Luka 12
12
Vnínøt nøt rì kaq vyáshì rà we
Mat. 10:26-33; 10:19-20; Luk. 21:14-15
1Wervtø̀ taq, vsv̀ng loksokrì nø vlvmke høq, mvme kínggǿ dvkǿmshì ráì dvgvp, Yesuí Àng coqcv́nrì sv̀ng vzv̀ng a:lò we nø, “Parisirìò vnínøt nøt we butdvshi sv̀ng nàyáshìnø̀ng. #Mat. 16:6; Mak. 8:15 2Vwvmshaq pà ínìgø Gvrayí dvtan lú:ngòe. Vmáshaq pà ínìgø Gvrayí vjáng lú:ngòe. #Luk. 8:17 3Wedø tiqdvchá, nàmaqí dø vdòngø èshø̀nnø̀ng kàrì kapà ínìgø, lànglàng gá yv́ngø tá lú:ngòe. Kok rv́mø bønbøn wa èshø̀nnø̀ng rì nø chø̀m rv́gùng kèní dvshvng lú:ngòe.
4Lamboqrìá, Ngàí vla:tnìni, shagóng sv̀ng sha:tnò dá:ngí, pàgø vrá wá mvlú:nò rì sv̀ng mèsèrenø̀ngni. 5Nàmaq svre rà we nø kagǿ í we Ngàí dvshatna:tnìni. Sha:tnò dá:ngí zùpvng svmi móng sv̀ng gurlv́m vmíng vkv́ng vl pè Gvray kaq mv̀ng sèrenø̀ng. Jø̀ngjǿng Ngàí vla:tnìni, Àng sv̀ng sèrenø̀ng. 6Tvrøt pùngwàgo nø gv̀msùngshi vníbé taq na:mò we mø̀í má? Íwe, Gvrayí nø tvrøt tiqgo sv̀ng gø mànáò. 7Nàmaq vgoni shvngbe gø vrøshaq íe. Wervt mèsèrenø̀ngni. Nàmaq nø tvrøt mvme go mvdv̀m té nàpǿnø̀nge. #Luk. 21:18
8Ngàí vla:tnìni, vsv̀ng mv́rdv̀ngø Ngà sv̀ng nàchàng gǿ sv̀ng nø, Gvrayò muqlàng dvzv́rrì mv́rdv̀ngø Vsv̀ng Àngcèpèí gø wegǿ sv̀ng vchànglv́m íe. 9Vsv̀ng mv́rdv̀ngø Ngà sv̀ng èngál gǿ sv̀ng nø, Gvrayò muqlàng dvzv́rrì mv́rdv̀ngø Vsv̀ng Àngcèpèí gø wegǿ sv̀ng ngállv́m íe. #Luk. 9:26 10Vsv̀ng Àngcèpè kaq shvyǿmkà shø̀n gǿ sv̀ng nø chutna lúnshìe. Íwe, Shànshér Pvlàcè kaq shvyǿ:mò gǿ sv̀ng nø chutnalv́m màvl. #Mat. 12:32; Mak. 3:28-29
11Vrá vsà:ngí nàmaq sv̀ng júrøt chø̀mrì sv̀ng gø, øpshú dùrì nv̀ng vmíng vkv́ng vl rì mv́rdv̀ng sv̀ng gø èshøl bǿnø̀ng dvgvp, kadø garshìlv́m, kapà shø̀nlv́m wa nø̀ góng mèginø̀ngni. 12Kadø íe wani wervtø̀ taqni nàmaqí shø̀nlv́m kàrì Shànshér Pvlàcèí shèngøt daqnø̀nge,” a:lòe.
Mvgàm àngdálpè kàshvbóng
13Vsv̀ng loksok dvhø̀ kèní tiqgǿí Yesu sv̀ng, “Svrapèá, ngà sv̀ng zaqshøp vwálalv́m rvt ngà vnvmpè sv̀ng èshǿnangvtnà,” a:lòe.
14Yesuí, “Vjàé, kagǿí Ngà sv̀ng nàní mvdv̀mø kàrvtshú mø̀íni zaqshøp vwálashú èzv́ng bǿngà má?” a:lòe. 15Wekvt Yesuí àngmaq sv̀ng, “Map we àngpv̀npv̀n sv̀ng pán vshat nàyáshìnø̀ng. Kadø íe wani vsv̀ng gø̀nshaq nø àng vdá mvgàm lòng taq mànvng,” a:lòe. #1Tm. 6:9-10
16Wekvt À:ngí àngmaq sv̀ng kàshvbóng tiqlòng shø̀:nòe. “Mvgàm tiqpè nø àng rvmá kèní mvzí dvyø̀ gvzà dvkømv́m lún bǿà. 17Wekvt àng nøt vdòngø, ‘Ngà mvzí dvyø̀rì gv́lrà taq mvcv́nglv́m wáe. Kadø wàlv́m?’ wae.
18Vrá, ‘Ngàí yadø wàlv́m íe. Ngà vzárì catnò dá:ngí, té te dø wv̀ngò nø̀, ngà mvzí dvyø̀rì nv̀ng dvzøm dvzirì shvngbe weyv́ngø gvlshìlv́m íe. 19Wekvt ngà nø ngà vdè sv̀ng, “Nà nø mvme nǿng dvpvt dvzøm dvzi mvme dèkømv́m bǿì. Nà nø shøtshúcè èvl nø̀, èvm èaq sórí, dvbúdv̀ng èwa,” vlshìlv́m íe,’ wae.
20Íwe Gvrayí, ‘Sv̀ngdálé, nà gø̀nshaq nø dèyaqni vtv̀nglv́m íe. Wekvt nàí dvkømshaq rì nø kagǿ dvpvt ía dá:rò má?’ a:lòe.
21Wervtnø̀ vdè dvpvt wa pø̀yá pø̀nung shøpshì nø̀ Gvray dangø màmvgàm gǿ nø yalòng dø í longe,” a:lòe.#Mat. 6:20
Góng màgishaq Gvray móngdàn lá ra we
Mat. 6:20-21,25-33
22Vrá, Yesuí coqcv́nrì sv̀ng, “Wervtnø̀ Ngàí vla:tnìni, “Kapà v́mlv́m!” wa nø̀ gø̀nshaq dvpvt gø, “Kapà gwashìlv́m!” wa nø̀ góng dvpvt gø góng mèginø̀ngni. 23V́mlv́m mvdv̀m gø̀nshaq té vpǿe, gwálv́m mvdv̀m góng té vpǿe. 24Sv̀ngkárì sv̀ng èyv̀ngnø̀ng! Àngmaq nø wøn gø mvwønvm, dvkøm gø màdvkømvm, vzá gø màdá. Ínìgø, Gvrayí àngmaq sv̀ng dvkù:mòe. Nàmaq nø carì mvdv̀m gvzà nàpǿnø̀nge. #Shz. 147:9 25Góng dègishìnø̀ng weí, vdè bat sv̀ng tiqrvtø̀cè rvm èngutshìnø̀ng we kagǿ vle má? 26Cv́m vtvng yapv̀ncè dv́ng nàmaqí wá mèngutnø̀ng nìnø, dvgárì rvt pàwá góng dègishìnø̀ng má?
27Zømwàng nv̀mpurì kadø te long we sv̀ng dèdvmnø̀ng. Àngmaq nø dvzaq gø màdvzaqshì, yì gø mvyishì. Íwe Ngàí vla:tnìni, Solomon nø dvgùng gvzà ngø̀r dvgvp dv́ng, nv̀mpu tiqwvt dv́ngte gø àng gwashì mvlún yà:ngò. 28Kv́mnøt ècv̀mnø̀ng rìé, dèni cúnshì nø̀, nvpni nø svmi taq wv́rlv́m wa í we mvlì shønhàrì sv̀ng dv́ng Gvrayí yadø dvgwaò we í nìnø, nàmaq sv̀ng nø wemvdv̀m téwa dègwa daqnø̀ng we mø̀í má? 29Nàmaq nø pà v́mlv́m, pà aqlv́m walòng sv̀ng nøt mènàdǿnshìnø̀ngni, góng gø mèginø̀ngni. 30Rvgaq tø̀m taq Gvray mvsháò rìí nø yadv́ng pv̀n shvngbe sv̀ng láòe. Íwe, yadv́ng pv̀n èrànø̀ng we sv̀ng nàmaq Nvpèí vsháshaq íe. 31Àng móngdàn mv̀ng èlánø̀ng. Wekvt yadv́ng pv̀n nø nàmaq sv̀ng èzí daqnø̀nge.
32Vyv̀ngrécèrìé, mèsèrenø̀ngni. Pàwálv́m wani nàmaq sv̀ng móngdàn zílv́m nàmaq Nvpè wv́mshìe. #Luk. 22:29 33Nàmaq nàdánø̀ng rì ènvmnø̀ng nø̀ dvshá rì sv̀ng èzínø̀ng. Nàmaq dvpvt bøt mvsháò we gv̀msùng yǿng nv̀ng vkǿí gø mvníò, mǿ:ní gø màgvyaqò we muqlàng taqlap yv́ngø lv́ng mvtǿmshì we pø̀hvp mv̀ng èshøpshìnø̀ng. #Mat. 6:20-21 34Kadø íe wani nàmaq pø̀hvp kayv́ng vl nìnø, nàmaq nøt gø weyv́ngø vle.
Pán vshat caò we dvzømshú
Mat. 24:42-51
35Nàmaq nø juqnv́m ènv́mshìnø̀ng. Svmigwìnrì gø mànar laq gwa. 36Zvmì shvzøng bóy kèní vtv́ng ra we àngkàngpè tuq ra nø̀ bv́ngkà vkoknga:tnò ke, àng sv̀ng chàng tánalv́m caò we vshuqrì dø èwáshìnø̀ng. 37Àngkàngpè tuq ra kvt pán vshat nø̀ ca dáò we vshuqrì sv̀ng yv̀ng bǿò nìnø, vshuq werìí ìshøt lú:nòe. Ngàí jø̀ngjǿng vla:tnìni, àngkàng wepèí nø àng vshuqrì sv̀ng v́mpà v́mlv́m rúng dvzá:rò dá:ngí, àng nø juqnv́m nv́mshì nø̀ àngmaq sv̀ng à:ngí ni dvzøma:tnòe. #Yoh. 13:3-5 38Àng nø yaqdø̀ng mvlùng, mø̀íni vsháng gárí taq tuq ra nìgø, wedøni ca dáò we sv̀ng à:ngí yv̀ng bǿò nìnø, vshuq werìí ìshøt lú:nòe.
39Vrá, yalòng sv̀ng leq shánø̀ng. Vkǿ dìlv́m rvtø̀ sv̀ng chø̀m àngkàngpèí la sháò nìnø, àng chø̀m sv̀ng vkǿ góng màdvzv́r lú:ngò ni we íe. #1Te. 5:2 40Welòng dø, nàmaqí mèlv́nnø̀ng rvtø̀ taq, Vsv̀ng Àngcèpè nø di daqe. Wervt kadvgvp gø tvlú dègǿshìnø̀ng,” a:lòe.
41Wekvt Piterí, “Kàngpèá, kàshvbóng yalòng nø nøngmaq sv̀ng èvlshà má? Mø̀íni vsv̀ng shvngbe sv̀ng èshø̀:nò má?” a:lòe. 42Kàngpèí, “Kv́mv́m vrvm nø̀ zit we chø̀m øpshú nø kagǿ íe má? Chø̀m àngkàngpèí àngò dvzømshúrì mvdv̀m øplv́m vmíng zíò nø̀ v́m rvtø̀ taq àngmaq sv̀ng v́mlv́m túnaò gǿ íe. 43Àngkàngpè vtv́ng daq kvt, dvzømshú gǿí wedø wàò we sv̀ng yv̀ng bǿò nìnø, dvzømshú wegǿ nø ìshøt vle. 44Ngàí jø̀ngjǿng vla:tnìni, àngkàngpè vdá dv́ngte shvngbe mvdv̀m taq àng sv̀ng øpshú wáshì dvzv́r lú:ngòe. #Mat. 25:21 45Íwe, ladv́ng dvzømshú wegǿí nø, ‘Ngà kàngpè vtv́nglv́m nø shini mvmang,’ wa dvda:mò sórí, dvzømshúpèla dvzømshúmèla sv̀ng vdi:pmò nø̀, àng nø vm aq nø̀ tvrushì nø̀ vle laq wa. 46Dvzømshú wegǿò àngkàngpè nø, à:ngí mvlá:nò we àngni nv̀ng mvdǿ:mò we rvtø̀ taq ngam wa tuq ra weí, àng sv̀ng àngshi vza:tnò nø̀ kv́mv́m màrvm rì nv̀ng tiqdø gur bǿòe.
47Àngkàngpè nøt sv̀ng sháò nìgø, màdvgǿshì, àngkàngpè nøt gø mvcà:nò we vshuq wegǿ sv̀ng nø, mvtøshí vdiplv́m í longe. #Yak. 4:17 48Íwe àngkàngpè nøt sv̀ng mvsháò ke vlé bǿò rvt vdip vdu nìnø, vrvmcè wa vdiplv́m í longe. Mvme vzíshaq rì taqkèní nø mvme gún lú:ngòe. Mvzv́n tvleshaq gǿ yv́ngkèní nø té mvzv́n røt lú:ngòe,” a:lòe.
Yesu rvtnø̀ vwálshì long we
Mat. 10:34-36
49“Ngà nø rvgaqtø̀m sv̀ng svmií wv́rlv́m dø̀ng dakngà. Akvt ladv́ng vkat nìnø Ngà dvbòngnø̀ng we! 50Íwe Ngà løpshì ràng we tìløp tiqlòng shini èv́lange, welòng màdvdv́ngò dv́ngte, Ngà sv̀ng vtvng kèní shènvlkenge. #Mat. 26:38; Yoh. 12:27
51Ngà nø rvgaqtø̀m sv̀ng mòngzø̀l lòng zílv́m dì daqì èlv́nshà má? Ngàí vla:tnìni, mø̀í. Vwálshì dvzv́rlv́m lè dø̀ng dakngà. #Mik. 7:6 52Akvt kèní kukaq tiqchø̀m taq pùngwàgǿ vl nìnø, vshø̀mgǿ nv̀ng vnígǿ vtùke nø̀ vwálshì longe. 53Àngpèí àngcèpè sv̀ng, àngcèpèí gø àngpè sv̀ng, àngmèí àngcèmè sv̀ng, àngcèmèí gø àngmè sv̀ng, àngnìmèí àngshv̀ngmè sv̀ng, àngshv̀ngmèí gø àngnìmè sv̀ng vtùò nø̀ vwálshì longe,” a:lòe.
Rvtø̀ dak rvwvn shá rà we kàshvbóng
Mat. 16:2-3
54Vrá, À:ngí vsv̀ng loksokrì sv̀ng, “Nv̀mløp lapmø rvmøt tiqpù bung long we èyv̀ng bǿnø̀ng ke, ‘Shø zaq daqe,’ wa chàng èshø̀nnø̀nge. Wedøni zaq daqe. 55Tìni nv̀mbø̀ng wa ra we èyv̀ng bǿnø̀ng ke, ‘Nv̀m gáng daqe,’ èshø̀nnø̀nge. Wedøni gáng daqe. 56Vnínøt ènøtnø̀ng rìé, muqlàng nv̀ng rvgaq mv̀rshv̀m sv̀ng nø dak rvwvn èshánø̀ng we, yabàn àng rvtø̀ sv̀ng nø pàwá dak rvwvn mèshánø̀ng má? 57Nàmaq vdèí vdu lòng sv̀ng pàwá rvwvn mèshánø̀ng má?
Shvrv́mshì rà we
Mat. 5:25-26
58Nà kaq èko gǿ nv̀ng dvrá vjì yv́ngsv̀ng èdìshì ke, tvrà ramø àng nv̀ng vrv́mlv́m dèzaqshì. Mø̀ínì à:ngí nà kaq dvrá vjì mv́rdv̀ngø dètuq bøe. Vrá, dvrá vjìpèí tung øpshú sv̀ng tèle nø̀ à:ngí tung èróng bøe. 59Ngàí vlvtnø̀ng, tiqbé gø mvngv́mshì høq mèwaqò dv́ngte tung kèní lo mèlún lú:ngò,” a:lòe.
Currently Selected:
Luka 12: GSM
Highlight
Copy
Compare
Share
Want to have your highlights saved across all your devices? Sign up or sign in
© 2025 Rvcv́ngcè Kàru Gomidi Kristu Shvngø̀mré. All Rights Reserved.
Luka 12
12
Vnínøt nøt rì kaq vyáshì rà we
Mat. 10:26-33; 10:19-20; Luk. 21:14-15
1Wervtø̀ taq, vsv̀ng loksokrì nø vlvmke høq, mvme kínggǿ dvkǿmshì ráì dvgvp, Yesuí Àng coqcv́nrì sv̀ng vzv̀ng a:lò we nø, “Parisirìò vnínøt nøt we butdvshi sv̀ng nàyáshìnø̀ng. #Mat. 16:6; Mak. 8:15 2Vwvmshaq pà ínìgø Gvrayí dvtan lú:ngòe. Vmáshaq pà ínìgø Gvrayí vjáng lú:ngòe. #Luk. 8:17 3Wedø tiqdvchá, nàmaqí dø vdòngø èshø̀nnø̀ng kàrì kapà ínìgø, lànglàng gá yv́ngø tá lú:ngòe. Kok rv́mø bønbøn wa èshø̀nnø̀ng rì nø chø̀m rv́gùng kèní dvshvng lú:ngòe.
4Lamboqrìá, Ngàí vla:tnìni, shagóng sv̀ng sha:tnò dá:ngí, pàgø vrá wá mvlú:nò rì sv̀ng mèsèrenø̀ngni. 5Nàmaq svre rà we nø kagǿ í we Ngàí dvshatna:tnìni. Sha:tnò dá:ngí zùpvng svmi móng sv̀ng gurlv́m vmíng vkv́ng vl pè Gvray kaq mv̀ng sèrenø̀ng. Jø̀ngjǿng Ngàí vla:tnìni, Àng sv̀ng sèrenø̀ng. 6Tvrøt pùngwàgo nø gv̀msùngshi vníbé taq na:mò we mø̀í má? Íwe, Gvrayí nø tvrøt tiqgo sv̀ng gø mànáò. 7Nàmaq vgoni shvngbe gø vrøshaq íe. Wervt mèsèrenø̀ngni. Nàmaq nø tvrøt mvme go mvdv̀m té nàpǿnø̀nge. #Luk. 21:18
8Ngàí vla:tnìni, vsv̀ng mv́rdv̀ngø Ngà sv̀ng nàchàng gǿ sv̀ng nø, Gvrayò muqlàng dvzv́rrì mv́rdv̀ngø Vsv̀ng Àngcèpèí gø wegǿ sv̀ng vchànglv́m íe. 9Vsv̀ng mv́rdv̀ngø Ngà sv̀ng èngál gǿ sv̀ng nø, Gvrayò muqlàng dvzv́rrì mv́rdv̀ngø Vsv̀ng Àngcèpèí gø wegǿ sv̀ng ngállv́m íe. #Luk. 9:26 10Vsv̀ng Àngcèpè kaq shvyǿmkà shø̀n gǿ sv̀ng nø chutna lúnshìe. Íwe, Shànshér Pvlàcè kaq shvyǿ:mò gǿ sv̀ng nø chutnalv́m màvl. #Mat. 12:32; Mak. 3:28-29
11Vrá vsà:ngí nàmaq sv̀ng júrøt chø̀mrì sv̀ng gø, øpshú dùrì nv̀ng vmíng vkv́ng vl rì mv́rdv̀ng sv̀ng gø èshøl bǿnø̀ng dvgvp, kadø garshìlv́m, kapà shø̀nlv́m wa nø̀ góng mèginø̀ngni. 12Kadø íe wani wervtø̀ taqni nàmaqí shø̀nlv́m kàrì Shànshér Pvlàcèí shèngøt daqnø̀nge,” a:lòe.
Mvgàm àngdálpè kàshvbóng
13Vsv̀ng loksok dvhø̀ kèní tiqgǿí Yesu sv̀ng, “Svrapèá, ngà sv̀ng zaqshøp vwálalv́m rvt ngà vnvmpè sv̀ng èshǿnangvtnà,” a:lòe.
14Yesuí, “Vjàé, kagǿí Ngà sv̀ng nàní mvdv̀mø kàrvtshú mø̀íni zaqshøp vwálashú èzv́ng bǿngà má?” a:lòe. 15Wekvt Yesuí àngmaq sv̀ng, “Map we àngpv̀npv̀n sv̀ng pán vshat nàyáshìnø̀ng. Kadø íe wani vsv̀ng gø̀nshaq nø àng vdá mvgàm lòng taq mànvng,” a:lòe. #1Tm. 6:9-10
16Wekvt À:ngí àngmaq sv̀ng kàshvbóng tiqlòng shø̀:nòe. “Mvgàm tiqpè nø àng rvmá kèní mvzí dvyø̀ gvzà dvkømv́m lún bǿà. 17Wekvt àng nøt vdòngø, ‘Ngà mvzí dvyø̀rì gv́lrà taq mvcv́nglv́m wáe. Kadø wàlv́m?’ wae.
18Vrá, ‘Ngàí yadø wàlv́m íe. Ngà vzárì catnò dá:ngí, té te dø wv̀ngò nø̀, ngà mvzí dvyø̀rì nv̀ng dvzøm dvzirì shvngbe weyv́ngø gvlshìlv́m íe. 19Wekvt ngà nø ngà vdè sv̀ng, “Nà nø mvme nǿng dvpvt dvzøm dvzi mvme dèkømv́m bǿì. Nà nø shøtshúcè èvl nø̀, èvm èaq sórí, dvbúdv̀ng èwa,” vlshìlv́m íe,’ wae.
20Íwe Gvrayí, ‘Sv̀ngdálé, nà gø̀nshaq nø dèyaqni vtv̀nglv́m íe. Wekvt nàí dvkømshaq rì nø kagǿ dvpvt ía dá:rò má?’ a:lòe.
21Wervtnø̀ vdè dvpvt wa pø̀yá pø̀nung shøpshì nø̀ Gvray dangø màmvgàm gǿ nø yalòng dø í longe,” a:lòe.#Mat. 6:20
Góng màgishaq Gvray móngdàn lá ra we
Mat. 6:20-21,25-33
22Vrá, Yesuí coqcv́nrì sv̀ng, “Wervtnø̀ Ngàí vla:tnìni, “Kapà v́mlv́m!” wa nø̀ gø̀nshaq dvpvt gø, “Kapà gwashìlv́m!” wa nø̀ góng dvpvt gø góng mèginø̀ngni. 23V́mlv́m mvdv̀m gø̀nshaq té vpǿe, gwálv́m mvdv̀m góng té vpǿe. 24Sv̀ngkárì sv̀ng èyv̀ngnø̀ng! Àngmaq nø wøn gø mvwønvm, dvkøm gø màdvkømvm, vzá gø màdá. Ínìgø, Gvrayí àngmaq sv̀ng dvkù:mòe. Nàmaq nø carì mvdv̀m gvzà nàpǿnø̀nge. #Shz. 147:9 25Góng dègishìnø̀ng weí, vdè bat sv̀ng tiqrvtø̀cè rvm èngutshìnø̀ng we kagǿ vle má? 26Cv́m vtvng yapv̀ncè dv́ng nàmaqí wá mèngutnø̀ng nìnø, dvgárì rvt pàwá góng dègishìnø̀ng má?
27Zømwàng nv̀mpurì kadø te long we sv̀ng dèdvmnø̀ng. Àngmaq nø dvzaq gø màdvzaqshì, yì gø mvyishì. Íwe Ngàí vla:tnìni, Solomon nø dvgùng gvzà ngø̀r dvgvp dv́ng, nv̀mpu tiqwvt dv́ngte gø àng gwashì mvlún yà:ngò. 28Kv́mnøt ècv̀mnø̀ng rìé, dèni cúnshì nø̀, nvpni nø svmi taq wv́rlv́m wa í we mvlì shønhàrì sv̀ng dv́ng Gvrayí yadø dvgwaò we í nìnø, nàmaq sv̀ng nø wemvdv̀m téwa dègwa daqnø̀ng we mø̀í má? 29Nàmaq nø pà v́mlv́m, pà aqlv́m walòng sv̀ng nøt mènàdǿnshìnø̀ngni, góng gø mèginø̀ngni. 30Rvgaq tø̀m taq Gvray mvsháò rìí nø yadv́ng pv̀n shvngbe sv̀ng láòe. Íwe, yadv́ng pv̀n èrànø̀ng we sv̀ng nàmaq Nvpèí vsháshaq íe. 31Àng móngdàn mv̀ng èlánø̀ng. Wekvt yadv́ng pv̀n nø nàmaq sv̀ng èzí daqnø̀nge.
32Vyv̀ngrécèrìé, mèsèrenø̀ngni. Pàwálv́m wani nàmaq sv̀ng móngdàn zílv́m nàmaq Nvpè wv́mshìe. #Luk. 22:29 33Nàmaq nàdánø̀ng rì ènvmnø̀ng nø̀ dvshá rì sv̀ng èzínø̀ng. Nàmaq dvpvt bøt mvsháò we gv̀msùng yǿng nv̀ng vkǿí gø mvníò, mǿ:ní gø màgvyaqò we muqlàng taqlap yv́ngø lv́ng mvtǿmshì we pø̀hvp mv̀ng èshøpshìnø̀ng. #Mat. 6:20-21 34Kadø íe wani nàmaq pø̀hvp kayv́ng vl nìnø, nàmaq nøt gø weyv́ngø vle.
Pán vshat caò we dvzømshú
Mat. 24:42-51
35Nàmaq nø juqnv́m ènv́mshìnø̀ng. Svmigwìnrì gø mànar laq gwa. 36Zvmì shvzøng bóy kèní vtv́ng ra we àngkàngpè tuq ra nø̀ bv́ngkà vkoknga:tnò ke, àng sv̀ng chàng tánalv́m caò we vshuqrì dø èwáshìnø̀ng. 37Àngkàngpè tuq ra kvt pán vshat nø̀ ca dáò we vshuqrì sv̀ng yv̀ng bǿò nìnø, vshuq werìí ìshøt lú:nòe. Ngàí jø̀ngjǿng vla:tnìni, àngkàng wepèí nø àng vshuqrì sv̀ng v́mpà v́mlv́m rúng dvzá:rò dá:ngí, àng nø juqnv́m nv́mshì nø̀ àngmaq sv̀ng à:ngí ni dvzøma:tnòe. #Yoh. 13:3-5 38Àng nø yaqdø̀ng mvlùng, mø̀íni vsháng gárí taq tuq ra nìgø, wedøni ca dáò we sv̀ng à:ngí yv̀ng bǿò nìnø, vshuq werìí ìshøt lú:nòe.
39Vrá, yalòng sv̀ng leq shánø̀ng. Vkǿ dìlv́m rvtø̀ sv̀ng chø̀m àngkàngpèí la sháò nìnø, àng chø̀m sv̀ng vkǿ góng màdvzv́r lú:ngò ni we íe. #1Te. 5:2 40Welòng dø, nàmaqí mèlv́nnø̀ng rvtø̀ taq, Vsv̀ng Àngcèpè nø di daqe. Wervt kadvgvp gø tvlú dègǿshìnø̀ng,” a:lòe.
41Wekvt Piterí, “Kàngpèá, kàshvbóng yalòng nø nøngmaq sv̀ng èvlshà má? Mø̀íni vsv̀ng shvngbe sv̀ng èshø̀:nò má?” a:lòe. 42Kàngpèí, “Kv́mv́m vrvm nø̀ zit we chø̀m øpshú nø kagǿ íe má? Chø̀m àngkàngpèí àngò dvzømshúrì mvdv̀m øplv́m vmíng zíò nø̀ v́m rvtø̀ taq àngmaq sv̀ng v́mlv́m túnaò gǿ íe. 43Àngkàngpè vtv́ng daq kvt, dvzømshú gǿí wedø wàò we sv̀ng yv̀ng bǿò nìnø, dvzømshú wegǿ nø ìshøt vle. 44Ngàí jø̀ngjǿng vla:tnìni, àngkàngpè vdá dv́ngte shvngbe mvdv̀m taq àng sv̀ng øpshú wáshì dvzv́r lú:ngòe. #Mat. 25:21 45Íwe, ladv́ng dvzømshú wegǿí nø, ‘Ngà kàngpè vtv́nglv́m nø shini mvmang,’ wa dvda:mò sórí, dvzømshúpèla dvzømshúmèla sv̀ng vdi:pmò nø̀, àng nø vm aq nø̀ tvrushì nø̀ vle laq wa. 46Dvzømshú wegǿò àngkàngpè nø, à:ngí mvlá:nò we àngni nv̀ng mvdǿ:mò we rvtø̀ taq ngam wa tuq ra weí, àng sv̀ng àngshi vza:tnò nø̀ kv́mv́m màrvm rì nv̀ng tiqdø gur bǿòe.
47Àngkàngpè nøt sv̀ng sháò nìgø, màdvgǿshì, àngkàngpè nøt gø mvcà:nò we vshuq wegǿ sv̀ng nø, mvtøshí vdiplv́m í longe. #Yak. 4:17 48Íwe àngkàngpè nøt sv̀ng mvsháò ke vlé bǿò rvt vdip vdu nìnø, vrvmcè wa vdiplv́m í longe. Mvme vzíshaq rì taqkèní nø mvme gún lú:ngòe. Mvzv́n tvleshaq gǿ yv́ngkèní nø té mvzv́n røt lú:ngòe,” a:lòe.
Yesu rvtnø̀ vwálshì long we
Mat. 10:34-36
49“Ngà nø rvgaqtø̀m sv̀ng svmií wv́rlv́m dø̀ng dakngà. Akvt ladv́ng vkat nìnø Ngà dvbòngnø̀ng we! 50Íwe Ngà løpshì ràng we tìløp tiqlòng shini èv́lange, welòng màdvdv́ngò dv́ngte, Ngà sv̀ng vtvng kèní shènvlkenge. #Mat. 26:38; Yoh. 12:27
51Ngà nø rvgaqtø̀m sv̀ng mòngzø̀l lòng zílv́m dì daqì èlv́nshà má? Ngàí vla:tnìni, mø̀í. Vwálshì dvzv́rlv́m lè dø̀ng dakngà. #Mik. 7:6 52Akvt kèní kukaq tiqchø̀m taq pùngwàgǿ vl nìnø, vshø̀mgǿ nv̀ng vnígǿ vtùke nø̀ vwálshì longe. 53Àngpèí àngcèpè sv̀ng, àngcèpèí gø àngpè sv̀ng, àngmèí àngcèmè sv̀ng, àngcèmèí gø àngmè sv̀ng, àngnìmèí àngshv̀ngmè sv̀ng, àngshv̀ngmèí gø àngnìmè sv̀ng vtùò nø̀ vwálshì longe,” a:lòe.
Rvtø̀ dak rvwvn shá rà we kàshvbóng
Mat. 16:2-3
54Vrá, À:ngí vsv̀ng loksokrì sv̀ng, “Nv̀mløp lapmø rvmøt tiqpù bung long we èyv̀ng bǿnø̀ng ke, ‘Shø zaq daqe,’ wa chàng èshø̀nnø̀nge. Wedøni zaq daqe. 55Tìni nv̀mbø̀ng wa ra we èyv̀ng bǿnø̀ng ke, ‘Nv̀m gáng daqe,’ èshø̀nnø̀nge. Wedøni gáng daqe. 56Vnínøt ènøtnø̀ng rìé, muqlàng nv̀ng rvgaq mv̀rshv̀m sv̀ng nø dak rvwvn èshánø̀ng we, yabàn àng rvtø̀ sv̀ng nø pàwá dak rvwvn mèshánø̀ng má? 57Nàmaq vdèí vdu lòng sv̀ng pàwá rvwvn mèshánø̀ng má?
Shvrv́mshì rà we
Mat. 5:25-26
58Nà kaq èko gǿ nv̀ng dvrá vjì yv́ngsv̀ng èdìshì ke, tvrà ramø àng nv̀ng vrv́mlv́m dèzaqshì. Mø̀ínì à:ngí nà kaq dvrá vjì mv́rdv̀ngø dètuq bøe. Vrá, dvrá vjìpèí tung øpshú sv̀ng tèle nø̀ à:ngí tung èróng bøe. 59Ngàí vlvtnø̀ng, tiqbé gø mvngv́mshì høq mèwaqò dv́ngte tung kèní lo mèlún lú:ngò,” a:lòe.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2025 Rvcv́ngcè Kàru Gomidi Kristu Shvngø̀mré. All Rights Reserved.