Mark 5
5
Jesu aa miqwa haanphung wang thangwa tha phan aa
(Matthew 8:28–34; Luke 8:26–39)
1Jesu etho ujiphantey tang tha Galilee shitim adak kangko Gerasa mung náng thuta. 2Jesu waqwan wang thalat atho, ashey miq màng bungching wang thalat eq, Jesu jamoq tachong ma thuta. Ethi miq haanmong tho anaan tsija angta. 3Etho piq màng bungching na tong ta. Utang eq tho piq sha janru wang bon eq tho jin shing moq angta; 4Tak daqhan piq sha lo eq janru wang ujak nia jaa o bon eq shing ta; etharin piq aa jak khap nia janru sha chon chakta. Piq sha rapney tarong hal angta, ethi rangma utang eq tho piq sha lo eq jin shing moq angta. 5Rangwung nia rangpal piq ring eq màng bungching etho haqkan na ling qhing chey ta, etho piq ni piq long eq takhan chey ta.
6Jesu amaan sa alo na kachey atho piq aa Jesu tha khita. Etho piq Jesu relnáng jol eq, Jesu jaa relnáng thok bonta, 7Etho rapney jajong aa ring eq bat aa, “Thaji phey wang ajong Shkewa Miqwasa Jesu! Nang iching wang chamlang som ma thuta phu? Nga nang ma Shkewa miing lam eq batphang, nga tsamnang ma nak kophu.” 8Piq aa irimal batta chammatakoi Jesu aa bat sey ta, “Anaan tsija, iri miq haan wang thalat chuwang u!”
9Etho Jesu aa piq thima pitta, “Ba miing chamta miing aa?” Ethi miq they batta, “I miing raa ‘Daqhan’ chammatakoi í raa daqhan ang i.”
10Ethi miq they piq sha phanchak moq ang rangma Jesu ma qhap eq batta.
11Ethi haqkan thina wak tang tha rong qhing chey ta. 12Ethi rangma ethi thangwa tang eq Jesu ma batta, “Í iri wak tang jaktung náng takat phu etho í ri wak haanmong náng takat phu.” 13Piq aa ning thima ukat angma kota, etho thaji anaan tsija tang tha ethi miq haanmong thiwang thalat eq wak haanmong thináng nopta. Ning thaji sha thajoq ajo hayat ni wak tan rol angta, etho ethi thaji wak tang tha jol eq haqkang kho thiwang shitim thináng qhat eq ngap tita.
14Wak rimtey tang jol eq haq rel wang samhaq etho qhim tang thaji miqtang thima iri raaq raa batta. Miqtang esha siin rangma ethi náng thuta. 15Etho ning baluk o Jesu relnáng thuta, ning ethi thangwa tang nopta miq tha piq jamoq daqhal thun tong aa tha khita. Piq khat sam eq, jaqhal thung sey ang eq ethina tong ta, esha khi eq ning thaji rapney chota. 16Irina thaji ang aa tha khitey miqtang aa thangwa tang nopta miq etho thaji wak tang chamal angta ethi tang tha adak miqtang ma batta.
17Esha tat eq ethi thaji miqtang they Jesu ma ethi mung sha shingchak eq jol chuwang rangma batta.
18Jesu waqwan thináng tun qhung ma ang atho, bari miq haan na thangwa tang angta, piq aa batta, “Nga ri bajam o kat ma kophu!”
19Etharin piq tha sol ma nuk moq angta. Tongnil kowang Jesu aa piq thima thong batta, “Nang ba himtey tang jamnáng ka u, etho Teyhungwa ba rangma chamlang somta etho nang ma chamtan tinshit ta phu shi ning thima bat u.”
20Etho ethi miq they Decapolis#5:20 Decapolis ta asi samhaq tang náng ka eq Jesu aa piq ma chamlang somta tha miqtang thima batta. Etho piq tung aa raaq tha tat eq thaji miqtang rapney rong patja ta.
Jairus sa miqnu etho miqnu ashey bara Jesu khat bal lo aa
(Matthew 9:18–26; Luke 8:40–56)
21Etho Jesu waqwan náng tun tong eq shitim adak kang konáng kata. Piq tha siin eq daqhan miqtang shitim kang thina thajoq ta. 22Eshina Jairus ta miing aa solwa angta, bara synagogue ajong miq wang ashey angta, etho piq aa baluk o Jesu tha khita, piq ka eq Jesu jaa rel thina bon kata, 23etho unong chu eq batta, “Isa nijang miqnu rapney tak aa etho piq utik koko sey mal hun. Tinshit wang nang thu eq bajak uhaan o shing tu jo piq tak sha uqhal angna etho piq ulun angna!”
24Etho Jesu piq jamoq kata etho daqhan miqtang rong tathum jang eq piq jamoq kata.
25Ethina ashey miqnu angta bara pang asi pang ni wang rapney jashit hal tahi tha janchey roq angta, 26piq aa daqhan ataksa siintey tang ma tho takhi eq ta, etharin piq taksa tha qhal moq angta. Piq aa uqhal angma thaji ngin tha thawan ta etharin piq taksa tha chan chey roq angta. 27Piq aa Jesu raaq tat ta, ethi rangma piq miqtang jiko wang thu eq etho Jesu khat bal o tatit ta. 28Piq tinmong tho tathinta, “Nga ukhat bal sho chen tatit ang jo tho nga uqhal ang náng.”
29Kalo hun piq tahi jan aa tha tatáng ta; etho piq tak tha uqhal angta ta piq aa tho usam eq ta. 30Kalo hun uching kowang tarong tha thalatta ta Jesu aa usam eq ta, ethi rangma piq jiko náng ngik lang eq miqtang chingko thináng siin eq pitta, “Utang eq ikhat bal tatit ta?”
31Ujiphantey tang aa thawel batta, “Nang aa siin u, itan daqhan miqtang chamal eq tathum jang aa, ira ang eq tho nang aa chamal raaq pit u, ‘Utang eq nga thak lota ta?’”
32Etharin, Jesu ngik lang eq utang eq irimal tatitta ta siin chey ta. 33Etho ethi miqnu they piq jamoq chamlang angta tha usam eq ta, piq rapney cho wang mo eq Jesu rel thináng thu eq, ujaa rel o bon eq piq ma asing wang thaji raaq tang tha bat kota. 34Jesu aa piq thima batta, “Isa miqnu, bakam wang nang qhaltu. Nungmay eq ka u, ba taksa tha uqhal sey angta.”
35Jesu aa ethi raaq tha batchey atho, Jairus him wang thoksil tattey tang thu eq Jairus ma batta, “Basa miqnu utik angta. Thanga tatalteywa chamlang ma paklak nu?”
36Jesu aa ning raaq tha tat eq Jairus thoksil tattey tang ma batta, “Nak cho inn, tin o kam shing inn.” 37Ethi jio, piq aa thaji miqtang tha táng thalang eq Peter, James etho uno John sha ujamoq sol eq kata. 38Ning Jairus him thináng thu eq miqtang thaji uqhap, uring etho rapney tintashit eq ang aa tha khita. 39Piq ka eq ning thima batta, “Chamma nim thaji irimal ang inn? Chamma nim khap inn? Iri nijangsa raa ti moq; piq ujib ang aa!”
40Esha tat eq thaji miqtang ungit ang chey ta, ethi rangma piq aa thaji miqtang tha hang náng takat ta, etho Jesu aa ethi nijangsa nu nia wa etho ujiphantey atom tha sol eq nijangsa rel thináng kata. 41Piq aa nijangsa jak tho lo eq batta, “Talitha kumi” ta “Nijang miqnusa, nga batphang, shat u!”
42Kalo hun ethi nijangsa tha shat eq phang qhingta. Piq pang tha pang asi pang ni angta. Esha siin eq ning thaji patja angta. 43Etharin utang ma tho iri raaq raa bat moq angma Jesu aa ning thaji ma raaqkhat kota, etho piq aa ning ma batta, “Piq ma phaksat ma kot inn.”
Currently Selected:
Mark 5: Muklom
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
