Mibalè 23
23
Balâmu agisha bene Israheli
1Balâmu abwîra Balaka, erhi: «Onyûbakirage hano mpêrero nda, onanteganyize mpanzi nda hano na ngandabuzi nda.» 2Balaka anacijira nk’okwo Balâmu anamuhûnaga. Anacirherekêra empanzi n’engandabuzi oku ngasi luhêrero. 3Balâmu anacibwîra Balaka, erhi: «Yimanga hôfi n’eyi nterekêro yâwe okunacîyegûla hitya; hali amango Nyamubâho akambugâna. Ebi akanyêreka byo nâni nakanakumanyisa.» Anacikanya ajà oku hirhondo hirhalikwo cici.
Obulêbi bwa Balâmu
4Nyamuzinda anacishimânana na Balâmu; naye anacimubwîra, erhi: «Nayûbasirage mpêrero nda, na kuli ngasi luhêrero najirîrekwo enterekêro y’empanzi n’engandabuzi». 5Nyamubâho anacihira ecinwa omu kanwa ka Balâmu, anacimubwîra, erhi: «Oshubirage emunda Balaka ali, ntyo kwo waderha.» 6Balâmu anacishubira emunda ali ashimâna anaciyimanzire aha nterekêro yâge, yo n’abaluzi ba Mowabu boshi. 7Anaciderha binôla binwa, erhi:
«Balaka anacintenza e Arami,
Omwâmi w’e Mowabu anantenzize
omu birhondo by’e Buzûka-zûba,
ampûna erhi: Oyîshe ompehêrerere Yakôbo!
Oyîshe ofûhire Israheli!»
8«Kurhigi nankahehêrera, amango Nyamuzinda arhahehêriri?»
Kurhigi nankafûha, amango Nyamuzinda arhafûha?
9Bulya, kurhenga okw’irhwêrhwè ly’aga mabuye namamubona.
Kurhenga okw’irhwêrhwè ly’orhurhondo, namamulolêreza.
Luli lubaga luyûbasire hâgo hâgo, lurhankanaja oku mubalè gw’agandi mashanja.
10Ndi wankaganja entuliri ya Yakôbo,
ndi wankaberûla enkûmo y’Israheli?
Mbofa nk’abashinganyanya,
n’akalamo kâni kaboyûrha aka akâbo!
11Balaka anacibwîra Balâmu, erhi: «Kwo kurhi oku wamanjirira? Nakurhôlaga nti ohehêrere abashombanyi bâni, lêro wêhe kwamaba kubagisha». 12Balâmu ashuza, erhi: «Ka ntagwâsirwi nderhe kulya Nyamubâho anahizire omu kanwa kâni?» 13Balaka anacimubwîra, erhi: «Nkulikiraga ahandi hantu. Olu lubaga wabona ntya, olubwîne lunda luguma, ci orhalubwini lwoshi. Olumpehehêrere lêro aho». 14Amujâna ebw’Ishamba ly’Abalâlîzi, okw’irhwêrhwè ly’entondo ya Pisga; ayûbakakwo mpêrero nda, kuli ngasi luguma arherekerêrakwo mpanzi nguma na ngandabuzi nguma. 15Balâmu anacibwîra Balaka, erhi: « Obêre hôfi n’eyîra nterekêro yâwe nâni nkola nagendirinda.» 16Nyamubâho anacishimâna Balâmu, anacimuhira ecinwa omu kanwa kâge, anacimubwîra, erhi: «Oshubire emunda Balaka ali, ogendimubwîra ebi binwa.» 17Anacishubira emunda Balaka ali ayîmanzire hôfi n’enterekêro yâge n’abaluzi b’e Mowabu banali boshi naye. Balaka anacimudôsa erhi: «Kurhi Nyamubâho anadesirage?» 18Kandi Balâmu anaciderha ebi binwa, erhi:
«Yimuka Balaka, onayumve,
ntega okurhwiri, mwene Sipori».
19Nyamuzinda arhabà muntu okazinywerha
arhali mwene Adamu okazicîyunjuza.
Ka ye oderha kône arhanajire cici?
Ka ye oderha akanwa karhanabè kulya anaderhaga?
20Nahâbirwe irhegeko ly’okugisha;
nagisha, ntanaciyunjuze.
21Ntabwîni bubî buci muli Yakôbo.
Ntabwîni ntanya nci muli Israheli.
Nyamubâho Nyamuzinda wâge ali naye,
aha mwâge wanayumva ecihôgêro c’aha bwâmi.
22Nyamuzinda wamukulaga e Mîsiri,
emisî yâge eri ya mbogo.
23Bulya ntà bulozi bwankadunda Yakôbo
na ntà bulaguzi bwankahasha Israheli.
Ciru akabà Yakôbo na Israheli banabwirwe mpu:
«Kurhi oku Nyamuzinda ajira?»
24Lolà olubaga lwacinânûla nka ntale nkazi,
lwamacûka nka ntale ndume;
erhahunga erhanacishanshanyula nsimba yayo,
n’okunywa omukò gw’ebi yanigaga.
25Balaka abwîra Balâmu, erhi: «Olekage okubahehêrera, ci kwône orhabagishaga.» 26Balâmu ashuza Balaka, erhi: «Ka ntakubwizire oku najira oku Nyamuzinda anadesire kwoshi?» 27Balaka anacibwîra Balâmu, erhi: «Kanyagya nkuheke ahandi hantu. Nkaba aho hanasîmîsa Nyamuzinda, akuyêmêrere obampehêrerere». 28Balaka anacijâna Balâmu oku ntondo ya Peyori, ebonekîne omw’irungu lyoshi. 29Balâmu anacibwîra Balaka, erhi: «Onyûbakire aha mpêrero nda, onanteganyize aha mpanzi nda na ngandabuzi nda.» 30Balaka anacijira nk’oku Balâmu anamubwîraga, arherekêra empanzi n’engandabuzi oku ngasi luhêrero.
Mashi Bible © BUKAVU Archdiocese of Bukavu, 2024.