1Samweli 28
28
1Ku kipindi sengi, Apilisti bakusanya alonda babu tayali kujenda kukomana na Aizilaeli. Akishi ampwagila Daudi, “Guelawa sapi kubanga wehapa na bandu baku mpalika kujongana pamu nanepani kujenda kukomana ngondu.”
2Daudi anzibua Akishi, “Hena! Wakibona sindu sesuse juwesa kuhenga.”
Akishi ampwagila, “Nanepani naguhenga kuba nndonda wangu jukunenda masoba goti.”
Sauli jujenda kwaka mundu jojulondoo
3Kipindi sehesi Samweli jabiya jukuwiki nabombi Aizilaeli boti buntaga nukuendale kunndele ku nyumba jaki ku Lama. Sauli jabiya jaabengiki bababii ni ilombu yukulondoo na ahabi.
4Apilisti bakusanyika nu kubeka likambi labu ku Shunemu, na Sauli jaakusanya Aizilaeli boti nu kubeka kambi jabu ku kitombi suku Giliboa.
5Sauli pajaabona alonda ba Apilisti jatumbuliya kujogopa ngani, nukubagaja ku lujogopu lojabii naku mmwoju jaki. 6Ndienu andoba Bambu Sapanga lijambu, Bambu Sapanga ngaseanzibua kwa ndotu wala kwa malibu gu ulimu wala kwi indela ja alota. 7Ndienu, Sauli jaapwagila atumisi baki, “Ndaputiya mmbomba jojubii ni ilombu yu kulondoo ili nunzendila, nhwesa kulaluki kwaki.”
Atumisi baki bumpwagila, “Jubii mmbomba jumu ku Endoli.”
8Ndienu, Sauli jahula ingobu yaki ikibambu nu kuwata ingobu yengi ili bandu bammanya, na ekwahika ikilu jajenda na bandu abeli kwaka mmbomba hoju. Ampwagila, “Gunonduliya kwi ilombu nu gunetila pundema mundu jokapi jonaguloguliya liina laki.”
9Mmbomba hoju ampwagila, “Wehapa gumanyiki sejuhengiki bambu nkolongu Sauli. Jaakomiki baalondoo na ahabi boti mu nndema uku Izilaeli. Boo, ndaba jakii gumbendaki kitaba ili nguwaje?”
10Sauli jalapa kwi liina laka Bambu Sapanga ampwagila, “Sakaka ana Bambu Sapanga jojubii mwomi, kubanga ngakuba malapuli gokapi gagagupata kulengana ni lijambu heli.”
11Ndipala, mmbomba jola jalalukiya, “Boo, gupala nuguletila nyane?”
Sauli japwaaga, “Netila Samweli.”
12Mmbomba jola paammbona Samweli, jajamaliya kwa sauti ngolongu najombi anndalukiya Sauli, “Boo, mbona gutei kungonga? Wehapa ndi wa Sauli!”
13Bambu nkolongu ampwagila, “Wijogopa! Gukibona kike?”
Mmbomba jaapwaga, “Nikibona kisapanga kikwela kuhuma pai ju nndema.”
14Najombi anndalukiya, “Ndi julengana na kike?”
Mmbomba jupwaaga, “Julengana na mwanalomi nseja juwati ingobu nasu jutenda kukwela.”
Ndipala Sauli jamanya ndi Samweli. Sauli japega magoti nukujinama mbaka pu luombi.
15Samweli anndalukiya Sauli, “Ndaba jakii gung'alisa sukungwea kunane?”
Sauli ampwagila, “Nepani nzumbuka ngamaa, ndaba Apilisti akomana ngondu na nepani, najombi Sapanga jutei kuneka. Ngasejunyibu kabee wala kwi indela ja alota wala kwa ndotu. Ndienu nugukemiki wehapa ili gumbwagila sukuhenga.”
16Samweli japwaaga, “Ndaba jakii gunaluki nepani, ndaba Bambu Sapanga jugulei na kuba umbaja wake? 17Bambu Sapanga juguhengi sejambwagila nugupwagila. Bambu Sapanga juguboiki ubambu nkolongu kuhuma kwaku, na ampeki Daudi Nzilaeli nnzaku. 18Ndaba wehapa ngasegunnzetaki Bambu Sapanga, wala ngasewanhengiki sejugutuma Bambu Sapanga kwaahenge Aamaleki ndi ndaba lelenu juguhenge majambu haga. 19Kabee Bambu Sapanga jaajangatiya Apilisti aguwesa wehapa na bandu baku. Kilabu wehapa na bana baku mwiibiya pamu nanepani, hata alonda ba Izilaeli Bambu Sapanga jahenga Apilisti buguwesa.”
20Apalapa Sauli lunkamula lujogopu lukolongu nu kuhabuka nu lutumbu ndaba ja malobi gaka Samweli gala, kwa ndaba ngasejabii na makili gokapi, ndaba ngasejakuliki kilebi pipipipi na kelukelu. 21Mmbomba jola anzendila Sauli nu kummbona jupatiki lujogopu, ampwagila, “Linga nepani nu ntumisi waku nakabiya nguwiki lelenu kukuhenga segunagalaki nhenga. 22Ndienu, nuguloba gujoannya nuntumisi waku, gunyetakaliya nugutelakiya posu gukula ili gubiya na makili nu guendaliya na sapwali jaku.”
23Jakana nukupwaaga, “Nepani ngasembai kula.” Lakini atumisi baki bajongana nu mmbomba jola nu kumpembalake jukula najombi jatenda kujetake. Ndienu Jajumuka pai hapa, jatama panani ji kitanda. 24Mmbomba jola jabiya na katoli kakakendiki panyumba jaki, jasinza apalapa. Jajukua uwembi jakanda jajosa libumunda langa kujege amila. 25Anhandaliya posu Sauli na kabee atumisi baki, nabombi batenda kula. Ndienu babokaninya ikilu jeje.
Currently Selected:
1Samweli 28: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
