2Samweli 7
7
Malagalaki gaka Sapanga kwaka Daudi
17:1-15
1Bambu nkolongu pajabiya jutama mu lijumba laki likibambu, najwombi Bambu Sapanga anhwesisa kuba nu lukwali na abaja baki boti kila upandi, 2bambu nkolongu Daudi ampwagila nndota Natani, “Linga hoti nepani ndama mu nyumba jeasengiki kwi mikongu ji mielezi lakini Lisanduku laka Bambu Sapanga litama mu lihema.” 3Natani ampwagila bambu nkolongu, “Jenda ukahenga lokapi leguwasali mu mwoju waku ndaba Bambu Sapanga jubii pamu na wehapa.” 4Lakini ikilu ajelajela lilobi laka Bambu Sapanga lunhikila Natani, 5“Jenda ukumpwagila ntumisi wangu Daudi, ‘Bambu Sapanga jupwaga ana, boo, wehapa le wiinzengila nyumba jukutama? 6Ngase ndemi nkati ja nyumba toka lisoba le naaleta Aizilaeli kuhuma ku Misili mbaka lelenu. Nyendiki kila pandu koni ndama mu lihema. 7Boo, kila pandu panyendiki pamu na Aizilaeli boti, nunndalukiya, jubii mundu jokapi juku Izilaeli jonunndagalaki jwaatunza bandu buku Izilaeli, ndaba jaki ngasejunzengi nyumba ji mikongu ji mielezi?’”
8Henu gumpwagila ntumisi wangu Daudi, Bambu Sapanga jojubii na makili jupwaga ana, nugupia kukiholi kowabia gulima makondo ili gubia ukilongosi wa bandu bangu ku Izilaeli. 9Tumbuka kipindi sehesi mii nawehapa kokapi kogujenda na naakomiki abaja baku boha palongi jako. Naguhenga kuba wa mundu nkolongu ngati eabii akolongu bangi munndema. 10Nanepani nahagulia bandu bangu Aizilaeli pandu pukutama, naabeka ili atama pandu pabu beni, biisumbuka kabee. Bandu abaja baatumi makili nga baang'alisi kabete ngati pa mwande, 11tumbuka panahagula bandu bukwatemu bandu bangu Aizilaeli, nepani niitenda kugulenda abaja baku boti ngabaguwese. “ ‘Kabee nepani Bamba Sapanga nugupwagi nagusengila nyumba. 12Masoba gaku pa giitimia na pawiikuwa nu kutagwa mumatenge ga baatagiki akatati baku nanhenga jumu jwa bana baku wamweti jubia bambu nkolongu nanepani naguhenga ubambu waki gubia na makili. 13Jwombi ndi jojwiisenga nyumba kwa ndaba ji liina lango ni kiteu su ubambu waki nakibeka kibia na makili yaka yanga na mwisu. 14Nepani niibia atati baki, najombi jwiibia mwanango. Ana juhengiki kihakau nampekia azabu, ngati bandu hebaalapu bana babu kwi iboku. 15Lakini nganumboke upali wangu ngati henumbokila Sauli jonummboa palongi jaku. 16Lukolu lwaku nu ubambu ukolongu waku wiibia nganganganga masoba goti. Kiteu saku su ubambu kiibia nganganganga masoba goti ganga na mwisu.’ ” 17Natani ampwagila Daudi kila sindu seanhyekuliwi Sapanga.
Daudi juloba su kunsengu Sapanga
1Majambu gi Ipindi 17:16-27
18Ndi bambu nkolongu Daudi jwajingala nkati nukutama palongi jaka Bambu Sapanga nukuloba ana, “Nepani nanya mwaa Bambu Sapanga na alongu bangu ndi kii mbaka gungweiki mbaka pamii lelenu? 19Kabee lijambu leni labii lisoku pe pamiu jaku, Bambu Sapanga pamu na haga waalagii alongu bangu majambu makolongu mu yaka ingi yeihika na gunhwesisi kugabona, mwaa Bambu Sapanga. 20Nugupwagila kii kabete, nepani Daudi ntumisi waku? Ndaba wehapa gumanyiki nepani nu ntumisi waku, mwaa Bambu Sapanga! 21Kulengana ni lilagii laku na mwoju waku guhengiki majambu makolongu goti haga ili gumanyisa nepani ntumisi waku. 22Kulengana na gatugajowini, kubanga wehapa Bambu Sapanga ndi gunkolongu na ngajojubii ngati wehapa na ngasejubii Sapanga jongi kabete ila wehapa. 23Kabee bandu boo, punndema pani baawesa kulengana na bandu baku bawakombwi ili abia bandu baki? Mwaa Sapanga wilihengila liina nu kulihenge majambu makolongu na gukusangasa kwa ndaba ju nndema waku palongi ja bandu bu nndema waku palongi ja bandu baku babube kwa ndaba jaku wamweti waakombwi kuhuma ku Misili, na kwaabenga bandu bandema yengi ni isapanga yaki palongi jabu? 24Waagangamalisi bandu baku buku Izilaeli kwa ndaba jaku wamweti ili abia bandu baku masoba ganga na mwisu, mwaa Bambu Sapanga gubii wa Sapanga wabu.”
25“Enu, mwaa Bambu Sapanga guhenga lilaganu lewanagalaki nepani ntumisi waku nu kwa alongu bangu ngati hewaalagila. 26Ni liina laku liilumbalika masoba ganga na mwisu na bandu biipwaga, ‘Bambu Sapanga, Sapanga jwana makili goa Sapanga juku Izilaeli.’ Na bandu bu nyumba jangu, nepani Daudi ntumisi waku jiigangamalika palongi jaku. 27Ndaba mwaa Bambu Sapanga jwana makili goti, Sapanga jwa Azilaeli gunhyekuli nepani ntumisi waku kupwaga, ‘Wiinzengila nyumba,’ ndi ndaba mii na makili kuguloba lijambu heli palongi jaku.”
28“Henu mwaa Bambu Sapanga, wehapa ndi wa Sapanga na malobi gaku ndi sakaka na gunagi nepani ntumisi waku lijambu lende laamboni, 29henu nuguloba nyumba jangu nepani ntumisi waku jiwesa kutama masoba goa ganga na mwisu palongi jaku, ndaba wehapa gupwagiki hela, kabee kupete mbenge yaku ibeleku yangu yiipengiwa masoba ganga na mwisu.”
Currently Selected:
2Samweli 7: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
