1Samweli 3
3
Bambu Sapanga ampiti Samweli
1Kipindi sehesi, nkombu Samweli pajabiya antumaki Bambu Sapanga pai ju ulonda waka Eli, malobi kuhuma kwaka Bambu Sapanga ngasegabile, na Bambu Sapanga jukubika ngasejulangi hindu kuhuma kwaki. 2Lisoba limu ikilu, Eli jojuwe miu gaki gakubika ngasegalinga sapi, jabiya jugoni musumba saki. 3Samweli najombi jabiya jugoni nkati ja nyumba jaka Bambu Sapanga pambipi ni Lisanduku li Lilaganu laka Sapanga. Taa jaka Bambu Sapanga jabiya jakoni jakanyaka ndaba kwabiya kwakoni ngasekukusiki. 4Ndienu, Bambu Sapanga ankema Samweli! Najombi Samweli, jajetika, “Mii pambane!” 5Samweli anzendila Eli nnyata, ampwagila, “Nhikiki ndaba gutei kungema.”
Lakini Eli ampwagila, “Nepani ngasenunkemike. Jenda ukagonila.” Samweli jakelubuka nu kugone.
6Bambu Sapanga ankema kabee, “Samweli!” Samweli jajumuka, nukunzende Eli nukumpwagi, “Nhikiki ndaba gutei kungema.”
Lakini Eli ampwagila, “Ngasenugukemiki wamwana wangu kagonila kabee.” 7Samweli jabiya ngakummanya Bambu Sapanga jakona, wala Bambu Sapanga jabiya ngasejuwaiki kulonge na najombi.
8Bambu Sapanga ankema Samweli kwa mala ja tatu. Samweli jajumuka nukunzendee Eli nu kumpwagi, “Nhikiki ndaba gutei kungema.”
Ndienu Eli pajamanya kuba Bambu Sapanga ndi joankema Samweli. 9Ndienu Eli ampwagila Samweli, “Jenda ukagonila na anajugukemiki kabee gumpwagila ana, ‘Pwaga, mwaa Bambu Sapanga, nepani ntumisi waku ndenda kugujoane.’ ” Ndienu Samweli jakelubuka nu kugone pandu paki.
10Mwenikatai, Bambu Sapanga jahika kujema papuje, ankema Samweli ngati puuwanzu, “Samweli! Samweli!”
Samweli jatenda kujeteka, “Pwaga Bambu, ndaba nepani nu ntumisi ndenda kugujoane.”
11Bambu Sapanga ampwagila Samweli, “Linga niihenga lihengu mu Izilaeli lelule naanhenga bandu ajowana nukusituka. 12Kipindi sehesi niihenga goti ganapwaaga naanhengila Eli na aalongu baki, kutumbuli pu uwanzu mbaka pa mwisu. 13Ndaba numpwagila ana naatemula alongu baki yaka yoti kwa ndaba mahakau gabu jagamanyiki, bana baki akanalomi andondwi nepani Bambu Sapanga najombi ngasejaakaniki. 14Ndienu naapa kubanga kilongu saka Eli mahakau gabu ngagiiboki hata kulenga, ku litambiku au lukutinii au matambiku ga nhupi.”
15Samweli jagonila mbaka pulukela, ndipala jajumuka nukupunguu matanga ga nyumba jaka Bambu Sapanga. Lakini Samweli jajogupa kumpwagi Eli gajagabweni. 16Hata hela Eli ankema Samweli nukumpwagi, “Samweli wamwanangu.”
Samweli jajetika, “Eee!”
17Eli anndalukiya, “Boo Bambu Sapanga jugupwagi kike? Wihiya sejugupwagi. Ana gunhihiki sejugupwagili, Sapanga jitenda kugulapu.” 18Ndienu, Samweli anndandila Eli goti gaampwagila, sanga kuhia sokapi. Ndienu Eli japwaaga, “Jombi ndi Bambu Sapanga nujuhenga sejubona saamboni kwaki.”
19Samweli jaendaliya kukola na Bambu Sapanga jabiya pamu najombi, na gala goti gajapwaaga Samweli nga hata limu langa kutimi. 20Nabombi Aizilaeli boti kutumbulii ku musi uku Dani upandi uku kasikazini mbaka ku Beeli Sheba upandi uku Kusini bamanya Samweli ndi nndota jojuhobaleka waka Bambu Sapanga. 21Najombi Bambu Sapanga jaendaliya kulilangi ku Shilu kokuje ampitila Samweli nu kulonge naku. Najombi Samweli pajapwaaga sindu, Aizilaeli boti batenda kunzoane.
Currently Selected:
1Samweli 3: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
