1Samweli 21
21
Daudi antila Sauli
1Daudi jajenda kuku nngolu Ahimeleki ku Nobu. Ahimeleki japita kujenda kunzopa koni jakabagaja, anndalukiya, “Ndaba jaki guhikiki kajika jako?”
2Daudi anzibua, “Mii pamba kulengana na mihilu jaka bambu nkolongu. Jambwagila nampwagi mundu kupete sejundumi. Naganii na bandu bangu kubanga tuketangana pandu pamba. 3Boo, gubii na sindu sokapi sa kula? Nuguloba mabumunda nhwanu au sokapi sekibii.”
4Nngolu Ahimeleki anzibua, “Pamba ngasemii na mabumunda gaugamanyiki. Mii pe na mabumunda gaapiiki kwaka Bambu Sapanga. Nhwesa kupata mabumunda haga ana bandu baku ngaseagoni na akammbomba pambipi.”
5Daudi ampwagila, “Sakaka, panijenda kuhenga mahengu ga kila lisoba gu ulonda, ngasetugone na akammbomba! Ana akakombu bangu ajetakeka kunndumbali Sapanga eakuba mu mahengu ga kila lisoba, boo, nga lee nakanopi mu mahengu makolongo ngati aga gajututumiki bambu nkolongo?”
6Ndienu, nngolu Ahimeleki ampekiya mabumunda gaapiiki kwaka Sapanga, ndaba ngasejabii na mabumunda gangi kupeta haga lakini gajubei palongi jaka Bambu Sapanga, bang'anambua mabumunda manyai gabahuma kujoko pikihinza.
7Ndienu, lisoba heli jabiya ntumisi jumu waka Sauli jojuwe jabiya hapa ndaba jukumpiki matambiku Bambu Sapanga. Ntumisi hoju ankema Doegi, mundu juku Edomu jojujemale alimi baka Sauli.
8Ndienu, Daudi ampwagila nngolu Ahimeleki, “Boo, gubii nu upanga nu nkoa goguwe guwesa kumbekea? Ndaba mahengu gaka bambu nkolongu kupalika moka kanyata, nanepani naboka sanga upanga wangu wala hindu yukukomane yokapi.”
9Ahimeleki anzibua, “Mii nu upanga wa Apilisti Goliati joankomiki ku ligomba la Ela, gubii mu nyuma jiki kizibau saka nngolu jukongiki mu kitambaa. Ana gupai kujukuu hogu ndienu, gujukua ndaba nga upanga gongi pamba.”
Daudi ampwagila, “Ngakuba upanga gongi wa sapi ngati hogu, nuguloba gumbekiya.”
10Lisoba heli, Daudi antila Sauli, jajenda kwaka bambu nkolongu Akishi juku Gati. 11Atumisi baka bambu nkolongu bumpwagila Akishi, “Boo, jonioju lee nga Daudi bambu nkolongu ju nndema wake? Boo, jonioju lee ngajobunzemba nukuhone ing'oma kupwaaga, ‘Sauli jukomiki maelupu gaki na Daudi jukomiki makomi elupu gaki?’ ”
12Daudi jabiya jutenda kugakomboka ndienu jatumbuliya kunzogopa ngamaa Akishi bambu nkolongu juku Gati. 13Ndienu, jang'anambua tabia jaki, jilihenga mwana mangongu, jabiya jukwandakwanda mu milyangu ja musi ni imata gaki jagaleka ganyika mwi indeu yaki.
14Akishi jaampwagila atumisi baki, “Mmanyiki kuba mundu hajo ndi mwanamangongu, ndaba jakii mundetiki kwango? 15Boo, nelee naapai ngani akanamangongo? Ndaba jakii nnete mwanamangongu juhika kunzumbuu na mahengu gasanamangongo? Boo mundu we hoju kupalika juhika kunyumba jango?”
Currently Selected:
1Samweli 21: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
