2 Tasalonikaɨ 2
2
Fɔlɔ Kutʌm Bwɨla
1Kambɔ, a kɛl yǝlatǝm Tɛlalɔ bǝn Yesu Kiristii, jǝbɔ mʊrkatǝm bǝnɔ sǝ bǝ tǝgaka bǝnɔ gɨɨ, nǝn kela jen nɛ, 2bɛ ka nǝl jenɔ ya mǝga lɛ. Ka jǝ́ gung lɛ nǝl jenɔ a nyʊwatǝm kaa kɛl kuwotǝmkǝga, kaa kiyotǝm fulon kaa langǝn bwangǝn, wʊnɨ kaamɨ gɔ a jel a daa nǝn woi gɔ, kɔkɔ bɛtǝm Tɛlalɔɨ a kwɛl a bɛɨ. 3Bɛ ka jǝ́ jǝla lɛ kaa nǝl a swag jen dǝm, jʊ a bwɨɨ, kɔkɔ nɨ mɨsɔ lǝga lɛ a bɛ, na ja maa bɔ gotatǝm nɨ nǝn kwamagɔ fɔlɔ kutʌm bwɨla nɨ jelʌm lɛɨ, nʊ nɨ kala lɛɨ. 4Nʊ gɔ n nǝ kii. Maa kii lɛ jǝbɔ jʊ nɨ gwam nǝn dun Kwaamaɨ, jǝbɔ kanjǝl nɨ nǝbɔ bǝlá lɛɨ. A gung dul gǝnɔ a laa kanjǝl nɨ gwam. Yɨ yɨ a Kan Kwaaman Kwaamaɨ, sʊwa lɛ gɔ nǝn gɔ gǝ nǝn Kwaama.
5Jǝ́ bʊʊla bɔ ka? Mɨ mǝ sʊwa jen kanjǝl nɨ lɛ kwama bǝ dakinii ka? 6Jǝ́ nyǝm jʊ kʌshi gǝn nɛ kǝngkɨɨ, kage a jel kwama gǝnɔ a la bɔ. 7A kǝngkɔ kwaan nǝ kutʌm bwɨla nɨ a kwɛl a ta maajɨ daddad. Nʊ nɨ kʌshi gǝn nɛɨ ja ja kǝga nǝn kʌshitǝm gǝnɔ ba la nǝn kwama jǝ dem nʊ nɨ kʌshi gǝn nɛɨ. 8Sǝla fɔlɔ kutʌm bwɨla nɨ a jel. Tɛlalɔ Yesu jʌ gǝn nǝn fǝbǝm nyiyo gǝnɔ. A kalǝm gǝn nǝn dʊʊlǝn gǝnɔ a di kɔkɔ bɛtǝm gǝnɔ gǝm.
9Fɔlɔ kutʌm bwɨla nɨ bɛ a kwaan fɔlɔn Mammɨ, maa kanjǝl laatǝm kang gabakɛl lɛ, jǝbɔ kanjǝl nʊngtǝm, jǝbɔ kanjǝl tatǝm kang a nyiyo. 10Maa maa maajɨ nǝn kanjǝl bwɨla sǝ a swag nǝb nɨ a gola bʊlatǝmɨ, jʊ a bwɨɨ ja kɔ swɨtǝm bɨlǝngkɛl wʊnɨ jǝ bʊʊm lɛɨ. 11A dul kɛl nɨ, Kwaama tʊng jim tʊng gʌleng swagtǝm sǝ ja nǝ bɨlǝngkɛl a gabakɛl, 12sǝ a mwɛ nǝb nɨ gwam a kɔ nǝtǝm bɨlǝngkɛlɨ, jǝ nyʊwa lǝma maatǝm shil lɛɨ.
Yɨtǝm Yɨm Nyan
13Jǝ́ kɛtǝlam mɨɨ, nǝbɔ Tɛlalɔ swɨ lɛɨ, a yǝlam nyɔ nǝn buu Kwaama gǝm kang a dul jen, jʊ a bwɨɨ Kwaama a jǝgam jen nǝn tɨkǝga sǝ jǝ́ nya bʊʊtǝm a gola butitǝm Yʊwa Kwaamaɨ, a gola nǝtǝm bɨlǝngkɛl bɨlǝngǝn. 14N kɛl dul jʊ nɨ a jo jeni, a gola fulon kɛl lǝmɨ nɨ nǝn sʊwa jeni, sǝ jǝ́ nya dʊʊlǝn Tɛlalɔ bǝn Yesu Kiristii. 15A na nyɔ kambɔ, bɛ jǝ́ tɨ a kwam, jǝ́ ta diiltɨn nɨ nǝn mɛla jemi gwanggwang, a nyiyo jǝbɔ mʊlalɨ.
16Bɛ Tɛlalɔ bǝn Yesu Kiristi nǝn dul gǝn, jǝbɔ Kwaama Tɛtɛ bǝn wʊnɨ a swɨ bǝn a gola lǝma gǝnɨ, a kʊʊ bǝm nǝl nɨ mɨ dɨtǝm woi, a nǝ bǝn yatǝm nǝl nyan, 17a kʊʊ jem nǝl, a nǝ jen kwaan bʊtɔ tag a gola maajɨ nyan jǝbɔ kiyotǝm kɛl.
Currently Selected:
2 Tasalonikaɨ 2: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation