1 Timotiyo 1
1
1Kay Timotiyo, aku si Pablo ya migsulat adti kanmu. Nya-imoꞌ aku apostol ni Kristu Jisus, asuntu sa suguꞌ na Tyumanem na kanaten Magpaluwa-ay aw ni Kristu Jisus na kanaten pig-iman.
2Pigsulatan ta kaw na pigsiling ku na kanak tengteng iseꞌ kay migsambuk da kita dun ni pagpangintu-u kan Jisus.
Padatengen galu kanmu ya grasya aw kallat aw kalinaw na lyumekat adti Tyumanem na yan ya Ama aw adti kan Kristu Jisus na kanaten Matas na Pangulu.
Ya pagpakatanaw sa manga magpalna-uway na galu-un
3Idtu muna sa pagpanaw ku pasinan adti probinsiya na Macédoniya, migsekat aku kanmu na magpatagak pa kaw dun ni syudad na Épéso. Aw adun, salutun ku ya paglong kanmu na padelegen mu ya kanmu imo-unun dun. Kay awun manga utaw na migpalna-u sa sangkamuluꞌ, yanagaw ikaw ya maglong kanilan na patenengen nilan ya maynan na palna-u. 4Aw paglonga uman silan na diliꞌ nilan pagsapadan ya kanilan udas adti manga kasampetanen na pig-imo-imoꞌ idtu pa muna na manga mangkatikadeng aw sa tultulanen na walaꞌ ya katigkasan, kay yeiy baling ya du-an na awun pag-ayil. Aw diliꞌ yeiy makatabang sa manga utaw sa pagdalug sa palpa na Tyumanem, kay ya pagka-edeꞌ aw ya pagdalug sa palpa nan magi saba oloꞌ dun ni kanaten pagpangintu-u. 5Yan ya du-an na pigpalna-u ku yeiy kay kaliman ku na ya kadég mayu na mangintu-uway tengteng maggaginawa͡ay. Aw mabatug ya paggaginawa͡ay yeiy kun malinis ya kamayu anenganeng, aw kun kya-ede-an mayu na walaꞌ ya nya-imoꞌ mayu na malatay adti Tyumanem, aw kun ya pagpangintu-u mayu kanan walaꞌ ya pagtallalingu. 6Manang awun eped na manga utaw dun ni kamayu na walaꞌ da nilan daluga ya maynan na anenganeng. Pigsapadan nilan baling ya kanilan manga allaw dun ni pagbalawbalaw sa walaꞌ ya un ma-untung. 7Yan ya kaliman nilan ya ma-imoꞌ magpalna-uway sa Uldin na Tyumanem. Manang walaꞌ nilan kalabeti kun unu ya pigpalna-u nilan pangkay gayed silan gyumelgel adti asdangan na manga mangintu-uway na matinaw kunu ya kanilan palna-u.
8Na, kya-ede-an da tadun na madyaw ya Uldin na Tyumanem kun umbaꞌ ya paggamit na manga utaw. 9Kay kya-ede-an tadun na ya Uldin walaꞌ imo-a sa manga utaw na walaꞌ ya salaꞌ. Yan baling ya pig-imo-an sa Uldin ya manga mig-imoꞌ sa malatay aw manga utaw na walaꞌ dalug sa bala-ud na migdumala kanilan. Pig-imoꞌ saba ya Uldin sa manga utaw na walaꞌ ya pagkallek sa Tyumanem aw sa manga makasasalaꞌ, aw sa manga utaw na walaꞌ pamasa sa Tyumanem aw miglong sa malat adti kanan, aw sa manga utaw na migpatay sa eped na utaw pangkay kanilan ama aw ina. 10Aw ya Uldin pig-imoꞌ uman sa manga magkasala-enen, aw sa manga migkakalimay na tumalag eseg, aw sa manga magpandampas sa utaw, aw sa manga galu-un, aw sa manga migmatinaw sa galuꞌ adti asdangan na mag-ukumay, aw adti pangkay singalan na nyatu sa matinaw na palna-u na Tyumanem. 11Pigpalna-u ku yeiy magi sa Madyaw na Ubat-ubat sa kadyawan na Tyumanem na umbaꞌ deyen. Aw yeiy ya palna-u na pigtaligu nan kanak na un ku ubat-ubat adti manga utaw.
Ya pagpasalamat asuntu sa kallat na Tyumanem
12Migpasalamat aku kan Kristu Jisus na kanaten Matas na Pangulu na nyatag kanaken sa kabagseg pada mabatug ku ya manga imo-unun nan. Kay adti kanan kasaligan aku, yanagaw asuntu sa kallat nan kanak, pigtaliguwan aku nan sa manga imo-unun, 13pangkay idtu muna piglongan ku na malatay ya ngalan ni Jisus. Pigpamulayaman ku uman ya manga mangintu-uway aw pigmulamula ku silan. Manang pigkallatan aku nan baling, asuntu na walaꞌ pa aku pangintu-u kanan aw walaꞌ ku uman ka-ede-i na malat kadiꞌ ya pig-imoꞌ ku. 14Dakulaꞌ to-o ya kallat nan kanak, yanagaw nyabatug ku ya pagpangintu-u aw ya pagginawa kanan aw sa eped na manga utaw. Ma-imoꞌ tadun ya maynan kay nyakasambuk da kitadun kan Kristu.
15Na, ya un ku paglungon tengteng yeiy matinaw aw umbaꞌ pangintu-uwan na kadég na utaw: Nyadi si Kristu Jisus asini tas na lupaꞌ pada magpaluwaꞌ sa manga utaw na makasasalaꞌ. Aw aku ya to-o makasasalaꞌ sa kadég. 16Manang yeiy saba ya du-an na kyallatan aku nan, pada kita-en ya pagtagen ni Kristu Jisus sa kadaman nan adi kanak, pangkay aku ya to-o makasasalaꞌ. Aw yanagaw nya-imoꞌ aku pundinganan adti kadég na manga utaw na un mangintu-u kanan aw makatagtun sa ginawa na walaꞌ ya katigkasan.
17Naten basa͡an ya Tyumanem aw deyen sakanan na walaꞌ ya tyamanan! Yeiy ya Hariꞌ na walaꞌ ya lyekatan aw walaꞌ uman ya tyamanan. Diliꞌ sakanan magkamatay aw diliꞌ sakanan pagkita-en. Sambuk da oloꞌ ya Tyumanem. Amén.
18Na, kay Timotiyo na pigsiling ku na kanak iseꞌ, ini ya palna-u ku kanmu: Betangan adti anenganeng mu ya pigpa-edeꞌ na propita idtu muna sa un pa-imoꞌ kanmu na Tyumanem na yeiy ya magpakabagseg sa kanmu ginawa dun ni pag-atu sa malatay. 19Pakatanawi ya pagpangintu-u mu kan Kristu, aw pagbetangan gayed adti kanmu ginawa na walaꞌ ya ma-imoꞌ mu na malatay adti Tyumanem. Kay awun manga eped dun ni kamayu na pangkay kya-ede-an nilan ya madyaw imo-un manang pig-imoꞌ nilan baling ya malatay, yanagaw migkalat ya kanilan pagpangintu-u. 20Kasiling ni Himéniyo aw si Aléjandro na pigtumbay da ku adti kan Satanas magi sa kanak paglong na diliꞌ da silan paseleden adti katipun na manga mangintu-uway, yanagaw patenengen da nilan ya paglong sa malatay adti Tyumanem.
Currently Selected:
1 Timotiyo 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
