1Samweli 8
8
Aizilaeli aloba abiya na bambu nkolongu
1Ndienu, Samweli pajabiya nseja, jaahenga bana baki akanalomi abiya aka kilongosi buku Izilaeli. 2Mwana waki ju utumbulii ankema Joeli na jwa pili ankema Abiya. Boti abeli babiya aka kilongosi ku Beeli Sheba. 3Lakini bana haba ngasebapwata tabia ja atati babu. Ila batumbuliya kulupala lupija ngamaa. Ngasebaatemwi bandu ngati ekupalika.
4Ndienu, akakilongosi boa buku Izilaeli bakusanyika pamu, nukunzendee Samweli ku musi uku Lama, 5bumpwagila, “Linga wehapa henu ndi nseja na bana baku ngaseapwata tabia jaku. Ndienu utuhaguliya bambu nkolongu jukulongosa ngati ejibii milema jengi.” 6Lakini lijambu la Aizilaeli kupala ubambu ukolongu ukulongosa, ngaselunndengani Samweli. Najombi anndoba Bambu Sapanga. 7Bambu Sapanga ampwagila, “Joannya kila sindu sebugupwagi bandu, ndaba ngasebugukaniki wehapa, ila anganiki nepani kuba bambu nkolongu wabu. 8Tumbuka panaapia ku Misili, anei nepani, nukutumaki isapanga yengi mbaka lelenu. Hela ndi ebuguhenge na wehapa. 9Ndienu, waajonnya lakini waalakaliya ngani, na waalandila namuna bambu nkolongu jojaalongusa ndi ejaahengila.”
10Ndienu, Samweli jaapwaagila bandu bala bababia aloba baapekiya bambu nkolongu malobi goti gaka Bambu Sapanga gaampwagila. 11Samweli jaapwagila, “Hela ndi bambu nkolongu winu ndi ejanhengila. Bana binu akanalomi jaahenga abiya baendesa magali gaki gukuhtwa na falasi, na bangi kuba baakwela falasi na bangi bibutuka palongi ja magali ga alonda. 12Jihagula bangi abiya akolongu ba makundi gaki ga alonda akolongu na bangi abiya akolongu ba makundi ga bandu hamusinihamusini. Bangi jaahenga andemila matui gaki nu kuhusa ilebi yaki. Jaahenga kabee bangi andenganakiya hindu yukukomane, na bangi alenganakiya hindu yukulenganake magali gaka bambu nkolongu. 13Akakamwali binu baajukua kuba baalenganake mahuta gaganungi sapi gaka bambu nkolongu, bangi kuteleka na bangi kujosa mabumunda. 14Jiijukua matui ginu gagabii sapi, na matui ginu gi mizeituni, na matui gi mizabibu na kwaapeke atumisi baki. 15Najombi jiijukua pandu pa komi pi ilebi inu na kwaabagi na atumisi baahenga lihengu mu nyumba ji kibambu ukolongu. 16Jaajukua atumisi bii akanalomi na akambomba na ngombi inu ya sapi, na maponda ginu ga sapi ngani, nakwaahenga bunhengila mahengu gaki. 17Jijukua pandu pa komi pa makondoo ginu. Mwanganya mwabeti mwiibiya mwaatumwa baki. 18Kipindi sehesi, mwanganaya mwiilalamika ku usungu ndaba bambu nkolongu winu jojuwe mwilihagulii mwanganya mwabeti. Lakini Bambu Sapanga ngajannzoane.”
19Hata hela bandu bakana kunzoane Samweli, kukupwaaga, “Twepani tupala kuba bambu nkolongu witu, 20ili na twepani tubiya ngati bandu bi milema jengi. Bambu nkolongu witu jiitenda kututemula nukutulongosa nukutukomane mu ngondu jitu.” 21Samweli jajoaninya kila sindu bandu sebapwaaga, ndienu jajenda kunndandi Bambu Sapanga. 22Bambu Sapanga ampwagila Samweli, “Wajoanakiya ngati eapala na waapekiya bambu nkolongu.” Ndienu Samweli jaapwagila bandu buku Izilaeli, kila mundu jujenda kunyumba jaki.
Currently Selected:
1Samweli 8: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
