Hôsea 1
1
1Ny teny izay nampitain’ny TOMPO tamin’i Hôsea zanakalahin’i Beerỳ tamin’ny andron’i Hozià sy i Jôtama sy i Ahaza ary i Hezekià mpanjakan’i Joda, sy tamin’ny andron’i Jerôbohama zanakalahin’i Jôasy sady mpanjakan’i Israely#1.1 I Israely raha ampitahaina amin’i Joda eto dia manondro ny fanjakana israelita avaratra izay naorin’i Jerôbohama I taorian’ny nahafatesan’i Salômôna (jereo 1 Mp 12.16-20). Ny mpanjaka Jerôbohama voalaza eto dia ny mitondra ny laharana faha-II izay nanjaka tamin’i Israely tamin’ny 787 ka hatramin’ny 747 tal J.K. (Jereo 2 Mp 14.23-29.) –Hozià: jereo nta amin’ny Ham 1.1. –Jôtama: 2 Mp 15.32-38; 2 Tan 27.1-3, 7-9. –Ahaza: 2 Mp 16.1-20; 2 Tan 28.1-27. –Hezekià: 2 Mp 18-20; 2 Tan 29-32..
Ny vady aman-janak’i Hôsea
2Fony nanomboka niteny tamin’ny alalan’i Hôsea ny TOMPO, dia nanao taminy hoe:
«Mandehana maka vady mpivarotena tokoa
sy zanaka avy amin’ny fivarotan-tenany;
fa ny mivarotena#1.2. Ny andriamanitra Bahala* sy ny andriamanibavy Hastôreta* izay nivavahan’ny Kanahanita sy ny Israelita maro niara-belona tamin’i Hôsea, dia ninoana ho mampahavokatra ny tany sy mampiteraka be dia be ny biby fiompy na ny olona koa (jereo 2.7). Ny fanompoam-pivavahana izay atao ho fanomezam-boninahitra azy ireo dia nisy fombam-pivavahana fivarotan-tena (jereo 4.12-14). miala amin’ny TOMPO
no ataon’ny mponina eto amin’ny tany.»
3Dia nandeha naka an’i Gômera zanakavavin’i Diblaîma i Hôsea; ary nitoe-jaza taminy ravehivavy ka niteraka zazalahy. 4Dia hoy ny TOMPO tamin’i Hôsea:
«Ataovy hoe Jizrehèla ny anarany,
satria tsy ho ela ny hanafaizako
ny taranak’i Jehò
noho ny ra latsaka tao Jizrehèla#1.4 Teny mampahatsiaro ny fandringanan’i Jehò ny fianakavian’i Ahaba araka ny 2 Mp 9-10. I Jerôbohama II dia isan’ny taranak’i Jehò.;
ary hofaranako
ny fanjakan’ny taranak’i Israely.
5Amin’izany andro izany dia homontsaniko
eo amin’ny lemak’i Jizrehèla
ny herin’i Israely ara-tafika.
6Nitoe-jaza indray i Gômera ka niteraka zazavavy; ary hoy ny TOMPO tamin’i Hôsea:
«Ataovy hoe Lô-Rohamà ny anarany,
satria tsy haneho fitiavana intsony
amin’ny taranak’i Israely Aho;
eny, hotsoahiko aminy tanteraka ny fitiavako.
7Fa hotiaviko kosa ny taranak’i Joda ka hovonjeko. Izaho TOMPO Andriamaniny no hamonjy azy, nefa tsy amin’ny tsipîka na amin’ny sabatra na amin’ny ady, na koa amin’ny soavaly na amin’ny mpitaingin-tsoavaly, fa amin’ny anarako.»
8Rehefa nisara-nono i Lô-Rohamà, dia nitoe-jaza indray i Gômera ka niteraka zazalahy. 9Dia hoy ny TOMPO tamin’i Hôsea:
«Ataovy hoe Lô-Hamỳ ny anarany,
satria tsy vahoakako ianareo,
ary tsinontsinona Aho aminareo.»
Currently Selected:
Hôsea 1: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.