2 Be ya a Tasalonika 2
2
Nobǝ e tse ye edon anga ra
1A chu ebwam mo Yeso Kristi Etsodwe mo je ngge abu ja fǝn evǝa je e ben ye ángá, je bgó nye anga be nwenjwa, 2nye e zhin e san nye ngge emme e bu ye nye myan myan a chu moetum a nye fo be jan vǝ a zǝn je bwa anga ra. Ge è ma no fwa a zǝn efojan akan mo Ehwya, eno e ra fwa a kpevǝ mo ende akan, eno e ra adi afketa chí a bè jan jè bá a je, jan ne nò a Yeso Etsodwe twabǝ a bwa ángá, nè bwangga fwa ara. 3Nye e cha e didi nye dwa a ende akan e ngga e de nye adi efwa akan ra. Nò eni a bwa ye ra, kpwà tén ano be ya e dgyan be Ehwya ra, twa ara ese ngge ge, ngge be fijan ara nobǝ hon e tse ye edon ra, ya mofǝ̀ akan hon e no ara kenm ba tkò ye ángá sangǝ́. 4Ga twa ese na kan chu ye etkyen vǝ́ twafǝ̀ mogwa mogwa a be fǝ ehwyá, eno e ra a be fen ye anga. Ga chu a tswa Àtá mo Ehwya, na jan a ge ga Ehwya.
5Nye kaben nye jan atan a m̀ no ngge nye ángá, m̀ jan bwi nye be mò ena anga ra? 6Nye yi mò e fupe efitum mbwe no asuswana ángá. Be fi tú a kpwà ye adi engga edefǝfǝ. 7Adia mò e du be nobǝ bwe bwi be mò esera anga, no bwe mochi anga engǝ̀tonton a tswa tsuruku mo be nobǝ. Tea asuswana, ende e fupe efitum mo nó ángá, no a kpwà adi ebwem enò ti ken a ngga atan be tivǝ́ ara ye a efǝ hon. 8Kǝnggwa atan enò, ba fi ende hon e tse ye edon ra a tú be nobǝ, a ge ga ende a Yeso Etsodwe bu a twa ngge fyo nwone a gwa a je mo kpevǝ mbwe ángá, ngge ga bwe a tkò ye ngge egǝ̀n mbwe nò a ga bwa ángá. 9Ebwam mo ende hon e tse ye edon anga ra, a no abu Shetan bwe mochi mbwe anga. Ga bwe be moeditanm, be echi ngge be mò ezǝzǝju fwafe adi be efwa efki efki. 10Ga bwe mochi ngge egwa egwa mo enggá mo mofǝ̀ evǝa ge e ngga e de be ya e no a efǝ nyaken a tswa etkom ángá. Be tkò anga adia bè se be e dgyan ebi hon evǝa Ehwya ge e ti e vǝ́ be. 11Enona, Ehwya tson ezhinm echakpokpo bwa anga a chu be evǝa be e tsǝ́ekǝ̀n a chu fwafe hon. 12Enona, ba kpèn binbin mo be ya e tsǝ́ be ekǝ̀n a chu ebi hon ra, tea n fo etkwa mo be mofǝ̀ ebwem anga, kǝ́nfǝ.
Ehwya è swa nye evǝa ge e ti e vǝ́ nye
13Tea a nye be nwenjwa m ya, a Yeso Etsodwe dgyan anga, ge se je e no chwa e no Ehwya anga a chu nye. Adia Ehwya è kwafya swa ara nye, evǝa be e ti e vǝ́ nye adi efka mo enacham a Engǝ́ nacha nye anga a chu ekǝ̀n-etsǝ́m mo nye a chu ebi ángá. 14Gè fǝ́ nye dwa evǝa be e ti e vǝ́ nye adi efka mo edgon a chu Fwa Esese a jè jan nye anga. Gè bwe enò evǝa nye e ben egǝ̀n mo Yeso Kristi Etsodwe je gaten.
15Enona, be nwenjwa, nye e ywa etkyen ngge echafǝju ngge nye e fu e seshi moetum a jè tú nye anga, ge è ma no adi fwa a kpevǝ mo je eno e ra adi afketa chí a jè bá no nye ángá.
16Asuswana, Yeso Kristi Etsodwe je e chu ye ngge Ehwya Ate je, nwene è dgyan je ángá, ngge adi efka mò esese mbwe, ge e no je ekǝ̀n ejanbonm e no a fwa efwam ngge shwa enyim echa e bwa anga adi esese ebwem mbwe ángá. 17Ge e bwe e bon nye ekǝ̀n. Ge e bwe nye nye e no ngge echafǝju adi binbin mo be mò esese a nye bwe anga ngge fwa a nye jan anga.
Currently Selected:
2 Be ya a Tasalonika 2: ICH
Highlight
Copy
Compare
Share
Want to have your highlights saved across all your devices? Sign up or sign in
© 2024 Luke Initiative for Scripture Translation