Uamusi 18
18
Mika na bandu bi likabila la Dani
1Masoba gegala ngasejwakabii bambu nkolongu mu nndema uku Izilaeli. Ndi likabila la Dani labia litaputa lieneu labu lukutama beni, ndaba mpaka muda wehogu babia ngasebaabaguli pandu pabu beni kati ja makabila guku Izilaeli. 2Ndipala bandu bi likabila laka Dani bahagula bandu nhwanu bana makili kuhuma ku Eshitaoli na Sola na kwaalagalaki ajenda kulaluki kwa sili nndema. Bandu haba bapita kila mukibeleku silikabila la Dani bahika mu nndema ututombi uku Efulaimu, munyumba jaka Mika, nukugone homu ikilu jela. 3Pababia pambipi na nyumba jaka Mika bijimanya Sauti juku nndawi jola. Bupwata nukunndaluki, “Nya jojuguletiki kongone? Gubii ni lihengu boo kongone?”
4Jombi jwaajibwa, “Mika jujetangini na nepani junepa lupija mia nunngolu waki.”
5Nabombi bumpwagila, “Gupepa koku gutulalukia kwaka Sapanga ana sapwali jitu mbaka jikubi jaamboni.”
6Nngolu jola jwaapwagila, “Nzenda kulukwali Bambu Sapanga junzangatiya mwanganya mu sapwali jinu jibiya jaamboni.”
7Ndi bandu nhwanu haba baboka, nukuhika ku Laishi. Baabona bandu bababia atama kola, na namuna hebabia atemi kulukwali ngati bandu buku Sidoni. Babia bandu banga kukupala kukomana na banga na wasiwasi na ngasebapongukewa maitaji gokapi. Babia kutali na bandu buku Sidoni na ngaseapai kutama na bandu bangi.
8Ndi bandu babapiti kulaluki nndema bala bakelabuka kwaka alongu babu ku Sola kola, nuku Eshitaoli na alongu babu baalalukia, “Mutuleti lijambu bole?” 9Bombi bapwaga nzumukania, “Tujendaniya tukugulapula nndema hogu. Tugubweni nndema hogu, sakaka ndi ndema gogunyambiki kulema nukupugi. Boo, mwitama pamba pee sanga kuhenga sindo? Mwikabaki kukwela kujenda kuguhenga nndema hogu gubiya gwitu. 10Pamwihika kola mwaaketania bandu banga kuba na wasiwasi jokapi. Nndema hogu ndi nkolongu nu gubii na kila sindu na Sapanga jujibei mu maboku gitu.”
11Ndi bandu mia sita bi likabila laka Dani koni abi na hindu yabu yukukomane ngondu baboka kuhuma ku Sola nuku Eshitaoli nukujenda kukomana ngondu. 12Bajenda kubeka kambi jabu ku Kiliati Yealimu mu nndema uku Yuda. Ndi mana pandu pala upandi golijingi lyoba uku Kiliati Yealimu bapakema Mahane Dani mbaka lelenu. 13Kuhuma hoku bajenda ku nndema gogubii nu tutombi ku Efulaimu nu kuhika ku nyumba jaka Mika.
14Bandu nhwanu bala babapiti kulaluki majambu mu nndema uku Laishi baapwagila alongu babu, “Boo, mmanyiki nyumba jimu kati ja haye jibii ni kizibau, imong'umong'u isokusoku yu nyumba ni kimong'umong'u sukubasa nu kumamatika madini ga feza? Henu nhwasalia semwihenga.” 15Ndi bandu nhwanu bala bababia alaluki majambu gunndema bajenda ku nyumba jaka Mika nukujingi nkati nukulaluki majambu guku nkombu nndawi jola. 16Kipindi sesela bandu mia sita bala bi likabila la Dani koni abii na hindu yabu yukukomane ngondu bajema pilitanga la musi. 17Bandu nhwanu bala babajenda kulaluki majambu gupunndema bala bajingala nkati, bajukua kimong'umong'u yukubasa ni kizibau sela ni imong'ong'u ikisapanga. Kipindi sesela nngolu jola jwabia jujemi punndiyangu pamu na bandu mia sita bala baabii na hindu yukukomane ngondu.
18Kipindi nngolu hoju pajaabona bandu bala ajingi mu nyumba jaka Mika, nukujuku kimong'umong'u sukubasa na seamamatiki madini ga feza ni kizibau ni imong'umong'u yengi, jaalaluki, “Nhenga kike?”
19Nabombi bumpwagila, “Tumbala na gupunga nndomu waku, gujenda pamu natwepani gubia gungolu witu na ngati mundu ukutupeke mawasu witu au gubona boo kupalika kwaku kuba nngolu waka mundu jumu au kuba nngolu wi likabila loti la Aizilaeli?” 20Nngolu jola jwatoguli ngamaa, jwajukua kizibau sela ni kimong'umong'u ikisapanga sela ni imong'umong'u yengi sukubasa.
21Ndi batumbulia sapwali jabu koni alonguki bana babu ni mipugu na mali gabu. 22Pababia ahikiki kutali kidogu kuhuma kunyumba jaka Mika, Mika jamanya hindu yaki atei kujuku, ndienu jaakema bandu baki baatamika pambipi na Mika bakusanyika pamu, na kwaakagu bandu bi likabila laka Dani na batenda kwaaketane. 23Ndi baapegila keleli, nabombi bandu bilikabila la Dani batenda kung'anambuka nu kunndaluki Mika, “Gubii na sindu boo, mbaka gutupwatiki pamu ni likundi loti heli.”
24Mika jwapwaga, “Mwanganya nzukwii isapanga yangu yenililenganaki kabee munzukwi nu nngolu wangu na ngasenneki sokape. Henu nhwesa boo, kunaluki mi na sindu bole?” 25Bandu bi likabila laka Dani bumpwagila, “Nambanga gutami kinunu ana ngahela ajitu baabi ni inyela awesa kugutukali nawehapa guwesa kuhoa womi waku na womi waalongu baku.” 26Mika pajwabona bumpetiki makili jwatenda kung'anambuka nukubuja kunyumba na bandu bi likabila la Dani batenda kuyetuana.
27Bandu bi likabila la Dani bala biijukua hindu yela yejwabia Mika juilenganaki, bunzukua nu nngolu waki jojwabia jutenda kunhudumi. Ndi bajenda bandu ba musi uku Laishi baalapula na kwaakoma bandu bababia atama mola sulukwali na sanga kujogopa nu kugutini musi we hogu kwa mwotu. 28Bandu ba musi hogu ngasebabia na mundu jwakwaahoko ndaba babia kutali na musi uku Sidoni, kabee ngasebajongini na bandu bangi. Musi hogu wabi mu ligomba luku Beti Lehobu. Bandu bi likabila la Dani buusenga kabee nu kutama momu. 29Bang'anambua liina la musi hogu nu kuukema Dani, kulengana ni liina la ahoku babu jojwabia mwana waka Izilaeli yani Yakobu. Lakini musi wehogu pu utumbuli bugukemika Laishi. 30Bandu bi likabila laka Dani bijijemika sanamu jukubasa jela, najombi Yonasani mwana waka Gelishomu mwana waka Musa jwabia nngolu wabu. Alongu babu kabee babia agolu bi likabila la Dani mbaka bandu bunndema hogu pabaapelika kuluhamila. 31Kipindi soti Nyumba jaka Sapanga pajabia ku Shilo, bandu bi likabila la Dani bikilumbalia kimong'umong'u sukubasa sesuse jalenganakia Mika.
Currently Selected:
Uamusi 18: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
