Mataafa Sooketa 11
11
A kundatta: erkannaata a qaramma Kipsi lesse
1Yaahiwwe ka Muuse kide, “Amma, erkannaata pila takkan Feri'ooni isho Kipsi qara qeedaaw. Sekkammaayye oori Feri'ooni ka akka antane alle ishin diisha; oto ishin diinnooye, ishin piisa alle daana. 2Samayta Isira'eeliti lele ka kide, “Diira ka iskattanne nama kantittaadi qaraayye a sira dakara pirreeta isho a warqeeta kaassado.” 3Yaahiwwe ka akka Isira'eeleta Kipseeta tura jaalatamto kode. Muuse ka piita Kipsi piisa karaayye fuula saarra Feri'ooni isho a samayta piisa tura'e nama ulfeessame kodde.
4Muuse ka kide, “Yaahiwwe ikiini, ‘Oto olliqqootta a halkeetta kaytooyye, piita Kipsi oppannen tarpa. 5Inna qaarta a Feri'oonise suafaaneta qara kuti'e paayyatteeyye haka inna qaarta a orxayteeta orra kela yooqa yooqnittooti'i, hellaa a diira a qaramma kodde piisa alle piita Kipsi kara pirama; horeetoppaayye wa xorma kodde ka paayyota delade piisa ka le'an. 6Piita Kipsi piisa karaayye, ullupitta kutta a turan apari in dakaannin ka itturopa kuli in dakaannin ka xa'a. 7Qinda Isira'eeleta isho a horeetaayshoti desa xoori, kuta nefo ishoottoppaayye qoji in kido; sede nefo Yaahiwwe akka Kipseeta isho Isira'eeleta arta kara reexa kode akka upnaattan malla.’” 8Muuse ka kideewwe, “Saarrosen xaayti piisa ka ana kapopa de'an ka ana kaareta oorshan; ka kidane, ‘Ke isho samaytaayti a ke quda co piisa atara alle ino qara aana; antikka oori sitiiyyi aana.” Sekkammaayye Muuse ka miira kuttan Feri'ooni tura sooke.
9Yaahiwwe ka Muuse kide, “Qoota kodaddaayyo a orra qawwanna piita Kipsi kara kuttumtan akkaatta parpaaccisnaan malla, Feri'ooni ishina'en dakayo.” 10Muuse isho Arooni ka Feri'ooni tura kodaddoosen orra qawwanna piisa koden; ma xoori Yaahiwwe karitta Feri'ooni kokkonnayshe; ikka akka Isira'eeleta piitaadi kara in sooknini dawrade.
Currently Selected:
Mataafa Sooketa 11: MaQu
Highlight
Copy
Compare
Share
Want to have your highlights saved across all your devices? Sign up or sign in
