Pigbukasan 21

Ya bagu na langit aw ya bagu na lupaꞌ

1Na, pagkatigkas yan, kyinitaꞌ ku ya bagu na langit aw bagu na lupaꞌ kay walaꞌ da ya dadan na langit aw lupaꞌ aw walaꞌ da uman ya dagat. 2Aw kyinitaꞌ ku uman ya bagu na Jérusalim na syudad na Tyumanem na nyanog lekat adti tas na langit. Ya syudad yeiy, nyatagilan da kasiling na ka͡ubayan na syumut sa kadégkadég na pangkasal pada sumungun sa un nan pangesegen. 3Aw awun dyengeg ku na dakulaꞌ na tingeg na lyumekat apit adti trunu na miglong, “Na, pakanyegi mayu! Ya eya-anan na Tyumanem awun da ni kana manga utaw. Meyaꞌ sakanan eped nilan, aw silan ma-imoꞌ kanan manga utaw. Aw ma-iyeped nilan sakanan aw yan saba ya kanilan Tyumanem. 4Aw galisan nan ya manga luwaꞌ dun ni manga mata nilan. Aw walaꞌ da ya pagkamatay nilan aw kakalatan na kanilan ginawa, aw walaꞌ da uman ya pagsugaw, aw diliꞌ da silan magti-is. Kay ya manga muna pagpakabetang lyumabay da.”

5Aw miglong ya nyingkud adti trunu, “Pakanyegi mayu! Pigbagu la ku ya kadég!” Aw miglong pa sakanan kanak, “Sulata ya manga tingeg ini. Kay ya tingeg yeiy, alag kasaligan aw tengteng na matinaw.” 6Aw miglong pa uman sakanan kanaken, “Nyangkatuman da ya kadég! Aku ya Alpa aw ya Oméga. Aku ya lyekatan aw aku uman ya katigkasan. Ya kadég na pigtalaynem, pa-inemen ku silan sa tubig na walaꞌ ya bayad na gayed tyumugbul lekat adti selep na nyatag sa ginawa na walaꞌ ya katigkasan. 7Ya utaw na dumeg sa malatay, yan ya makatagtun sa manga kadyawan na pigpakang ku kanan. Kay aku ya kanan Tyumanem, aw pa-edeꞌ ku adti kadég na yan ya kanak iseꞌ. 8Manang malatay ya datengan na manga utaw na nyallek dyumalug kanak asuntu sa pamulayam, aw ya utaw na walaꞌ pangintu-u kanak, aw ya manga utaw na malatay ya anenganeng, aw ya manga magpatay sa eped, aw ya magkasala-enen, aw ya manga talagamutan, aw ya magsimba sa manga inutaw, aw ya kadég na galu-un, alag silan agbel adti danaw na atulun na asupri. Yeiy da ya kadwa na pagkamatay.”

Ya bagu na Jérusalim

9Pagkatigkas yan, dyumulud kanaken ya sambuk na anghil na lekat adti pitu ya anghil na nyaka-asag da sa awun ni kayapung nilan, na yan ya katigkasan na manga pagamak. Aw miglong ya anghil kanak, “Adi kaw! Pakitaꞌ ku kanmu ya pangugnanenen na Nati na Karniro.” 10Aw awun pigpakitaꞌ kanak na Ispiritu Santo kasiling na tagaynep: Pigpa-agad aku na anghil adti tuktuk na matas na buntud, aw pigpakitaꞌ nan kanak ya syudad na Tyumanem na yan ya Jérusalim na nyanog lekat adti tas na langit. 11Aw ya syudad yeiy to-o nyinag asuntu na kya-ilawan na kalalamdag na Tyumanem, kasiling na batu na haspi na to-o dakulaꞌ ya alagaꞌ, aw to-o matinaw kasiling na kristal. 12Aw ya syudad kyapalibedan na matas na inalad na to-o masalig. Awun uman sampuluꞌ tag duwa (12) ya suwangan dun ni inalad, aw ya tagsambuksambuk na suwangan awun sambuk na anghil na migtungguꞌ. Aw ya manga suwangan pigsulatan sa ngalan na sampuluꞌ tag duwa (12) ya iseꞌ ni Isra-él na eseg. 13Awun tulu ya suwangan apit adti silatan, aw ya tulu uman apit adti sallepan, aw ya apit adti duwa ya balabagan awun tag tulu ya suwangan. 14Ya inalad na syudad pigtulluk adti sampuluꞌ tag duwa (12) ya mabaklaꞌ na batu na sumalem, aw ya kada sambuk pigsulatan sa ngalan na sambuk na apostolés ni Jisus na yan ya Nati na Karniro.

15Na, ya anghil na migpakitaꞌ kanak sa kadég yeiy, nyawid sakanan sa sasukud na bulawan na un nan pagsukud sa syudad dala ya manga suwangan aw inalad. 16Aw sa pagsukud da na anghil sa syudad, mig-unawa ya kalawig aw ya kalakbang aw ya katas: Alag duwammalalan aw upatenggatus (2,400) ka kilomitro. 17Aw pigsukud nan uman ya kadakulaꞌ na inalad na syudad. Ya kadakmel, sanggatus aw kapatan tag upat (144) ka masiku.#21:17 Yeiy ya ka͡eneman tag enem (66) ya mitro. Aw ya sasukud na anghil, kasiling na sasukud na utaw. 18Ya inalad alag batu na haspi. Aw ya syudad, alag bulawan na kasiling na kristal na to-o matinaw. 19Aw ya manga mangkabaklaꞌ na batu na kyatullukan sa inalad, pigpakanenggeya͡an na madég na punganan na manga batu na dakulaꞌ ya alagaꞌ: Ya tagnaꞌ, yan ya haspi, aw ya kadwa sapiru, ya katlu kalsidoniya, ya kapat ésméralda, 20ya kalima sardonika, ya ka͡enem cornalina, ya kapitu krisolito, ya kawalu bérilo, ya kasiyam topasiyo, ya kasampuluꞌ krisopraso, ya kasampuluꞌ taggesyaꞌ (11) hasinto, aw ya kasampuluꞌ tag duwa (12) amatista. 21Aw ya sampuluꞌ tag duwa (12) ya mangkabaklaꞌ na suwangan dun ni inalad alag pérlas, aw ya tagsambuksambuk na suwangan pig-imoꞌ lekat adti sambuk na pérlas. Aw ya dalan na syudad, alag bulawan kasiling na kristal na to-o matinaw.

22Dun ni syudad yan, walaꞌ ya kyinitaꞌ ku na pigpa-indeg na témplo. Kay ya palangad Témplo dun, yan ya Tyumanem na migdumala sa kadég aw ya Nati na Karniro. 23Ya syudad yeiy, diliꞌ da ka-ilangan ya sega aw bulan, kay ya kalalamdag na Tyumanem aw Nati na Karniro yan da ya mag-ilaw sa syudad. 24Aw ka-ilawan na kalalamdag nan ya manga nasud. Aw ya manga hariꞌ asini kadakulaꞌ na banwa, sumeled silan dun ni syudad aw awun dala͡en nilan lekat adti kanilan manga pighari-an, dala ya manga ka-unan aw ya kanilan dengeg. 25Aw gayed uwangan ya manga suwangan na syudad. Kay walaꞌ da ya gabi. 26Aw awun pandala͡en dun ni syudad na mangkadyaw na to-o dakulaꞌ ya alagaꞌ na lekat adti manga nasud. 27Manang walaꞌ ya paseleden adti syudad na malatay, aw ya manga mig-imoꞌ sa makamulamula͡ay, aw manga galu-un. Yan oloꞌ ya paseleden dun ni syudad, ya manga utaw na ya ngalan nilan awun da ni libru na Nati na Karniro na pigsulatan sa manga nyakatagtun sa ginawa na walaꞌ ya katigkasan.

Currently Selected:

Pigbukasan 21: klgv

Highlight

Copy

Compare