Yakubu 3
3
Nǝ Bwangtǝm Jǝbɔ Ben Gǝnɔ
1Kɛtǝlam mɨ, ka kɔrɔ jenɔ ya yǝlam lɛ nǝb mɛlalɨ, jǝ́ nyǝm nyɔ bǝn nɨ bǝ maa mɛlalɨ lɛɨ, jǝ maa bǝm borang a shilo a laa a tangǝn nǝbɨɨ. 2Pʌd bǝnɔ bǝ maa bwɨlangkɛl. Na kaa nǝl a maa bɔ bwɨlangkɛl a sʊwatǝm kɛlɨ, gɔ n nʊ nɨ dǝngdǝngɨ, dwal dwal a tɔɔ bʊtɔ gǝnɔ gwam.
3Bǝ dǝg dǝg tʊwagɔ gǝm kung a nyiyo sǝ a bwang bǝm. Maatǝmɔ nyɨɨ dǝg dǝg bʊtɔ tʊwagɔ gwam a maa jʊ bǝ swɨ lɛɨ. 4Jǝ́ dʌng tɨyamwɛngtɨnɔ. Ja dʊʊla nyɔ, n yʊwa kwamɨ yɔ lɛ nǝn ji suli, n kǝlɨ bɛ dwam mǝgtǝm nǝ mǝgtǝmɔ gǝ yǝla gǝn nɛ nǝn a daa nɨ gwam ga swɨɨ. 5Benɔ gǝ na nyɔ. N kǝlɨ bɛ jǝl a mʊgɔ jinʌn bʊtɔ, gǝ swɨ maatǝm lɨyal a kanjǝl dʊʊlantɨn. Jǝ́ dʌng kanga kǝlɨ kǝlagɔ na ja kuli gǝ twɨm kuulɔ lɛ gwamɨ. 6Ben nǝlɨ n kǝla. N bwɨlang yooli a mʊgɔ bʊtɔ bǝn! Benɔ gǝ kal kal nǝl gwam a mʊgɔ yɨm gǝnɔ gǝm. Benɔ dul gǝn lɔ kǝla kul gǝm kǝla lɛɨ.
7Nǝfitʌmɔ gǝ mɛl mɛl yʊwaltɨnɔ, jǝbɔ lǝbɨtɨnɔ, jǝbɔ namtɨn nɨ wuul lɛ nǝn fʌli, jǝbɔ jʌngigɔ. 8A benɔ mɨ nʊ nɨ wo dwal lɛ a mɛl gǝnɨ. Benɔ n bwɨlang jǝl. Mɨ nǝn fǝbtǝm. A yii nǝn twalǝm nɨ gǝ maa jʌtǝm lɛɨ.
9Bǝ bǝlá Tɛlalɔ wʊnɨ nǝn Tɛtɛ bǝnɨ nǝn ben bǝnɔ. Nǝn gɔ tag bǝ tuwolam nǝb lɛ nǝnɨ, wʊnɨ Kwaama a fwal a mʊgɔ jelkatǝm gǝnɨ. 10Nǝn nyiyo gɔ win bǝ maam bǝlátǝm lɛɨ, nǝn gɔ tag bǝ tuwolam nǝb lɛɨ. N wɛ kɛtǝlam mɨ! A bʊm nyɔ ka? 11Laa mwɛmɔ win, gǝ jǝg jǝg mwɛ denden jǝbɔ mwɛ tuuli daagɔ win ka? 12Kɛtǝlam mɨ, tɨya dʌfeng gǝ tʊʊ tʊʊ tʊʊl zaitun ka? Tɨya fogfogi gǝ tʊʊ tʊʊ tʊʊl dʌfeng ka? Laa mwɛ nɨ jǝg mwɛ mam lɛɨ, mɨsɔ jǝg mwɛ denden nɛ.
Yʊlan Nyan Nɨ A Bɛ A Dʌbʌli
13Nʊ nɨ nǝn yʊlan jǝbɔ nyǝmtǝm a kʊm jeni, bɛ ga nʊng a gola yɨm nyan jǝbɔ maajɨ nyan. Bɛ ga maa nǝn yʌbtǝm dul, wʊnɨ jǝ nya lɛ a mʊgɔ yʊlanɨ. 14A mʊgɔ nǝl jen, na jǝ́ maa nungon nɛ jǝbɔ swɨtǝm duli, ka jǝ́ maa lɛ lɨyal jengɔ jǝ́ nǝn yʊlan, ka jǝ́ bǝm lɛ bɨlǝngkɛlɔ. 15Yʊlan nɨ ke bɔ a wʊnɨ gǝla lɛ a dʌbʌli, na a yooli nɨɨ. Ke bɔ a sagsag, na a mammɨ. 16Daa nɨ gwam nungonɔ wo jǝbɔ swɨtǝm duli, n daagɔ kʊkkatǝmɔ jǝbɔ kanjǝl shilɔ wo gwamɨ.
17A yʊlan nɨ a bɛ a dʌbʌli nǝn gɔ a yɔ nǝn bǝn nǝn tɨkǝga a sagsagɨɨ, nǝngɔ bɛ lɛ nǝn yɨm kwamɨgǝnɨ, jǝbɔ yʌbtǝm dul, jǝbɔ shigtǝm dul, jǝbɔ jitǝm bʊnǝn wʊnɨ maa jǝ nya lɛɨ. Mɨ nʊng swɨtǝm dul lɛ jǝbɔ maatǝm fento. 18Nǝb mʊrkatǝm yɨm kwamɨgǝnɔ nɨ a kwal a mʊgɔ yɨm kwamɨgǝnɨ, jǝ kʌso maajɨ dǝngdǝng.
Currently Selected:
Yakubu 3: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation