Kukomboka 15
15
Saka Sukupomulela
Alawi 25:1-7
1“Kila mwisu wa saka sa saba mwaalekakiya boti bamwaalaja. 2Mwiihenga ana, kila jumu winu jojunkopisi nzilani waki, jiliputa lideni heli, wala jilenga kundaja ndaba Bambu Sapanga mweni juamwii lideni heli liputika. 3Nhwesa kwaalaja ageni, lakini madeni goti gaalongu binu Aizilaeli mwagaputa.
4“Bambu Sapanga, Sapanga winu jwiitenda kumpenge mu nndema gojumpekee gubia mali ginu. Nga hata jumu jojibiya kapuku pikilanda jino, 5ila pe mwampwata Bambu Sapanga, Sapanga winu, sukupwata mihilu jenumpeke lelenu. 6Bambu Sapanga, Sapanga winu, jampengila ngati ejundagila. Nanamu mwaakopisa bandu bi milema jengi lakini mwanganya ngamwiikopi. Mwaalongusa bandu bi milema jingi, lakini bandu bi milema heji gabanndongosi mwanganya.
7“Kati ja alongu binu anajubii kapuku mu misi ju nndema goguwe Bambu Sapanga jiitenda kumpeke mwiikuba mwabimi mwanzangatiyaje. 8Lakini gubiya wa mboni nu kunkopesa sukupala mwabee sindu sokapi sejukipala. 9Mwilihangalia liwasu libaja lijingi mu mioju jinu, nukulipwagi, ‘Saka sa saba sukulekake madeni kibii pambipi’, wiilangi kuba na mawasu mabaja kuku ndongu waku kapuku nu kusindwa kumpeke sokapi, jombi juwesa kundele Bambu Sapanga kwa ndaba jinu na heli likuba mahakau kwinu. 10Mumpekia nndongu winu kapuku kwiisima sanga kuba ni kihenge mu mwoju, ndaba ja haga, Bambu Sapanga, Sapanga winu, jiitenda kumpenge mu mahengu ginu goti na mu kila sindu senhenga. 11Ndaba anhagu ngakukosa mu nndema jinu, ndienu nunndagalaki, mmbiya ni isima kwa akalongu binu ahagu mu nndema winu.
Hempalika kwaahenge atumwa
Kuboka 21:1-11
12“Ana nndongu waku Nhebulania, mwanalomi au mmbomba, anabundombisi kwaku, jaguhengila lihengu kwa yaka sita, lakini mu saka sa saba, wandekakia. 13Nawe pawandekakia, waanndeka jubuja maboku matopu. 14Wampekia kwa moju ukupala sindu sejugupengi Bambu Sapanga, makondoo au ilebi au divai. 15Nkombuka mwanganya mwabii mwatumwa ku nndema uku Misili na Bambu Sapanga, Sapanga winu, jatenda kunkombo ndi mana mbaka lelenu nundagalaki hela. 16Ila anajugupwagi, ‘Ngamoki kwaku,’ ndaba jugupai wehapa na alongu baku na jupala kutama na wehapa, 17ndienu, wiijukua lukombu nukuhoto mulikutu laki mbaka kisomasoma hesi kijingala mundyangu na jombi jibiya ntumwa waku yaka yoti. Ahelahe wantendila ntumwa waku mmbomba. 18Wala wiibona tabu kunndekake ntumwa waku, ndaba jukutumaki kwa yaka sita kwa nusu ja malepu gagapalika kulepwa atumisi baahenga lihengu. Henga hela na jombi Bambu Sapanga, Sapanga waku jagupengila kwa kila sindu sewihenga.
Ibeleku yukutumbuli ya ng'ombi na makondoo
19“Wampikia Bambu Sapanga, Sapanga waku, ibeleku yoti yukutumbuli mu makundi ga makambaku ga ng'ombi na makondoo. Waihengesa mahengu ng'ombi heyi wala makondoo haga wala wagaseku mangoma. 20Kila saka, wehapa na akalongu baku mwiikula inyama heyi palongi jaka Bambu Sapanga, Sapanga winu, pandu pajapahagwi Bambu Sapanga. 21Ila kinyama hesi anakibii na kasolu jokapi, kikubi kilema au sekisindwa kulinga, au kasolu jokapi ngolongu, wakiipiya kuba litambiku kwaka Bambu Sapanga, Sapanga waku. 22Mwakikula kinyama sa namuna heji anagubii ku musi waku, kabee inyama yoti yeibii sapi na yeibii ipija guwesa kula ngati egukula holoku au kinyama sebikikema mbalapi. 23Lakini wiikula mwai waki, ila pe wagujitala pai ngati masi.”
Currently Selected:
Kukomboka 15: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
