Kodampaya 17

Horayta a katama Teseloonqe kara xa'e

1Pawloosi isho Sillaasi katama Anfipoolisi ka katama Abolooniya oppanne tarpen ka Teseloonqepa aanen. Eyyeyye tikase a qinseeta a orra a Yihuta'e ca. 2Pawloosi ka akka kollumaadi mina tikase a qinseeta kelopa kulle ka olikamma sampata sessa mataaffa qulqulloota oppa lelli ka samayta' la'anni. 3Ka Kiristoosi akkima rakkoota akkatta ka tootoppa xaana isha faanitto olkela la'assaanne kiini, “Ha Yesuusise an ishina torrininno, ishan Kiristoosi.” 4Yihutaata oppa orra demo ka qaalese teyyade ka Pawloosi isho Sillaasi qudopa oore. Ka akkimose mina'ew Yihutaata a Waaqa Waaqaysannitto oppa a'akata leka isho iskatta lekayta a katamaappa upanaysame lekayta ka qaalese teyyade ka ishootta qudopaaw oore.

5Yihutaata xoori yootanne qapamte ka orra koda tiite ka paata reekinno porraappa ollopa oorisse ka tiyya xa'isse. Ka akka katamaappa horayta xa'o koote ka Pawloosi isho Sillaasi sookissa ka samayta turopa dehassa'e tika Iyyasooni kapa murte. 6Ma xoori ete ishootta dapteeyye, Iyyasooni isho orra amanno takka takka ukkumampaya a katama turopa dehassa'e ishootta titte ka ishin ante, ka nessa kuttan kiini “Sene piita piisa qara horayta qeede, amma arepa de'eneew! 7Iyyasooni ka ishootta teyyade. Ikka kiini, ‘Nuqusa a Yesuusi kidammo a pila'e ca.’ Ka ajaja nuqusase kutta a Roomi toorri.” 8Samayta isho ukkumampayasene a katama ete sede dakayeneeyye, olkelanne Yaaqyaaqen. 9Ka Iyyasooni isho orra a isha quda co waaseta halacciisen ka ishootta diishen.

Pawloosi sho Sillaasi akka Peeriyaapa aanen

10Hellaa kiristaana ka halkeetteeyye, akka Pawloosi isho Sillaasi jarjartan Peeriyaapa aanane koden. Ete eeyye kayeneeyye, tikase a qinseeta a orra Yihuta kelopa kullen. 11Yihutaata a Peeriya kara kitto, a Tesselonqe kara kitto kapaayye qoota qalpeeta fayya qapto malla, xasa kuttanne qaalese teyyatte ka akka qaalese a Pawloosi dukaata koddite qalpeeffatta'e, kuyyaata kuyyaatan mataafa qulqulloota nappapni ka kara qorri. 12Semmalla ishootta oppa lekaya ka amanen. Orra a Yihutaata in koddinini oppaayye iskatta a teyantoode lekayta isho diira lekaya ka amanen. 13Ma xoori Yihutaata a Teseloonqe kara kitto, akkima Pawloosi Peeriya kuli kara qaaleta Waaqa torre upnaatte ka eyyepa deete ka falqan tiyya xa'isse. 14Sitiiyyi hellaa a kiristaana ka akka Pawloosi irra qara pakateeta kapopa aano koden. Sillaasi isho Timotoosi xoori, eyye Peeriya kara'ew hasen. 15Orrase Pawloosi keesse ka Ateenaan isha kaye. Ka ajajase a Pawloosi kiino “Sillaasi isho Timotoosi a jarjartan ana qaqqaapsaden.” Qeeden ka Peeriyaapa tiitawen.

Pawloosi wa katama Ateena kara' kode

16Pawloosi a Ateena kara co ka Sillaasi isho Timotoosi asnooyye, akkima katamasene killoowwaan immakaadene akke ka isi karan xata quumade. 17Ka semmalla tikase a qinseeta a orra a Yihuta kelaayye Yihutaata ka orra Yihutaata in koddini a Waaqa waaqaysanno isho orra a kuyyaata mina moorappa akkino olli shiishni.

18Ooka takkan, Eepikorosewwa isho Istooykowwa kidamma ka isha kapopa de'ena ka isha oli shiishni. Demo ikiini, “Nyaanynyampaytose maana kida faani?” Demo ka kiiniwi, “A qoota Waaqadda haarayati desa haasawanno paha.” Wa malla asse kidene nefo, qoota Pawloosi otootase a fayya a Yesuusi isho a tootoppa xaanaadi torre malla. 19Semmalla ikka Pawloosi qeeden ka orra pora takka a Ariyoosfaakoosi kidammo oppopa xora ollopa anno oppopa ishan aanen ka ishi kidene, “Ino a kollissoose haarayoose a kollinnitto maana akkima kodde upnaatta in heennaay, 20wa haaraya kodde takka takka ino' lele. Wessen maana akkima kodden upnaattan heenna.” 21Orra Ateena kara kalo isho hapta eyye kalo piisa ka asse kide; wa malla asse kidene nefo, wa haaraya kodde haasawatta ka dakkaysatta quda kiseetaaysho tarpinnaan malla.

22Sitiiyyi Pawloosi ka orrase Ariyoosfaakoosi opa ollopa xore tura qa'ade ka kide, “Ishina orra Ateenaatiiyyi, akkima qinda piisan orra amanteeta kokkonnaanno kodditen in upnaade. 23Eten katamaassin oppa tittiitaawno ka wa ishi Waaqaysannittane tooynooyye, pora kalisoota a qara taafen ka kidene ‘Waaqa a opa in upnini'in’ akke. Semmalla amma anti, waaqoose a' ishina a upnin mali Waaqaysannitane desan ishina' lela. 24Isha piita isho wa piita qara ca piisa uume ka Poqalla moonta isho a piita. Umma tika qulqulloota a harka namatin qupamte kara kallaanni in co. 25A caatta ka nessa isho wa pila nama pisa' daanno qoota isha kodde malla, wa ishi qajna in caan. Umma qaarqaarsa nama isha parpaccisni in caan. #nuqu a 1ta 8:27; Issa 42:5; koda 7:48 26Isha sanynyeeta nama' piisa, nama takka oppaayyeew uume ka akka piita piisa qara kallaado kode. Ka kiseeta a ishootta qapamte isho porra a oppa kallaadane ishootta' mure. 27Wa malla asse kode nefo, orra akka Poqalla fado ka kara qorattaan isha fado ka isha teyo malla. A kodditoma isha ino takka takka kapa iseki kideetan. 28‘Ino ishannen caatta akkanninna ka lellehninna ka kallaanninna.’ Sede nefo akka saarissampayasen oppaayye demo kidene, ‘Ino nefo an hellaadi,’ mina 29Oton ino hellaadi koddineeyyeew, ‘Waaqa pahana ookuma isho dikatta namatinni warqeeta taaki dakara pirreeta taaki daka oppa kodame'e paha.’ kideeta ka dikatta ino parpaccisni in kitto. 30Semmalla wa orra sapanna xattaati upna mali kode, Waaqa ituffade ka qaran tarpe; amma xoori orra a piitadaappa kalo piisa akka juppootoppa ooro'e ajaje. 31Ka akka namase a isha' reexade qudan kuyyaata a oppaayye piita piisa qara dukaatan farato qapade; ka namase a reexade tootoppa xa'issaanne, nama piisa sede upnayshe.”

32Ete qaaleta a kiinitto “Tootoppa xaana” dakayeeyye, demo qara seesen. Demo xoori i'ishi kide, “Oto awta pilaati qootoseti desa ino' lellittooyye in dakayna.” 33Sekkammaayye Pawloosi xorase oppa sooke ka alle' aane. 34Orra demo xoori isha quda kodde ka amane. Orrose amaneppaayye nama takka Diyonaasiyoosi kidammo, a xora a Ariyoosfaakoosi oppa takka kodde ka iskatteeta takka Demaarisi kidammitto isho orra pila kuli ishoottoppa caaw.

Currently Selected:

Kodampaya 17: MaQu

Highlight

Copy