Kodampaya 21

Pawloosi akka katama Yursaalami opa aane

1Eten ishootta kapa xaane kammaayye, markapa oppa'en fayyanne ka piita takka otanta pakateeta kara kitto Qoosi kidammitto opa anne ka parraytaadiiyyi piita takka otanta pakateeta kara kitto Ruudi kidammitto kayne ka sekkammaayye katama Baatira opa anneew. 2Ka eyye desa markapa a piita Finqe opa anno akkanne ka oppa' fayyanne ka antinno kammaaw caanne. 3Ka piitase otanta pakateeta kara kitto a Qobbiroosi qinda pittitta opa diinne ka piita Sooriya opa anne. Ka qoota markapa fe'isaadi eyye lekkinno malla, kamkama a pakateeta Tiroosi opa anne. 4Ka eyye orra amanno faane ka teyne ka ishootta kapa kuyyaata tappa pirre. Ishootta ka Hapura Qulqullootatin Pawloosi' kidene, “Yursaalamipa an aanan!” 5Ete kuyyawwasene an eyye pirrinna dikkadeneeyye in xaane ka antinno kammaaw caanne. Ishootta ka iskattaaysho ka hellaasso ollin haka katama tulati' ino keessen. Eteen pakateeta kapa ollin kilpiippanne ka Waaqa qinsanne kammaayye anka oli kapa xaaneew. 6Sekkammaayye ino oori markapa oppopan fayyanne, ishootta ka tikkaasso opa tiitaawen.

7Anka Tiroosiiyyi xaane ka Petelemaaysi kayne ka eyye orra amanno oli akkine ka olqara nakayta kakaassanne ka kuyyaata takka ishootta kapa' pirre. 8Ka parraytaadi eyye xaane ka Qisaariyaapa anne. Ka eeyye tika wenkelaawittase a Filippoosi isaase taaqonewwa tappa oppaayye takka kodde opa anne ka isha kapa kutiine#koda 6:5; 8:5. 9Isha tuparra a in hemammini afuri a daasata a xuuma haasawatta qapa'e qapa. 10Eten kuyyawwa lekaya eyye pirreeyye, xuumampayta takka Akapoosi kidammo piita Yihutaati dela de'e#koda 11:28. 11Xuumampaytose ka ino kapopa dehaade ka saalpata Pawloosi qeede ka isi tupa harka isho loqqa hide ka kide, “Hapura Qulqulloota ikiini, ‘Yihutaata a Yursaalami kara kitto asse aappa salpatoseti hiita ka orra a Yihutaata in koddinin turopa tuukkita.’”

12Eten sede dakayeneeyye, ino isho orra eeyye co piisanin akka Pawloosi Yurusaalamipan in anninini isha naappanninna.” 13Pawloosi xoori i'orshe ka kide, “Maana'e asse pooynittan ka karittiiyyo nyarrahasiisnittan? Anti maxxa Poqalla Yesuusi malla Yursaalami kara hidama pattan ma, toota kuli in harmisade.”

14Ete dehaamtase xanno “an teyyado” kideeyye, oori alle'en isha diinne ka kiine heenna a poqalla kodden.

15Eten eeyye kuyyawwa lamaya pirre kammaayye, mehaddaannon harmisanne ka Yursaalamipa anne. 16Orra amanno a Qiisaariyaayye co demo ka ino olli de'e. Ishootta akkan tika Minasooni kutiino'e tikaadi pa inon aanen. Isha nefo Qobbiroositta a turanneew amane.

Pawloosi akka Yursaalami karaayye Yayqoopi kassatta' aane

17Eten Yursaalami kayneeyye, orra amanno ka xasan ino teyyade. 18Parraytaadiiyyi Pawloosi ka ino olliiyyi Yayqoopi kapopa de'e. Qimaya a tika kiristaana piisa ka eyyeew caan. 19Pawloosi ete ishootta piisa nakayta oorshe kammaayye, wa Waaqa isha qudan orra Yihutaata in koddinini oppa' kode piisa takka takka ishootta' torre. 20Ete sede dakayeneyye, ikka piisanti Waaqa kalataysaden. Ka Pawloosi kidene, “Innaanno! orra amanno a kumadda leka kayo akkima Yihutaatoppa co, ka piisaniiyyi seera yoota qapo i'upta. 21Ishootta isase torraammitto ka kiinitto Pawloosi Yihutaata a orra Yihutaata in koddinini oppa kalto piisa kollinni ka kiini ‘Hellaassina dawra qara an muran taaki taantewwa an tooytaadan.’ Ka akka seera Muuse shaaramo kooni. 22Semmalla deenaatti idakayaneey, maana kodeeta wayyi? 23Semmalla waan ino ke kiininna kode. Ino oppaayye nama afuri a Waaqa xasa daasade ca#dikoota 6:13-21. 24Atti ishootta isi quda' qeede ka ishootta olliiyyi isi jaqqe ka akka mattaaysho kooshadane'e, kaajasene a daassata tika qulqulloota opa kalla ishootta qara daashe. Oto asse kootooyye, wa a ke qara torraame piisa akkan paata patta atti ka mattaayti a seera ajajammo koddite, piisa upnaadaay. 25Orra a Yihutaata in koddinini oppa amane xoori, taptaappese piisatta kiinitto, ‘Damta killana kalisoota kodamte ka nyalte in daman; umma diika nefo in ikan, umma so'a a horeeta a siibsamte ka toote, in daman ka sharmuutuma kapa sekaada.’ In taafne ka ishootta erkine#koda 15:29 .”

26Sekkammaayye Pawloosi ka orrose qeede ka parraytaadiiyyi ishootta olli isi jaqqe ka kuyyawwa a kara isi jaqqane aytami akkima koddan ka kaajasene a daassata ishootta takka takka qara daasama aytami akkima daasaman upnassa'e, tika qulqulloota kelopa kulle.

Pawloosi akka tika qulqulloota kela' qapame

27Ete kuyyawwasene tappa dikkatta kela foolsatteeyye, Yihutaata a Issiyaayye deete, qoota tika qulqulloota kela Pawloosi akkite malla, samayta piisa xa'isse ka Pawloosi qapte, 28Ka ullupte ka kiite, “Isira'eleteeyye! Ino awla! A orrinno ka seerinno isho poroose are co toorro ka samayta piitadda oppa co piisa kollinno, namoose are co. Ka semaliiyyiiw, orra a Yihutaata in koddinin tika qulqulloota kelopa kullissaaanne porose qulqullaawe nyelshe.” 29Wa malla asse kidene nefo, qoota Pirofimoosi Efesoonittase Tirofimoosi se turan isha olliiyyi katama kara akken malla, a Pawloosi isha qeede ka tika qulqulloota kelopan kulle ishootta pahanaatte#koda 20:4 .

30Katama piisa ka tupa desa horen. Samayta piisa ka takka Hirittan de'e ka Pawloosi qape ka tika qulqulloota kela titittan isha sookshe. Xarrada a tikase a qulqulloota ka eennow dufamen. 31Orrose ete Pawloosi ikassa fadeyye, otoota a kiinitto “Ha katama Yursaalami piisa tupadesa horri!” Ajajampayta a xela oranna a Roomi qara kaye. 32Semmalla isha ka xelaadi a oranna isho Motolaqaddaadi isi kamma qeede ka jarjartan orrase kapopa keerittan awwle. Orrase ete ajajampaytase isho xelase a oranna akkeeyye, Pawloosi qiditta diishen. 33Ajajampaytase ka Pawloosi qape ka akka sansalaata lakkin hidamo ajaje! Ka sekkammaayye ayno akkima kodde ka maana akkima kode upnaatta fade ka kaassade. 34Samaytase oto Demo we takkan kiinooyye, a demo wa pila'e kiini, ajajampaytase ka horayta samayta qaran xaate'e wa dukaata kodde upnaatta malaale. Ka akka Pawloosi safara xela oranna oppopan aanane ajaje. 35Pawloosi ete fayma kapa kayeeyye, qoota samayta piisa a kuttati miiran xa'e ka isha qara rakkoota qeeda faano malla, xela oranna ka isha haade ka ishin aanen. 36Samayta ka isha kamma anni ka horri ka kiini, “A alle ishshamo!”

Pawloosi akka malseeta isi qara oorsade

37Xelase a oranna ete safaraaysho oppopa isha kullissa' foolsadeeyye, Pawloosi i'ajajampaytase a xela orannaati kide, “Akkan we takkan ke lelo'e i'ana faqqatta?” Ajajampaytase ka kide, “Hela afa Kirikki haasawatta i'ettaninne? 38Amma dehatiiyyi Kipsittase tiyya xaashe ka orra orra leyshe nama kuma afuri isi quda' qeede ka koommaytoppopa pate, kenne?”

39Pawloosi ka ishi kide, “Anti an Yihutitta a Terseesi katamasene a kurraaysho dakaanna Kilqiya kara caati delade. Atara akkan samayseti haasawado'e, ana' faqqate.”

40Ete akka haasawado isha' faqqateeyye, Pawloosi fayma qara'e qa'ade ka akka samayta jaw kido'e harkan akkishe. Ka ete samayta jaw kideeyye, afa iprutin haasawatta paayye ka kide.

Currently Selected:

Kodampaya 21: MaQu

Highlight

Copy