannitto koddita.
10Oton xelloota kahirra isho a tela oppaayye kalisoota kupannitto dehanniiyyiiw, a laha taaki qolpayta a toobuma in qapnin dehayshoow. 11Ka porase a kalisootati qinda qutattatinni fuula Yaahiwwe tura qalo; hellaasene a diira a Arooni qeesewwasene ka diikaadi qeeden ka pora kalisoota quda fiden. 12Namase dehanno ka meelo; qeesitta ka meellasene isho matta ka moora qorasene pora kalisoota qara opayna qara xaxxaayo. 13Namase dehaanno a hoppatta isho loqqa horeeseti pishaan jaqo; qeesitta ka meellaadi piisa porase a kalisoota qara kupo; kalisoose nefo kalisoota a Yaahiwwe alaawnitto ka isha xasannitto a apittan dehaannitto koddita.
14Oton Yaahiwwe'e xampiraappaayye kalisoota a kupannitto dehanniiyyiiw, a napaala taaki jiwjwa eleela dehaysho. 15Qeesitta ka pora kalisoota qaropan dehaado ka xolma qara quu'o ka qara mitto ka mattaadi pora kalisoota qara kupo; diikaadi ka pora kalisoota quda seeho. 16Ka hoppattaadi isho paallaadi qeedo ka pora kalisootati qinda piirtotatin porase oppa tara tuqnaan karopa alle kato. 17Ka tupa xoolla qapo ka lakki kaa'o; ma olkela in mittinin; ka porase a kalisoota qaraayye qorasene apitta qara ca qara kupo; sede nefo kalisoota a Yaahiwwe alaawnitto ka isha xasannitto a apittan dehaannitto koddita.
Currently Selected:
Mataafa orra Lewi 1: MaQu
Highlight
Copy
Compare
Share
Want to have your highlights saved across all your devices? Sign up or sign in
