Yakubu 2
2
Gʊtǝm Lɔl A Dul Nʊngtǝm Dʌmʌn
1Kɛtǝlam mɨ, ka jǝ́ nʊng lɛ swɨtǝm dul a kʊm jen, jʊ a bwɨɨ jǝ́ kwɛl jǝ́ ya nǝtǝm bɨlǝngkɛl jenɔ a daagɔ Tɛlalɔ bǝn Yesu Kiristi woi, nʊ nɨ nǝn Tɛlalɔ Nǝ dʊʊlǝnɨ. 2Jǝ mɛlalɨgɔ n wɔ, na kaa nǝ shilo a dɔ a mʊgɔ mʊrkalɨ jen, a dǝg kanjǝl mʊn jǝbɔ bɛllɛ bʊmǝntɨn. Nǝngɔ kaa nǝ bʊnǝn a dɔ nǝn bɛllɛ nɨ a wʊlala wʊlalaɨ, 3jǝ́ nǝ nǝ nʊ nɨ a dʊʊ dʊʊl nyanɨ dʊʊn. Jǝ́ sʊwa jengɔ, “Nǝ dʊʊ, kotere nyanɔ wɔ, yɨ wo.” Jǝ́ sʊwa nǝ bʊnǝnɔ jengɔ, “Yɔ ya tɨ fʌlen,” na mɨ nyɨɨ, “Yɨ a tǝm.” 4Na jǝ́ maa nyɨɨ, jǝ́ nʊng bɔ swɨtǝm dul a kʊm jen ka? Wɛ a bwɨ jǝ́ mwatɨ borangɔ lɛ nǝn bʊʊlalɨ bwɨlanɨ?
5Jǝ́ nyʊwa, kɛtǝlam mɨ nɨ mǝ swɨ lɛɨ! Ke bɔ nǝb bʊnǝn yooli nɨ Kwaama a jǝgam sǝ a yǝlam nǝb shilo a nǝtǝm bɨlǝngkɛl a daa Yesu woi ka? Ke bɔ ji jǝ wɔɔ kʊla fɔlɔn nɨ lɛ ga maa nǝb nɨ gǝm swɨ gǝn nɛɨ gǝm swatǝm yaaɨ ka? 6A jenɔ jǝ́ soga nǝb bʊnǝnɔ. Ke bɔ nǝb shilogɔ nǝ jen gaalan nɛɨ ka? Ke bɔ ji jǝ gʊ jen nɛ jǝ yɔ nǝn jen a kan borangɨ ka? 7Ke bɔ ji tag jǝ sʊwa kɛl sogan nɛ a dul dun nyan gǝnɔ ja nyǝm jen nǝnɨ ka?
8Bʊm bʊm na jǝ́ bwangtǝn diil fɔlɔn lɔ Kwaamaɨ, wʊnɨ ja mʊla a mʊgɔ mʊlalɨ kɛl Kwaamaɨ sʊwa lɛ gɔ, “Bɛ swɨ fwalɨ yɨm mʊnɔ na dul mʊnɔ.” 9Na jǝ́ nʊng swɨtǝm duli, jǝ́ maa bwɨlangkɛl. A mʊgɔ diil Musaɨ, jǝ́ yǝlam nǝb kǝltǝm diil. 10Nʊ nɨ a kɨla diiltɨnɔ gwam, a kǝl wini, a kǝl pʌd. 11Nʊ nɨ a sʊwa gɔ, “Ka ń maa lɛ buloni,” nǝn gɔ a sʊwa tag gɔ, “Ka jʌ lɛ dul.” Na mʊ maa bɔ buloni, na ń jʌ nǝlɨ, ń kwɛl ń yǝlam nǝ kǝltǝm diil Kwaamaɨ. 12Bɛ kɛl jenɔ jǝbɔ maajɨ jenɔ a nʊng jǝ́ nǝb nɨ jǝ maa jem borang lɛ a dul diil nɨ nǝ jen jǝgtǝm dul lɛɨ. 13Jʊ a bwɨɨ nǝn kwama mwɛlɔ, Kwaama mɨsɔ ji bʊnǝn nʊ nɨ lɛ mɨ nǝn bʊnatǝmɨ. Jʊ a bwɨɨ bʊnatǝmɔ laa laa kwaan mwɛlɔ.
Nǝtǝm Bɨlǝngkɛl Jǝbɔ Maajɨ
14Kɛtǝlam mɨ, n wɛ nǝl nya lɛ na nǝl a nʊng gɔ gǝ nǝn nǝtǝm bɨlǝngkɛl, na maajɨ nyantɨn gǝnɔ a nʊng bɔ nyɨɨ. Nǝtǝm bɨlǝngkɛl gǝnɔ dwal dwal a bʊʊ nǝn gǝ ka? 15Na kɛ balɨ jǝbɔ kɛ nɔɔlɨ mɨ ji nǝn bɛllɛ jǝbɔ jǝjalǝn dwiyeni, 16nǝngɔ kaa win a kʊm jen a sʊwa ji gɔ, “Jǝ́ ya kwamɨgǝn. Bɛ Kwaama a nǝ jen jǝjalǝnɔ jǝbɔ jǝ dʊtǝmɔ.” A maa bɔ kaa jǝl a jʊ nɨ ja gaa nyatǝmɨ, n wɛ jʊ nɨ nʊng lɛɨ? 17Gǝ na nyɔ, nǝtǝm bɨlǝngkɛl nɨ mɨ nǝn maajɨ nɨ nʊng lɛɨ, ke bɔ kaa jǝl.
18Kaa nǝl sʊwa sʊwa gɔ, “Mɔ nǝngǝn nǝn nǝtǝm bɨlǝngkɛl, mǝ nǝngǝn nǝn maajɨtɨn.”
Nʊng ɨ nǝtǝm bɨlǝngkɛl mʊnɔ nɨ mɨ nǝn maajɨ nyantɨnɨ, mǝ nʊng ń nʊng ń nǝtǝm bɨlǝngkɛl mǝndɨ nǝn maajɨ nyantɨn. 19Ń nǝ bɨlǝngkɛl Kwaama win ka? N dǝngdǝng. Nǝblaamɔ tʌji a nǝ bɨlǝngkɛl nyɔ. Bʊtɔ jinɔ ka lɛ kʌbkʌb nǝn taal.
20Mɔ nǝ swɛlalɨ! Mʊ swɨ lɛ n nʊng ń kanga nǝtǝm bɨlǝngkɛl nɨ mɨ nǝn maajɨɨ n ke bɔ kaa jǝlɨ ka? 21Nǝn kwama tʊga bǝn Ibrahim a nǝ bʊla gɔ Ishaku a daa twɨtǝm yulʌni, n kɛl dul maajɨ dǝngdǝng gǝnɔ Kwaama a nya gǝn bɔ nǝn bwɨlangkɛlɨ, mɨ nyɔ ka? 22Ń kuwo kanga nǝtǝm bɨlǝngkɛl gǝnɔ yɔ lɛ dǝngdǝng jǝbɔ maajɨ nyantɨn gǝnɨ, maajɨ nyantɨn gǝnɔ a nʊng nǝtǝm bɨlǝngkɛl gǝnɔ n dǝngdǝng. 23N daa nɨ ja yii mʊlalɨ kɛl Kwaamaɨ sʊwa lɛ gɔ, “Ibrahim a nǝ bɨlǝngkɛl a daagɔ Kwaama woi, n kɛl dul nǝtǝm bɨlǝngkɛl gǝnɔ Kwaama a kiyo gǝn n nǝ dǝngdǝngɨ.” N jʊ a bwɨ jǝ jo gǝn nɛ gɔ, Ibrahim nǝn fwal Kwaamaɨ. 24Jǝ́ kuwo Kwaama a nya gǝn bɔ nǝn bwɨlangkɛl a dul maajɨ nyan gǝnɔ gǝm. Ke bɔ a dul nǝtǝm bɨlǝngkɛl kwaagɔ.
25Gǝ na nyɔ tag, nɔɔlɨ bulon nɨ, Rahab, nǝn kwama a yʊm nǝb jatɔl nɨɨ, a tɨka ji ja bʊʊ a kaa golaɨ. N gola maajɨ nya, Kwaama nya gǝn bɔ nǝn bwɨlangkɛlɨ, mɨ nyɔ ka? 26Kanga bʊtɔ nǝlɨ mɨ nǝn kʊlɨ n bʌlʌni, nǝtǝm bɨlǝngkɛl nɨ mɨ nǝn maajɨ nyantɨnɨ, gǝ na na bʌlʌn.
Currently Selected:
Yakubu 2: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation