Hikubho 25
25
Apaulo ajopa chitaka lyabhe lijaule kwa akolo bha chilambo cha ku Loma
1Machobha ga tatu pabhakahika Afesito ku Kaisalia akakwela kujaula ku Yelusalemu, 2konokwe Akaakung'i Akolo pamo na akanachilongola bha chiyahudi bhakajendelela na kwachitaki Apaulo, 3bhakaajopa muno Afesito bhaatendele chenichela chibhachipala kwa kwaaleta Apaulo ku Yelusalemu, kwa kubhee bhakibhanga bhalolea ndela ja kwaakoma akibha nndela. 4Afesito akajangula, “Apaulo atekuhibhililwa konokwe ku Kaisalia, nanenga namwene mbakujaula konokwe pakubhandikila. 5Mwaalekenge akanachilongola bhinunji bhajendange pamo na nenga bhakabhoange ngani jabhenji handa bhatekupangana choachela chibohu.”
6Afesito akatama nabho kubhandikila machobha nane au komi, ngapena akabhuja ku Kaisalia. Na lichobha lilikahika akajenda penipala pa chebule na kutama pachitengu cha kuhukumulila, akakulumikia Apaulo bhaletwe nnongi jabhe. 7Apaulo pabhakapitila, bhenibhala Bhayahudi bhabhakibhanga bhatulukinge kubhoka ku Yelusalemu bhakajemanga bhakibha bhatekwatindila, bhakaletanga mihalo jijingi mikolongwa muno yakubhee bhangakombolanga kukongolela ukweli gwa chikubho cheene. 8Ngapena Apaulo akachitetea, akalongela, “Nenga nangatenda chikubho choha chela chichitaukana na malagilo ga Bhayahudi au cha Nyumba ja Annoongo au chichitaukana na amwenye akolo jwa ku Loma.”
9Afesito, akapala kwabhajila Bhayahudi, akaakonya Apaulo, “Bholi, npala kujaula ku Yelusalemu na kujangula mihalo nnongi jangu konokwe?”
10Apaulo akajangula, “Nenga nangocheni ndekujema nnoongi ja chebule ja Akaisali, yakubhee nga kumbalikwa kuhukumulikwa. Handa henela mwenga mwabhene chimuimanya maha nangaatendelanga Bhayahudi kulemwa koha kola. 11Bahi handa nenga ndekulemwa kwa kupangana kukupalikwa kujomoka, nganaopo kujomoka. Nambo handa mihalo gagabhekitwe kwachangu na habha Bhayahudi ngabha ga kweli, jwakwa johajola jwakombola kumbeleka kwabhenji ku Yelusalemu. Ndendakujopa bahi mbelekwe kwa Akaisali ngahukumulwe!”
12Afesito pabhakajomola kulongela na Chebule lyabhe, akatangacha, “Mwenga ntekujopa kupelekwa kwa amwenye akolo jwa ku Loma, bahi, mpakujaula kwa amwenye akolo jwa ku Loma.”
Afesito atendakwaalobholela Agilipa ngani ja nhwalo gwa Apaulo
13Pagakapeta machobha kachoko Amwenye Agilipa na alombo jwabhe jwakemitwa Abenike bhakahika ku Kaisalia kwaabhandikia Afesito handa atabhala. 14Pabhakibhanga konokwe ku Kaisalia machobha gajingi, Afesito na Amwenye bhakalobholelana genigala gabhatekwatakia Apaulo, bhakalobholanga, “Abhile mundu jumo pambani yakubhee Afelikisi atekwaleka mu nyuumba ja kutabhila bhandu. 15Panakajaula konokwe ku Yelusalemu, akaakung'i akolo na akanahota bha Bhayahudi bhakantakia na kunyoopanga naahukumule handa atekulemwa. 16Nambo nenga nakaalobholelanga kubhee ngabha chiiyobhalilikwe ku Loma kummoha mundu joajola ahukumulwe tangu jwaakutakiwa jwangakongana na jwaatakiwa jwake. Na jono apekewe upenyo gwa kuchitetea ngani ja mihalo jabhanhukumula. 17Henela pabhahikanga pambani pamo na nenga, nangakabha, malabhi jakwe nakakema chikomiti cha Chebule, nakatama pa chitengu changu cha hukumulo, nakalagia jono mundu bhannete. 18Bhenibhala bhabhatekutakiwa pabhakajemanga, bhangalongelanga choachela chibohu handa chinakahobhalela. 19Badala jakwe bhakibhanga na kutaukana kwa ngani ja kujopa kwabhenji na kwa ngani ya mundu jumo jwaatekujomoka jwakemitwa Ayesu yakubhee Apaulo akaendelea kulobhola kubhee jwamomi. 20Nangamanya chakutenda kwa ngani ja nhwalo gonogwe. Bahi nakaakonya Apaulo handa akapala kujaula konikola ku chebule ja mihalo ku Yelusalemu kwaajangulanga nhwalo gonogwe. 21Nambo Apaulo pabhakaajopa ahukumulwe na amwenye akolo bha ku Loma, akajopa alekeelewe mpaka chibhapakuamua amwenye akolo bha ku Loma, henela nakaamua atame mu chitabho mpaka pambakombola kwaapeleka kwa amwenye akolo bha ku Loma.”
22Ngapena Aagilipa akaalobholela Afesito, “Mbala kunnyoanikia mundu hojwe nanenga namwene.”
Afesito akaajangula, “Mpakwaajoa malabhi.”
23Malabhi jakwe Aagilipa na Abenike bhakaikanga kwa kuhangalala kukolongwa bhakajingilanga muchebule ja kuhukumula pamo na akaakolo bha Manyemba na akaakolo bha chilambo. Afesito akaakulumikia Apaulo bhaalete nkati, 24akaendelea kulobhola, “Amwenye Agilipa, na mwangota bhammilinge pambani pamo na twenga, ntendakummona mundu hojojo! Chibhoga choha cha Bhayahudi bhakakokolekela kwa ngani ja jono mundu konokwe ku Yelusalemu na pambani ku Kaisalia, bhakalobholanga kwa malobhe makolongwa yakubhee ngapalikwa kuhigalia amomi. 25Nenga nangabhona chibhalemwite hata apalikwa komekwa. Nambo kwa henela Apaulo akajopa apelekwe kwa Amwenye akolo bha ku Loma, nannenga mbakwaapeleka konokwe ku Loma. 26Nambo kwangu nenga nanga choachela cha kwaajandikila amwenye akolo bha ku Loma. Nga mana hojo mundu ndekwaleta pambani nnoongi jinu kupala mwaakonye ili ngombole cha kwaajandikila na kwaakongolela. 27Kwa kubhee ndendakuganikia nga mbeenje kwaapeleka atabhwa kwa amwenye akolo bha ku Loma pangali kujandika hikubho hibohu hibhatekupangana.”
Currently Selected:
Hikubho 25: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
Hikubho 25
25
Apaulo ajopa chitaka lyabhe lijaule kwa akolo bha chilambo cha ku Loma
1Machobha ga tatu pabhakahika Afesito ku Kaisalia akakwela kujaula ku Yelusalemu, 2konokwe Akaakung'i Akolo pamo na akanachilongola bha chiyahudi bhakajendelela na kwachitaki Apaulo, 3bhakaajopa muno Afesito bhaatendele chenichela chibhachipala kwa kwaaleta Apaulo ku Yelusalemu, kwa kubhee bhakibhanga bhalolea ndela ja kwaakoma akibha nndela. 4Afesito akajangula, “Apaulo atekuhibhililwa konokwe ku Kaisalia, nanenga namwene mbakujaula konokwe pakubhandikila. 5Mwaalekenge akanachilongola bhinunji bhajendange pamo na nenga bhakabhoange ngani jabhenji handa bhatekupangana choachela chibohu.”
6Afesito akatama nabho kubhandikila machobha nane au komi, ngapena akabhuja ku Kaisalia. Na lichobha lilikahika akajenda penipala pa chebule na kutama pachitengu cha kuhukumulila, akakulumikia Apaulo bhaletwe nnongi jabhe. 7Apaulo pabhakapitila, bhenibhala Bhayahudi bhabhakibhanga bhatulukinge kubhoka ku Yelusalemu bhakajemanga bhakibha bhatekwatindila, bhakaletanga mihalo jijingi mikolongwa muno yakubhee bhangakombolanga kukongolela ukweli gwa chikubho cheene. 8Ngapena Apaulo akachitetea, akalongela, “Nenga nangatenda chikubho choha chela chichitaukana na malagilo ga Bhayahudi au cha Nyumba ja Annoongo au chichitaukana na amwenye akolo jwa ku Loma.”
9Afesito, akapala kwabhajila Bhayahudi, akaakonya Apaulo, “Bholi, npala kujaula ku Yelusalemu na kujangula mihalo nnongi jangu konokwe?”
10Apaulo akajangula, “Nenga nangocheni ndekujema nnoongi ja chebule ja Akaisali, yakubhee nga kumbalikwa kuhukumulikwa. Handa henela mwenga mwabhene chimuimanya maha nangaatendelanga Bhayahudi kulemwa koha kola. 11Bahi handa nenga ndekulemwa kwa kupangana kukupalikwa kujomoka, nganaopo kujomoka. Nambo handa mihalo gagabhekitwe kwachangu na habha Bhayahudi ngabha ga kweli, jwakwa johajola jwakombola kumbeleka kwabhenji ku Yelusalemu. Ndendakujopa bahi mbelekwe kwa Akaisali ngahukumulwe!”
12Afesito pabhakajomola kulongela na Chebule lyabhe, akatangacha, “Mwenga ntekujopa kupelekwa kwa amwenye akolo jwa ku Loma, bahi, mpakujaula kwa amwenye akolo jwa ku Loma.”
Afesito atendakwaalobholela Agilipa ngani ja nhwalo gwa Apaulo
13Pagakapeta machobha kachoko Amwenye Agilipa na alombo jwabhe jwakemitwa Abenike bhakahika ku Kaisalia kwaabhandikia Afesito handa atabhala. 14Pabhakibhanga konokwe ku Kaisalia machobha gajingi, Afesito na Amwenye bhakalobholelana genigala gabhatekwatakia Apaulo, bhakalobholanga, “Abhile mundu jumo pambani yakubhee Afelikisi atekwaleka mu nyuumba ja kutabhila bhandu. 15Panakajaula konokwe ku Yelusalemu, akaakung'i akolo na akanahota bha Bhayahudi bhakantakia na kunyoopanga naahukumule handa atekulemwa. 16Nambo nenga nakaalobholelanga kubhee ngabha chiiyobhalilikwe ku Loma kummoha mundu joajola ahukumulwe tangu jwaakutakiwa jwangakongana na jwaatakiwa jwake. Na jono apekewe upenyo gwa kuchitetea ngani ja mihalo jabhanhukumula. 17Henela pabhahikanga pambani pamo na nenga, nangakabha, malabhi jakwe nakakema chikomiti cha Chebule, nakatama pa chitengu changu cha hukumulo, nakalagia jono mundu bhannete. 18Bhenibhala bhabhatekutakiwa pabhakajemanga, bhangalongelanga choachela chibohu handa chinakahobhalela. 19Badala jakwe bhakibhanga na kutaukana kwa ngani ja kujopa kwabhenji na kwa ngani ya mundu jumo jwaatekujomoka jwakemitwa Ayesu yakubhee Apaulo akaendelea kulobhola kubhee jwamomi. 20Nangamanya chakutenda kwa ngani ja nhwalo gonogwe. Bahi nakaakonya Apaulo handa akapala kujaula konikola ku chebule ja mihalo ku Yelusalemu kwaajangulanga nhwalo gonogwe. 21Nambo Apaulo pabhakaajopa ahukumulwe na amwenye akolo bha ku Loma, akajopa alekeelewe mpaka chibhapakuamua amwenye akolo bha ku Loma, henela nakaamua atame mu chitabho mpaka pambakombola kwaapeleka kwa amwenye akolo bha ku Loma.”
22Ngapena Aagilipa akaalobholela Afesito, “Mbala kunnyoanikia mundu hojwe nanenga namwene.”
Afesito akaajangula, “Mpakwaajoa malabhi.”
23Malabhi jakwe Aagilipa na Abenike bhakaikanga kwa kuhangalala kukolongwa bhakajingilanga muchebule ja kuhukumula pamo na akaakolo bha Manyemba na akaakolo bha chilambo. Afesito akaakulumikia Apaulo bhaalete nkati, 24akaendelea kulobhola, “Amwenye Agilipa, na mwangota bhammilinge pambani pamo na twenga, ntendakummona mundu hojojo! Chibhoga choha cha Bhayahudi bhakakokolekela kwa ngani ja jono mundu konokwe ku Yelusalemu na pambani ku Kaisalia, bhakalobholanga kwa malobhe makolongwa yakubhee ngapalikwa kuhigalia amomi. 25Nenga nangabhona chibhalemwite hata apalikwa komekwa. Nambo kwa henela Apaulo akajopa apelekwe kwa Amwenye akolo bha ku Loma, nannenga mbakwaapeleka konokwe ku Loma. 26Nambo kwangu nenga nanga choachela cha kwaajandikila amwenye akolo bha ku Loma. Nga mana hojo mundu ndekwaleta pambani nnoongi jinu kupala mwaakonye ili ngombole cha kwaajandikila na kwaakongolela. 27Kwa kubhee ndendakuganikia nga mbeenje kwaapeleka atabhwa kwa amwenye akolo bha ku Loma pangali kujandika hikubho hibohu hibhatekupangana.”
The New Testament in Ndondehamba Language ©The Word for the World International and Ndondehamba Language Translation, All rights reserved.