1Samweli 16

Daudi bunnzakani mahuta ili jubiya bambu nkolongu

1Bambu Sapanga ampwagila Samweli, “Wandelila Sauli mbaka lile? Wehapa gumanyiki nepani nunkaniki jwiikuba bambu nkolongu ku Izilaeli. Henu twelakiya linyelu laku mahuta gi mizeituni, guboka. Nagutuma kwaka Yese juku musi uku Beteleemu, ndaba nunhagwi bambu nkolongu kati ja bana baki.”

2Samweli jaapwaaga, “Niiwesaboo kujenda? Ana Sauli anajujoaini majambu haga jiitenda kungoma!”

Bambu Sapanga ampwagila, “Jukua litoli pamu nawehapa, anaguhiki hoku wakapwaaga, ‘Nhikiki kumpiki Bambu Sapanga matambiku gukutinii.’ 3Nkoka Yese mu matambiku haga nanepani nagulangia sukuhenga. Wampakia mahuta ndaba jangu mundu jonaguloguliya.”

4Samweli jahenga ngati ebumpwagila Bambu Sapanga, jajenda ku Beteleemu. Akakilongosi ba musi we hogu bapita nukujenda kunzopa koni abagaja bukunndaluki, “Boo, guhikiki ku lukwale?”

5Samweli jaapwagila, “Nhikiki ku lukwali. Nhikiki kumpiki matambiku Bambu Sapanga. Mulinyambisa mwabete tujenda kupia matambiku.” Samweli annyambisa Yese pamu na bana baki, jaakalibisa mu litambiku.

6Pabahika, Samweli eammbona Eliabu, jilipwagi mmoju waki, “Sakaka mundu joanhagwi Bambu Sapanga kumpaki mahuta ndi jonzo jojubii palongi jaka Bambu Sapanga!” 7Lakini Bambu Sapanga ampwagila, “Wiilingali sula jaki nu ulasu waki. Nepani nunkaniki ndaba ngaseningalii ngati bandu ealinga, ndaba bandu alingali sa kunza ila nepani Sapanga ningalii mmwoju.”

8Ndienu, Yese ankema Abinadabu nukundeta palongi jaka Samweli. Lakini Samweli jaapwaga, “Bambu Sapanga ngaseahangwi hojo.” 9Yese anndeta Shama, Samweli japwaaga, “Bambu Sapanga ngaseahangwi hojo kabee.” 10Yese jaaleta bana baki boti saba palongi jaka Samweli lakini Samweli ampwagila, “Bambu Sapanga ngaseahangwi jokapi kati ja haba.” 11Kabee ampwagila, “Boo, haba ndi bana baku boti bagubii nako?”

Yese jajibua, “Jwakona nsoku jumu, lakini jupiti kukulima makondoo.”

Samweli ampwagila, “Ntuma mundu anndeta, twepani ngatutami pai, mbaka pajiika pamba.” 12Ndienu, Yese antuma mundu najombi andeta. Nkombu jola jabii jojubii na yega, jojubii na miu gaganang'ana nagagalenganii. Bambu Sapanga ampwagila Samweli, “Ndi jojo jumuka gumpakiya mahuta.” 13Samweli jajukua linyelu laki lelibii na mahuta gi mizeituni nukunzakanii Daudi mahuta palongi ja alongu mundu. Apalapa loho jaka Bambu Sapanga junhikila Daudi kwa makili nukutama nkati jaki, kutumbuli lisoba leheli nu kuendale. Ndienu Samweli jabuja ku musi uku Lama.

Daudi juhenga lihengu kwaka Sauli

14Mwenikatai Loho jaka Bambu Sapanga jummboka Sauli na loho jiliya jejilekawi na Bambu Sapanga jatenda kunsumbuu. 15Ndienu, atumisi baka Sauli bumpwagila, “Tumanyiki kubanga loho jiliya jejilekakiwi na Sapanga jitenda kugusumbuu. 16Henu wa bambu witu, walagalakiya atumisi baku babugutumaki buntaputa mundu jojubii nu jojumanyiki kuona kilimba, na loho jiliya heji kuhuma kwaka Bambu Sapanga pajaguhikila, mundu hoju jiipega kilimba, na wehapa wiitenda kupogale.”

17Sauli jaapwagila atumisi baki, “Ndaputiya mundu hoju jojuwesa kuhona kilimba sapi nnetila.”

18Nkombu jumu kati ja atumisi jaapwaga, “Numbweni nkombu jumu jwaka Yese, jwa musi uku Betileemu. Nkombu we hoju jubii nu jumanyi kuhona kilimba. Kabee ndi jubii nganganganga kukomana, jumanyi kulonge sapi nu jubii ni liumbu la sapi, na Bambu Sapanga jubii pamu najombi.”

19Ndienu, Sauli jaatuma bandu kwaka Yese nu kupwaaga, “Ndumila mwana waku Daudi jojilima makondoo.” 20Yese antuma Daudi kwaka Sauli pamu na maponda gaki gagatotwi mabumunda ni kipuku sa ngosi seabekiki divai na kapongu kimbui ili ampelakiya Daudi ngati nhupi. 21Daudi pajahika jajingala kuntumaki Sauli. Sauli ampai ngamaa, mbaka anhenga jubia jojutoto hindu yukukomane ngondu. 22Kabee Sauli jaatuma bandu bukumpwagila Yese, “Numpai ngamaa Daudi gunndeka jutama pamba jundumakiya.” 23Kila loho mbaja jela ejikubika junhiki Sauli nukunsumbuu, Daudi jujukua kilimba nukutumbuli kuhona, na loho jiliya junndeka Sauli, najombi Sauli jilijoane sapi nukupogale.

Currently Selected:

1Samweli 16: MaBV

Highlight

Copy

Compare