2Samweli 9
9
Daudi na Mefibosheti
1Lisoba limu Daudi jwalalukia, “Boo, jubii lee mundu jokapi jojuigali ku kilongu saka Sauli? Ana jubii mbala nunhengila gaamboni ndaba jaka Yonasani.” 2Kwakabii nu ntumisi wikilongu saka Sauli jobunkema Siba. Siba bunkema jujenda kwaka Daudi. Bambu nkolongu Daudi anndalukia, “Boo, wehapa lee wa Siba?” Najombi jwajibua, “Ena nepani nuntumisi waku Siba.” 3Bambu nkolongu anndalukia, “Boo, nga mundu jokapi jojuigali mu kilongu saka Sauli? Ana jubii mbala nunhengila uamboni waka Sapanga.” Siba jwajibua, “Jubii mwana waka Yonasani, lakini jombi kilema jwa magolu.” 4Bambu nkolongu anndalukia, “Boo, jubii kwako?” Siba anzibua, “Jubii kunyumba kwaka Makili mwana waka Amieli ku Lo Debali.” 5Ndi Bambu nkolongu Daudi jwaatuma bandu, najombi jwaletwa kuhuma kunyumba jaka Makili mwana waka Amieli ku Lo Debali.
6Ndienu, Mefibosheti mwana waka Yonasani jojuwe nsokoo waka Sauli jwajenda kwaka bambu nkolongu Daudi jwaabuka nukupega magoti palongi jaka bambu nkolongu Daudi nu kujinama mbaka pai. Daudi ankema “Mefibosheti.” Najombi jwajibua, “Ena! Nepani nu ntumisi waku.”
7Daudi ampwagila, “Wiijogopa. Nepani naguhengila ga amboni kwa ndaba ja atati baku Yonasani. Matui goti gagabia gaka Sauli ahoku baku niitenda kugukelabuki. Na wehapa masoba goha wiikula pamu na nepani.” 8Mefibosheti japega magoti nukujinama mbaka pai nu kupwaaga, “Nepani nengana pe na jimbwa jejiwii, ndaba jakii gunhenge haga?”
9Ndienu Bambu nkolongu Daudi ankema Siba ntumisi waka Sauli nu kumpwagi, “Mali goti gagabia gaka Sauli na alongu baki numpeki nsokoo waka bambu nkolongu waku. 10Wehapa na bana baku na atumisi baku mwiibia munndeme Mefibosheti na mwiibia munndete ilebi ili nsokoo waka bambu waku jubia na posu masoba goha. Lakini jombi jwiikula pamu na nepani.” Kipindi sehesi Siba jwabia na bana akanalomi komi nu nhwanu na atumisi ishilini.
11Ndienu, Siba ampwagila bambu nkolongu, “Nepani nuntumisi waku niihenga goha kulengana na malagalaki gaku.” Ndienu Mefibosheti jwabia jupata posu jaki pamesa jaka Daudi ngati jumu kati ja bana baka bambu nkolongu. 12Mefibosheti jwabii na mwana nsoku mwanalomi jobunkema Mika. Bandu boti bikilongu saka Siba babia atumisi baka Mefibosheti. 13Henu Mefibosheti jojwabii julemii magolu gaki goha jwabia jutama ku musi uku Yelusalemu nu kupata posu jaki pamesa jaka bambu nkolongu masoba goti.
Currently Selected:
2Samweli 9: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
