Pigpan-imo' 2

Ya pagpadala sa Ispiritu Santo

1Na, dyumateng da ya Pista na Péntékostés,#2:1 Ya Pista na Péntékostés, yan ya sambuk na matas na allaw na manga Judiyu na pig-anenganeng nilan ya pag-atag na Tyumanem kan Moysis sa Uldin. Yan ya kakawasan na Péntékostés: kalima͡an (50). Kay nyaka-una ya Pista na Paglabay na Anghil na Tyumanem, aw pagkatigkas na kalima͡an (50) ya allaw, yan da uman ya Pista na Péntékostés. aw ya kadég na manga mangintu-uway kan Kristu dun ni Jérusalim, migsambuk silan adti dakulaꞌ na balay. 2Aw tigkan awun dalagunut na lekat adti tas na langit kasiling na mabandes na samet aw nyatmuꞌ na dalagunut ya balay na pigkatipunan nilan. 3Awun uman migpakitaꞌ kanilan na manga laga na iman mu aw manga dilaꞌ na mig-atped-atped adti tagsambuksambuk kanilan. 4Aw nyatmuꞌ ya kadég nilan na Ispiritu Santo, aw migpalekat silan miglong sa madég na punganan na tingeg na walaꞌ pa nilan lemena paglongan. Nyakapaglong silan sa manga tingeg yeiy magi sa katulus na Ispiritu na pig-atag kanilan na Tyumanem.

5Na, asuntu sa manga pista, awun madég na utaw na Judiyu na dadan da dyumateng adti Jérusalim lekat adti madég na nasud kay to-o nyatibulluk ya kanilan ginawa sa pagdalug sa Uldin#2:5 Ya Uldin na manga Judiyu yan ya kadég na manga suguꞌ na pig-atag na Tyumanem kan Moysis asini muna. na Tyumanem. 6Pagdengeg nilan sa kawayit lekat adti seled na balay yan, nyaksay silan migkatipun. Aw to-o silan nyabelengbeleng kay dyengeg na tagsambuksambuk ya kanilan tengteng tingeg, 7aw to-o silan nya-enneng-enneng. Aw mig-usip-usipay silan, “Wettay, wan yangadi? Ya manga utaw yeiy alag saba silan taga Galiliya! 8Anangaꞌ silan makapaglong sa kanaten manga tingeg na lekat adti manga banwa na pigka͡utawan tadun? 9Ya eped kanaten taga Partiya, aw taga Médiya aw taga Élam. Awun eped na lekat adti Mésopotamiya, aw Judiya, aw Capadociya aw Ponto aw Asia, 10aw Pridya, aw Pampilya. Awun uman lekat adti Ihiptu, aw lekat adti manga sakup na Libya na malapit adti syudad na Ciréné, aw pangkay manga taga Roma dala ya Judiyu aw manga Héntil#2:10 Ya manga Héntil, yan ya manga utaw na bekeꞌ na Judiyu. na dyumalug da sa Uldin aw katanem na manga Judiyu. 11Aw ya eped taga Krita aw taga Arabiya. Alag tadun pigdengeg ya piglong nilan adti tagsambuksambuk na kanaten tingeg. Aw yan ya pigkasampetan nilan ya to-o mangkadyaw na pigpan-imoꞌ na Tyumanem magi sa katulus nan!” 12Aw to-o silan nya-enneng-enneng aw nyabelengbeleng sa nya-imoꞌ dun. Aw mig-usip-usipay silan, “Unu ya kakawasan na kadég yeiy?” 13Manang awun eped kanilan na mig-odoy-odoy sa manga mangintu-uway, law nilan, “Ya manga utaw yan, nyalangulangu silan na inemenen!”

Ya pag-ubat-ubat ni Pédro adti madég na manga utaw

14Manang nyindeg si Pédro aw ya eped nan na sampuluꞌ taggesyaꞌ (11) adti asdangan na kadég na manga utaw, aw miglong si Pédro adti kanilan magi sa mabagseg na tingeg. Law nan, “Kay manga kadégan ku na manga Judiyu aw kadég mayu na nyeyaꞌ asini Jérusalim, pakanyegi mayu ya un ku paglongun. 15Ya manga utaw na dyengeg mayu kakayna, iman mayu aw nyalangulangu silan na inemenen, manang bekeꞌ na maynan, kay bagu pa saba alas nibi na maselem! 16Ya nya-imoꞌ adun na allaw ini, katumanan yeiy sa pigsulat na propita na si Joél asini muna:

17 ‘Ini ya piglong na Tyumanem.

Dun ni manga kamoliyan na allaw,

un ku atag ya kanak Ispiritu adti kadég na manga utaw.

Ya manga buwadbuwad mayu na eseg aw bubay, un nilan ubat-ubat ya pa-edeꞌ ku kanilan.

Aw ya manga eseg na bagu pa ya ginawa, awun pakitaꞌ ku kanilan.

Aw ya manga bakleg mayu, un ku silan patagaynepen.

18 Aw pangkay ya kanak manga sugu-anen na eseg aw bubay,

atag ku kanilan ya kanak Ispiritu,

aw un nilan ubat-ubat ya pa-edeꞌ ku kanilan.

19 Magpakitaꞌ aku sa madég na pangilala adti langit aw manga milagru asini tas na lupaꞌ:

Kita-en ya duguꞌ aw atulun aw madakmel na ebel.

20 Ya sega magkangitngit, aw ya bulan iman mu aw duguꞌ.

Maynan alag ya un mangka-imoꞌ sa diliꞌ pa dumateng ya allaw na pagdateng na Tyumanem, aw yeiy ya allaw na to-o madyaw aw walaꞌ ya maka-unawa.

21 Aw pangkay singalan ya magtawag adti Tyumanem, paluwa-en saba sakanan.’ ”#2:17-21 Mabasa adti Joél 2:28-32.

22Migpadeleg si Pédro mig-ubat-ubat kanilan, law nan, “Kay manga kadégan ku na utaw na Isra-él,#2:22 Asini muna, si Jakub pigngalanan na Isra-él, aw migbuwadbuwad sakanan, aw dun lekat ya manga utaw na Judiyu na nya-imoꞌ uman nasud na Isra-él. pakanyegi mayu ya tingeg ku! Ya Tyumanem ya migpa-edeꞌ na si Jisus na taga Nazarit ya pigpadala nan asini kanaten, aw kya-ede-an mayu kay pigmatinaw nan adti kamayu magi sa madég na manga pangilala aw milagru na pig-imoꞌ ni Jisus. 23Aw si Jisus yeiy, dadan da na Tyumanem pigpalpa na un nan atag adti kamayu, aw kya-ede-an da nan dadan na un mayu tumanen ya pigpalpa nan, kay pigtumbay mayu si Jisus adti manga utaw na mag-imoꞌ sa malatay, yanagaw kamu ya migpakalabu kanan adti krus. 24Manang pigmataw sakanan na Tyumanem aw pigpaluwaꞌ lekat adti katulus na kamatayen, kay diliꞌ saba sakanan mabatug tagenan na kamatayen. 25Kay awun piglong ni Dabid asini muna na nyatuman dun ni kan Jisus:

‘Gayed ku pigkitaꞌ ya Tyumanem,

kay dun da sakanan adti kalintu ku

pada diliꞌ aku ma-inang-inang.

26 Yanagaw to-o aku migleya,

aw diliꞌ ku katagenan ya kanak pagdeyen kanan.

Kya-ede-an ku na pangkay matay pa ya lawas ku manang awun pa imanen.

27 Kay diliꞌ mu pabaya-an ya kalaluwa ku adti banwa na Kaludukan.

Aw aku na gayed migtuman sa pagkaliman mu, diliꞌ mu tumbay na malandak ya kanak lawas adti lebeng.

28 Pigpa-edeꞌ da mu kanak ya un ku agiyan pasinan adti ginawa na walaꞌ ya katigkasan, aw to-o aku magleya kay awun kaw gayed ni sayid ku.’ ”#2:25-28 Mabasa adti Salmo 16:8-11.

29Miglong pa si Pédro kanilan, “Kay manga kadégan ku, matinaw saba ya piglong ku kamayu sa tyugbulan tadun asini muna na si Dabid. Nyatay da sakanan aw piglebeng, aw kenneꞌ pa na piglebengan kanan asini kanaten. 30Yanagaw asuntu na si Dabid sambuk na propita, kya-ede-an da nan na pigsapa-an sakanan na Tyumanem na ya sambuk na buwadbuwad nan un na Tyumanem pa-ingkudun adti trunu nan. 31Aw asuntu na kya-ede-an ni Dabid ya un dumateng, pigsulat nan ya pagkataw na Misiyas lekat adti pagkamatay. Aw matinaw saba ya pigsulat nan na walaꞌ na Tyumanem pabaya-i ya kalaluwa ni Jisus adti banwa na Kaludukan, aw walaꞌ kalandak ya lawas nan adti lebeng. 32Si Jisus yeiy, pigmataw da saba na Tyumanem. Aw pagkatigkas na pagkataw nan, kyinitaꞌ na kadég nami. 33Aw pigpatas da sakanan dun ni ingkudanan na to-o dengganen apit adti kalintu na Tyumanem adti tas na langit. Aw kasiling na pigpakang na Ama, pig-atag nan kan Jisus ya kanan Ispiritu, aw pig-atag da uman ni Jisus adti manga utaw. Aw ya kadég na kyinitaꞌ aw dyengeg mayu kakayna, alag yeiy nya-imoꞌ magi sa katulus na Ispiritu nan. 34Kay bekeꞌ ni Dabid ya nya-engat adti tas na langit, manang yeiy ya pigsulat nan asini muna, law nan,

‘Miglong ya Tyumanem adti kanaken Matas na Pangulu,

“Ingkud kaw apit adi kalintu ku

35 mendaꞌ na mabus ku degen ya kanmu manga po-on aw alag ku silan betang adti salad na siki mu.” ’#2:34-35 Mabasa adti Salmo 110:1.

36Yanagaw kamu na buwadbuwad ni Isra-él, ka-ilangan mayu kalabetan na si Jisus na pigpakalabu mayu adti krus, yan saba ya pig-imoꞌ na Tyumanem Misiyas aw Matas na Pangulu tadun.”

37Pagdengeg da na manga utaw sa ubat-ubat ni Pédro, kyelegan ya ginawa nilan, yanagaw nyusip silan kan Pédro aw sa eped pa na manga apostolés, law nilan, “Kay manga inulug, unu ya madyaw nami imo-un?” 38Aw tyumubag si Pédro kanilan, “Ya tagsambuksambuk kamayu, selseli ya manga salaꞌ mayu aw pagpaba͡utismu kamu dun ni ngalan ni Jisu-Kristu, aw lanasen na Tyumanem ya manga salaꞌ mayu, aw madawat mayu ya kanan Ispiritu. 39Kay yan ya pigpakang na Tyumanem kanaten aw sa manga buwadbuwad tadun aw pangkay adti manga utaw na Héntil, taman na kadég na tawagen na Tyumanem.”

40Madég pa ya pigpalna-u ni Pédro kanilan dun ni allaw na Péntékostés, aw nyanginayuꞌ sakanan sa manga utaw na magselsel silan, law nan, “Ka-ilangan na makaluwaꞌ kamu pada diliꞌ kamu pa-emel-emelen na Tyumanem eped na manga utaw na malatay adun na manga allaw yeiy.” 41Aw dun ni allaw yan, awun manga tulummalalan (3,000) ya nyangintu-u la sa pig-ubat-ubat ni Pédro, aw pigba͡utismuwan silan aw nyakadugang da adti manga eped na manga mangintu-uway dun. 42Aw ya manga bagu mangintu-uway, gayed nyatibulluk migpakanyeg sa palna-u na manga apostolés, aw migsambuk silan migkatipun, aw migsambuk uman silan kyuman,#2:42 Yan ya sambuk na pigkan nilan ya pan aw tagbiꞌ na bino na paras pada tumanen ya suguꞌ ni Jisus kanilan adti kamoliyan na pangiyambung, pada ka-anenganengan nilan ya pagkamatay nan aw ya pag-ilig na kanan duguꞌ. aw migsambuk sa pagpanawagtawag adti Tyumanem.

Ya pagkatipun da na manga mangintu-uway

43Aw pigpan-imoꞌ na manga apostolés ya madég na pangilala aw milagru magi sa katulus na Tyumanem. Aw pigbasa͡an na manga utaw ya Tyumanem na awun pagkallek. 44Aw gayed migpangkatipun ya kadég na manga mangintu-uway, aw pigsambuk nilan ya manga pametang nilan. 45Aw migpalekat ya eped miggalin sa lupaꞌ aw manga ka-unan nilan pada awun kuwalta na un atag adti manga eped nilan na migkapelek. 46Aw kada allaw migkatipun ya mangintu-uway adti pamanag na Témplo na Tyumanem, aw gayed silan migsambuk kyuman adti manga balay nilan aw to-o silan migleya, 47aw gayed nilan pigdeyen ya Tyumanem. Aw pigsayaꞌ silan na kadég na utaw. Aw kada allaw pigdugangan na Tyumanem ya manga utaw na pigpaluwaꞌ da nan.

Currently Selected:

Pigpan-imo' 2: klgv

Highlight

Copy