Migani 6
6
Okucîhâna cikinja
1Mwâna wâni, omunyâge ecirondo bulyâla acîhânyire ncungura oku w’ihanga, na kuli oyu orhamanyiri omuhûnekwoye ecikinja.
2erhi ankabà wacîshwêsire n’ebinwa waderhaga wêne, erhi ankabà wagwâsirwe omu binwa byâwe wênene;
3alaga oku wajira mwâna wâni: ocirikûze, obwôla wacîhanyire omu nfune z’omulungu#6, 3 Sinza Vulgata: nk’omuntu analire omwenda gwa bene, anagujuhe duba, ciru bwankayira.: onakanye otule omulungu wâwe,
4amasù gâwe orhagahaga irò, n’engohe zâwe orhazirhamûlaga.
5Ocîrikûze nka kashafu omu murhego, nka kulya akanyunyi kafulumuka omu lusî.
Omwôlo n’ebinyegere
6Genda olole ebinyegere oyu mwôlo! Sinza engeso zâbyo, oyigirekwo oburhimanya:
7hirhajira murhambo, birhajira mulezi, birhajira obiyimangire omu mukolo.
8Cânda birheganya ebiryo byabyo, n’amango g’okusârûla lyo bihaka olwîko lwâbyo.
9Oyu mwôlo-mwôlo wêki, ogwîshîre kuhika mangaci? Mangaci warhengamwo eri irô lyâwe?
10Mpu: «warhangihûnga hitya», mpu: «warhangibâ nka wahira olugobe oku lundi », mpu: «warhangibâ nka waheba okuboko oku kwâbo ocîhêngeke!»
11Oku obuligo bwahanda aha mwâwe nka mubalama, n’ecizômbo cikutulisirekwo amatumu!
Endyâlya erhamera ngohe
12Endyâlya#6, 12 Endyâlya erhamera ngohe: «endyâlya erhagania goshhi erhacîkubagirwa bulya arhali muntu nkana»., muntu wa busha! egenda ehengwîre akanwa wâni!
13eje yagohya gohya erhânayimusa kugulu, enabulija yashâsa eminwe!
14Murhima mugalu-galu ogurhahiga agarhali maligo, gurhanahwa gurhâzûsa mmanja.
15Kuhera gwânâhere buzira kulâlira, gurhibuke gurhakanabukwa.
Ebikabulirwa
16Ebi Nyakasane ashomba biri ndarhu, n’ebi omurhima gwâge gurhabonakwo biri nda:
17Amasù gw’omuntu ogayana, olulimi lw’omunywesi enfune zibulaga omukô gw’omuntu mwêru-kwêru;
18Omurhima guhizire emihigo mibî, amagulu gakanyize mpu gajikola amaligo:
19Omuhamîrizi wahamîriza obunywesi, na cishombanya washombanya abaguma.
Amahano gw’omuzîre mushamuka
20Mwâna wâni, kazi olange amahano ga sho, orhanarhibaga amahano ga nyoko.
21Okaziyôrha ogasêgìze oku murhima, okazigayambalira omu igosi.
22Gakazikuhabûla omu njira zâwe, gakuyimangire amango oli irô, gakuganîze amango watulûka.
23Bulyâla irhegeko kabà kamole, n’enyigîrizo bubà bumoleke; okukalihirwa n’okuyigîrizibwa eri njira ya kalamo#6, 23 Okayumva mpu mwene lebè ayengeha, erhi ajira ecibwîriza. .
24Kuderha mpu bakulange oku mukazi w’ecirala, n’oku lubohôlolo lw’omukazi mugenzi.
25Omurhima gwâwe gurhâgalagwa n’iranga lyâge, omanye wankarhebwa n’okukoma-komya kw’engohe zâge.
26Bulyâla omukazi w’ecishungu#6, 26 Nka kula rhunaderha omu mashi, mpu: omukazi mugenzi ye «tulye twende» gwârhi abazihi b’akashâra, kukenya akenya ocîrhegaye. Mukà-bene acirigi mudârhi kulusha. hihimbi hya mugati alonza, mukà bene yêhe kunyaga anyaga omuntu akalamo, n’obwo kali ka citwîro cidârhi.
27K’omuntu ankayâkiza (kufulika) omuliro oku nda, n’emishangi ayâmbirhe ebule bwabôyôka?
28K’omuntu ankalabarha oku màsèsè anabule bwahîra omu lushando?
29Kwo abâ ntyo omuntu oyiguza mukà owâbo, owamâhumakwo mukà bene arhayêra.
30Omuntu ozimbira enda nk’ashalisire, arhatumuzibwa.
31Ci kwône akagwârhwa, anagalule kali nda kalushire, ciru ahâne n’ebiri omu mwâge byoshi.
32Omuntu wâhusha yêhe eri mbula-murhima, ôkola ebiri ntyo erhi mûhera.
33Gucîlerhere empîmbo n’amasheka, n’ishêmbo gucîhira-kwo ntyo, lirharhenga.
34Bulyâla emitula n’obukali bw’ibà wa nyamukazi, birhamuzigira ababalira ahâli h’okocîhôla.
35Arhâyêmêre ciru empongano nguma, arhâyêmêre bici ciru bakaluza empyûlo.
Mashi Bible © BUKAVU Archdiocese of Bukavu, 2024.