1Samweli 30
30
Daudi jukomana na Aamaleki
1Egapeta masoba matatu Daudi na bandu baki babuja ku Sikilagi. Aamaleki babiya bijisambulia nukujijosa mwotu misi juku Negebu nuku Sikilagi. 2Nabombi babiya baajukwi akammbomba pamu na bandu boti babaii homu, akakombu na aseja. Ngasebunkomiki jokapi, baajukua koni abii bomi nukujendane. 3Daudi na bandu baki pabahika ku musi uku Sikilagi, buguketanya musi bugutinii kwa mwotu na bandu Aamaleki na akahanu babu pamu na bandu babu na akakamwali babu atei kwaakamu. 4Ndienu, Daudi na bandu baki bapega keleli mbaka gaajomuka makili ngani gukulela.
5Aakahanu abeli baka Daudi babiya baakamwi yani Ahinomu juku Yezileeli na Abigaili, mmbomba joawii alomi waka Nabali juku Kalimeli nabombi batenda kwa kamu.
6Ndienu Daudi jabiya na mang'aliku makolongu ndaba bandu baki babi nu usungu mu mioju jabu sukwaahoa bana babu, ndienu bunnzogua kundapu malibu. Lakini Daudi julipekia mwoju sukunhobale Bambu Sapanga, Sapanga waki. 7Ndipala, Daudi ampwagila Abiazali, mwana waka Ahimeleki, “Netila kizibau suku nngolu.” Abiazali jatenda kunndete, 8najombi Daudi anndalukiya Bambu Sapanga, “Boo nilipwata likundi hale lelijenda kutukalila? Boo, mbaka naapate?”
Bambu Sapanga jajibua, “Waapwataje sakaka mbaka guwesi kwaaohokoa.”
9Daudi jaboka pamu na bandu baki mia sita pabahika ku ligomba luku Besoli, alonda bangi baka Daudi bahigali papu. 10Lakini Daudi pamu na bandu mia nsesi baendaliya kwaapwata. Ndaba bandu mia ibeli babiya asokiki ngamaa na ngasebawesa kulomboka ligomba heli. 11Alonda bala babiya na Daudi bunketaninya mundu jumu juku Misili kulugwenza, nabombi bumpelika kwaka Daudi. Bumpekia mundu hoju mabumunda na masi. 12Kabee bumpekiya ipandi ya mabumunda ga tini ni ingonyu ibeli i mizabibu nyomu. Pajajomula kula japata makili, ndaba jabiya ngasejukuliki wala kunywa sindu sokapi kwa masoba matatu muhi ni ikilu. 13Daudi anndalukiya, “Wehapa ndi wa nyane nu guhumiki kwako?”
Jajibua, “Nepani na mundu juku Misili ntumwa jwa Aamaleki. Bambu wangu jatei kuneka panalwai masoba matatu gagapetiki. 14Tugulapula nndema uku Negebu gwa Akeleti nu nndema wa Yuda na Negebu ju lukolu lwaka Kalebu. Natwepani tugujosa mwotu musi Sikilagi.”
15Daudi jalalukiya, “Boo, guwesa kunongosa kulihiki likundi la bandu baatukalila?”
Jajibua, “Ana gunapi palongi jaka Sapanga kubanga ngawiingomi wala kungabisa mu maboku gaka bambu hoju, nanepani nagupelika mbaka koabii.” 16Andongua Daudi mbaka pandu pajabii.
Nabombi babiya apesangini mu lieneu loti, bakula na kunywa nukuhenga tipati ndaba jukukamu hindu kuhuma ku nndema uku Apilisti nu kuhuma ku Yuda. 17Daudi jakomana nabombi bakomana kutumbu pulukela mbaka pikilabu jaki pakamii. Nga mwanalomi jokapi jojalama ila akakombu mia nsesi babiya akwei ngamia nu kutila. 18Daudi jakelubua kila sindu Aamaleki sebabii ajukwi, pamu na akahanu baki abeli. 19Nga sokapi sekihobiki, jukubi nkombu au nseja na mwanalomi au kamwali, hindu yoti yebabiya akamwi Daudi jatenda kuikelabu. 20Jajukua makundi goti ga makondoo, imbui na ng'ombi na bandu baki biilima inyama hei palongi ji inyama yengi yukupugwa bapwaaga, “Haye ndi inyama yejinyagiki Daudi.”
21Ndienu Daudi jakelubukia bandu mia ibeli bala babube baaleka kuligomba la Besoli ndaba babiya asokiki ngamaa kumpwata. Bandu pabummbona Daudi pamu na bababii pamu najombi, bajenda kunnzopa. Daudi pajahika pambipi na bandu haba jaalamukiya sukutogule. 22Lakini bandu boti abaja na bini milomu kati ja apwasi ba bandu babalongini na Daudi bapwaaga, “Ndaba ngasebapiti pamu na twepani, ngatubagani nabu hindu yetwanyagiki. Lakini kila mundu juwesa kunzukua nhwanamundu na bana baki nukuboka.”
23Daudi ampwagila, “Ngahela alongu bangu. Nganhwesi kuhenga hela kwa sindu sejugupeki Bambu Sapanga, jutulendiki sapi, nu kujangati twaawesa alonda babahikiki kutulapula. 24Nga mundu jojujetangana na mawasu ginu! Jojapiti mukukomana na jojahigali ni misigu jitu, kila mundu jiipata pandu papalengana nu nzaki.” 25Tumbuka lisoba heli Daudi jahenga uamusi hogu kuba malagalaki na kanuni munndema uku Izilaeli mbaka lelenu.
26Daudi pajakelubuka ku Sikilagi, jaapelakiya akakosi baki, babube ndi aseja buku Yuda hindu yejakamwi kupwaaga, “Naapelake nhupi kuhuma kwa abaja baka Bambu Sapanga.” 27Jatuma nhupi heji kwa aseja bababii ku Beseli Lamoti Negebu na Yatili, 28bandu babii ku Aloeli nu ku Sifimoti nuku Eshitemoa, 29na Lakali na bandu babaii mu lukolu lwa Ayelameeli na akakilongosi ba Akeni, 30na akakilongosi ba musi uku Holuma nuku Boli Ashani nuku Ataki, 31na bandu buku Helumoni na kwa bandu bababii pandu pangi poti papuje Daudi na bandu baki bababia ajenda kujoba.
Currently Selected:
1Samweli 30: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
