3 Juan 1
1
1Kay Gayo na kanak pigginawa͡an, ya sulat ini lyumekat adi kanak na maggagaday sa manga mangintu-uway. Pigginawa͡an ta kaw kay alag kita dyumalug sa matinaw na palna-u.
2Kanak ubaybay na pigginawa͡an, nyanawagtawag aku adti Tyumanem na pakadyawun kaw nan sa kadakulaꞌ na kanmu pagpakabetang, aw atagan kaw nan sa kabagseg na lawas kasiling na kabagseg na kanmu pagpangintu-u. 3To-o aku migleya kay dyengeg ku ya ubat-ubat na manga mangintu-uway na dyumateng adi, kay miglong silan kanak na nyatibulluk ya anenganeng mu adti pagdalug sa matinaw na palna-u. 4Ya tengteng na maka-atag kanak sa pagleya, yan oloꞌ ya dengegen ku na ya kanak mangayseꞌ dun ni pagpangintu-u dyumalug sa matinaw na palna-u.
Ya pagsayaꞌ kan Gayo
5Kanak ubaybay na pigginawa͡an, to-o kaw kasaligan dun ni manga imo-unun mu, kay dayaw mu pigbasa͡an aw pigpabantuk ya manga inulug tadun na mangintu-uway, dala ya manga bagu mu pigkilala. 6Pig-ubat-ubat nilan adti asdangan na manga mangintu-uway ya kadakulaꞌ na pagginawa mu kanilan. Yanagaw padelega ya pagpamasa kanilan aw ya pagtabang sa kapelekan nilan dun ni kanilan panaw pada makapadeleg silan sa kanilan manga imo-unun. Imo-a yeiy pada katutukan ya Tyumanem. 7Kay ya tud na kanilan pagpanaw yan ya pagpa-edeꞌ sa palna-u ni Kristu adti eped na manga banwa, aw walaꞌ silan dawat sa tabang lekat adti manga utaw na walaꞌ pangintu-u kan Kristu. 8Yanagaw kitadun na manga mangintu-uway ya umbaꞌ tumabang kanilan. Aw dun ni pig-imoꞌ tadun, kasiling na nyaka-eped kitadun kanilan sa pagpa-edeꞌ sa matinaw na palna-u.
Nya-imoꞌ malat na pundinganan si Dyotrépés
9Na, awun pyadala ku na sulat adti manga mangintu-uway, manang si Dyotrépés walaꞌ nan ka͡agadi ya katundanan nami kay kaliman nan magdumala sa kadég. 10Yanagaw sa pagkawun ku adti kamayu, balawbalawan tadun ya manga pigpan-imoꞌ nan, labi la ya pagtanemtanem nan kanami sa tingeg adti eped na manga mangintu-uway. Aw bekeꞌ na maynan oloꞌ ya pig-imoꞌ nan, walaꞌ nan uman basabasayi ya manga inulug tadun na migpa-edeꞌ sa Madyaw na Ubat-ubat kan Kristu adti eped na manga banwa. Aw ya manga mangintu-uway na malim galu mamasa kanilan, gayed nan pigpigilan aw pig-alilinan nan uman silan lekat adti pagkatipunan nilan.
11Kay Gayo na kanak ubaybay na pigginawa͡an, diliꞌ mu pagsilingan ya bet na malatay, manang yan baling ya silingi ya bet na manga utaw na mig-imoꞌ sa madyaw. Ya utaw na mig-imoꞌ sa madyaw, dun da ka-ede-i na nyakasambuk da sakanan adti Tyumanem. Manang ya utaw na mig-imoꞌ sa malatay, walaꞌ nan ka-ede-i ya Tyumanem.
Nya-imoꞌ madyaw na pundinganan si Démétriyo
12Na, si Démétriyo, pigkasampetan sakanan na kadég na manga mangintu-uway na madyaw ya manga pigpan-imoꞌ nan. Dun ni pag-eyaꞌ nan, pagkita-en na pigdalug nan ya matinaw na palna-u ni Kristu. Aw pigmatinaw nami uman na madyaw ya pig-imoꞌ nan, aw kya-ede-an mu na matinaw saba ya piglong nami.
13Na, madég pa galu ya un ku paglongun kanmu manang diliꞌ da ku betang asini sulat ini. 14Kay kaliman ku na maksay kita magkakita͡ay aw magkabalawbalaw.
15Ayin pa aku galu na ya kalinaw na Tyumanem gayed magad kanmu. Nyangumusta kanmu ya manga ubaybay mu idi. Aw pangumusta͡an aku uman adti tagsambuksambuk na manga ubaybay tadun awun.
Currently Selected:
3 Juan 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.