2 Be ya a Tasalonika 3
3
Bulu è jan be ya a Tasalonika jan be e bgó ebgo a chu ye
1Be nwenjwa ya, me e jan e gu fwa mam adi be fwa ena. M jan anga jan nye e bgó ebgo a chu m ngge be ya emmeken mam evǝa Fwa Esese a chu Etsodwe ena e kpá e shan ne kwa e sanshi be zǝn. Fwa hon ge e ben edgwa abu gè ben a tswa engga mo nye ángá. 2Efwe, nye bgó ebgo evǝa Ehwya e ti e vǝ́ je a bu mo be ya mofǝ̀ ngge be ya mo esera. Adia fwa ye egwa egwa e no ngge chaebi ra. 3Tea Etsodwe no ende e bwe mò a ge jan ga bwe ángá. Ga no nye echafǝju, na tsǝ̀ a pe nye a bu mo ya mò esera hon. 4Je cha ara dwa a tsuruku mo je a tswa Etsodwe a chu nye, jan nye bwe anga be mò a jè jan nye e bwe ángá ngge je yi jan nye no a kpwà adi ebwem mo be. 5Etsodwe ge e du nye e yi e seshi edgyan mo Ehwya a chu nye ngge ekǝ̀n-ebonm a Kristi tú anga.
Bulu è twa echa a chu zǝno kukwa enom
6Be nwenjwa, adi ti mo Yeso Kristi Etsodwe, je twa nye edon anga, jan nye e kwaju ngge egwa egwa mo be nwenjwa e bwe be mò ra n no zǝno ken ye anga abu moetum a nyè cha a zǝn je ángá ra. 7Adia a nye e chu nye, nye yi abu ge se jan nye e ba be echifù mo je. Jè no je zǝno kukwa anga atan a jè no a zǝn nye ángá ra. 8Jè de je mode mo ende akan nwone a jè kpwa je tse mo nó ra ra. Tea jè ngǝ ekan, jè chifǝ ngge jè bwe mochi ènò ngge etsǝ afwa ja nga ende akan mo nye etkon. 9Jè bwe enò, fwa ye adia jè fwa je ngge echakpo je e ben yishwa ebwejwa ena ra ra, tea adia jè dgyan, je e no echifù a nya ba ángá. 10Adia èé atan a jè no ngge nye ángá, jè twa nye edon ena jan, “Ano ende akan e cha ye dwa ge e bwe mochi ra, ende akan e no ye ye mò akan ge e de ra.”
11Tea je fo jan be ya ehwyà a tswa engga mo nye no zǝno kukwa anga n dgyan be be e bwe mochi akan ra. Be tkukwa be zǝn no du vǝ mo be anga adi fwa e fwa ye ḿ mo be ra. 12Je twa yishwa be nobǝ ena echa anga ngge je bgó be adi ti mo Yeso Kristi Etsodwe jan, be e nggwa tsuruku mo be a sen, be e bwe mochi evǝa be e ben mò a ba de ángá. 13Adi ḿ mo nye be nwenjwa, nye e ni nye adi ebwem mo mò e no esese ángá ra.
14Ano ende akan tse ye echa a je twano adi afketa chí ena ra, nye e di e ba shi ye. Nye e no nye ye fǝzǝn ra, evǝa ebgenju e fu ye. 15Bi adi enò, nye e ti nye ye abu ya eze ra, tea nye twa ye echa abu ga nwenjwa a tswa mo Kristi.
Bulu è tso be dwavǝ esese
16Etsodwe nwene e no be nobǝ adgye anga, ge e no nye adgye abu atan engǝ ra, ngge a tswa be efǝ egwa egwa. Etsodwe hon ge e no ngge nye binbin.
17A me Bulu, m bá fwa ebim ena a me ngge bu mam, nwone e no echi e tú jan afketa chí ena vǝ tén a zǝn m n chà bwa. Ngge m bwe enò a tswa binbin mo be afketa chí mam. Ena a abu m bá mò anga.
18Esese mo Yeso Kristi Etsodwe je, ge e no ngge nye binbin.
Currently Selected:
2 Be ya a Tasalonika 3: ICH
Highlight
Copy
Compare
Share
Want to have your highlights saved across all your devices? Sign up or sign in
© 2024 Luke Initiative for Scripture Translation