Malɨkɔ 14
14
Ɓɔsingekio Yeso lidimi
1Ya꞉ɓio yɔtukoeni tɨta makwaa kapɨnɨ akɔɓɔya akɔ ʉmbɔ wɔ chwɛa aɓubaya, ʉwa, wɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise. Ɓakumukumu ɨhɔ nɔ ɓapananakɨa ɓɔ mapanʉ, ɓa꞉ɓio ahata ɨgbaa ngɨyɛ ɓamʉfa-ɔɔ Yeso aɓaɗi, nɔ ɓɔ꞉mʉwa. 2Dɔ ɓa꞉ɓio asugo ɓɔ, ɓa꞉tɨmʉfamʉ pɛpɛ ta aɓisi ɓɔ ʉmbɔ, akumo ɓɔ ɓombi ɓatɨsɨkanakɨamʉ.
Moi ɔto Yeso nɔ malaji
3Atɨ Yeso ɓa꞉ɓio anɔ Bɛtania, atɨ mombi mʉngana ɨya a꞉ɓio jɛnɛ nɔ keɓukeɓu, ino ɓɔ Simoni. Tɨa angbinga ɔ dyakaka, ga moi mʉngana inani ambɛnɨ ɓɔ ngbuu. Moi ngɨananɨ, a꞉ɓio ɔpoteni supa wɔ malaji wɔ ɨgabʉ ɓʉmʉ, ʉwa, ɓa꞉ʉtambanaka nɔ mawʉa kɔta maɗo nɔgbɛ. Ɔ꞉ɓundo monu kɔ supa#14:3 ɔ꞉ɓundo monu kɔ supa: umbundo wɔ ɨgaɓʉ nɔgbɛ, ɓatɨuto ta imbi mɛngana angbinga ɔ hʉna mombi, ga ɨyɔ nɔ Yeso malaji amʉtʉ ɓɔ fʉɔ fʉɔ. 4Yaka ngɨyɛnɛnɨ, ya꞉kɨa ɓombi ngaɓɔmɔ ananɨ ta ɓɨɓɨ. Ɓɔ꞉ɓokwonoko ati eɓo ɓɔ: «Ɔyanakiso-sɨ malaji wɔ ɨgabʉ ɓanɨ dɔtanɨ? 5Ambɔ ɓɔʉgabɔ pɨ ta gaba akɔ ɓagyɛgyɛ lɨmɨa ɗietu, nɔ ɓagyɛgyɛ ɓɔngɔ, ɓɔɓinjekio ɓajanga. Kʉdɔ, ɓa꞉kwɨa moi ngɨananɨ ʉnganga kingono.» 6Yakamɛngana, ga Yeso naɓɔ ɓɔ: «Sɨeni-sɨ moi ngɨa sɨanɨ! Ná-sɨ nayɔ adamaniso ayaka yɔ ɨmanɨ? Ɨyɔ, ɔ꞉nakɨɔ ɨmɨ ta yaka yɛta iɗo. 7Inu náɓio nɔ ɓajanga masi ta maɓomu, nákwanana naɓɔ akɔsalɨa angbinga muɓomu ngɨa nábayaa-ɔɔ. Yakamɛngana, ɨmɨ, nangɔɓio ɨhɔ nenu masi maɓomu. 8Ɨyɔ, ɔ꞉kɨɔ ta yaka ngɨyɛ yɔkwananɔ pɛngɛ nɛmɨ akɨa. Ɔ꞉naɓasakɔ ɨmɨ, nɔ malaji akɔtambanaka ndʉtʉ ngɨyɛsɛmɨ, pɛɨ ngɨa ɓa꞊nahʉna suo-ɔɔ. 9Ya ɓanɨ, ɨmɨ, nanenu asigio ɓɔ akɔ lindu lɔ dɔdɔ liɓomu, aki ɓaɓɨɓɨakɨa sina-ɛɛ Ɨsaʉ yɛta Iɗo, ɓa꞊ɓɨchwa uduɓa wɔ yaka ngɨyɛ moi ngɨa ɔ꞉kɨɔ, kʉ chwanɨ, nayɔ akɔtunguo.»
Yuda ɔmanɔ akɔgaba Yeso
10Yuda ngɨa a꞉ɓio ino kʉ ɓɔ Ɨsɨkalɨɔta, mʉngana ɔ ɓatitima tɛkɛɓɛ nɔ ɓapɨnɨ, ɔ꞉sa akɔgbʉka ɓakumukumu ayaka yɔ gaba Yeso. 11Ɨyɛ ndʉ, ɓɔ꞉ka yaka ngɨyɛ ɛ꞉ka naɓɔ anʉngakɨa ɓɔ gba, kʉdɔ, ɓɔ꞉kwa ɨgyagya, nɔ, ɓɔ꞉kɔnɔ naɓɔ ga ɓaminjo ɓagyɛgyɛ. Kʉdɔ, ɔ꞉pʉnga ɨyɔ tɨta ahata ɨngbaa yɔ gaba Yeso.
Yeso ɔdyɔ idyo yɔ ʉmbɔ ɨhɔ nɔ ɓakpata
12Ya꞉ɓio ananɨ tɨa ɓisi ɓɔ mʉpʉnganɨa wɔ ʉmbɔ wɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise. Kʉ nɔ ɓisi ngʉɓɔnanɨ, ɓa꞉ɓiwa mwana ɔ kɔndɔlɔ ɔ ʉmbɔ wɔ chwɛa aɓubaya, kʉ nɔ ɓisi ngʉɓɔnanɨ. Ɓatitima ɓɛ꞉ka akɔɓokiso Yeso ɓɔ: «Wakʉnda ɓɔ tɨsa nɔwɛ atambanakɨa ʉmbɔ gbanɨ?» 13Kʉdɔ, ɔ꞉tʉma ɓombi ɓapɨnɨ ati eɓo, nɔ, ɔ꞉ɓusigio ɓɔ: «Seni inani amati ɔ gʉlʉ, nábijono nɔ atɨ gue mʉngana ɔtʉmbeni ʉpata wɔ mipo. Mʉkpateni ɨyɔ! 14Aki abikumonio-ɛɛ, sigieni makwɔ ɨkáá ngɨyɛnɛnɨ ɓɔ: ‹Mʉpananakɨa anɔwɛ anɨta ɓɔ: Ɨda ngɨyɛ a꞊dya-ɔɔ ʉmbɔ wɔ chwɛa aɓubaya ɨhɔ nɔ ɓakpata ngʉɓangɔ ya gbanɨ?› 15Ɨyɔ, anɨpanaka mbɛnɨ ata mʉja amati ɔ ɨkáá mɛngana yɛta ikongo ɓɔ. Mbɛnɨ ngɨananɨ a꞊ɓio mʉtambanakɛ muɗo, nɔ yaka iɓomu tɨta ʉndanɛ. Nábi nesu atambanakɨa ɨda yɔ ʉmbɔ inani.»
16Ɨyɛ ndʉ ɓakpata ɓa꞉ngwɨa kyɛnda, nɔ, ɓɔ꞉ɓɔya inani amati ɔ gʉlʉ, ɓɔ꞉gbʉka yaka iɓomu ta ndʉ aka Yeso a꞉ɓusigio-ɔɔ. Kʉdɔ, ɓɔ꞉pʉnga tɨta tambanakɨa ʉmbɔ wɔ chwɛa aɓubaya.
Yeso ɔɓɨɔ ɓɔ ɓanɨsa nayɔ agaba
17Tɨa nɔ ɨpasɨ ɓɔ dʉʉ, Yeso ɔ꞉tɔɓɔya tɨa ɨyɔ, ɨhɔ nɔ ɓatitima tɛkɛɓɛ nɔ ɓapɨnɨ. 18Tɨa akɔ angbinga ngɨa ɓa꞉ɓio-ɔɔ adyakaka akɔ mɛja, ga ɨyɔ naɓɔ ɓɔ: «Ingono, nanenu asigio, mombi mʉngana, ati eno, ɨya tadyakaka ɨhɔ nayɔ aka, anɨsa nɛmɨ agaba.»
19Kʉdɔ, ɓɔ꞉kwa ikoko, mombi nɔ mombi ati eɓo, ɔ꞉muɓokuo ɓɔ: «Ya ndɨ dɔ ɨmɨ? Ya ndɨ dɔ ɨmɨ?» 20Ga Yeso naɓɔ ɓɔ: «Ya ta mʉngana ati eno, ɔ ɓombi tɛkɛɓɛ nɔ ɓapɨnɨ. Mombi ɔngɔ adyakaka ta ɨhɔ nɛmɨ amati ɔ sanɨ aka.» 21Ɨmɨ Mwana ngɨyɔ Mombi, nɔmanɔ aniwo ngbanga ta ndʉ aka Mabii ka꞉tɛndanakɨa-ɔɔ akʉʉ asɛmɨ. Yakamɛngana, ikoko pɛpɛ dɔ akɔ mombi ngɨa anɛmɨ agaba! Ambɔ mombi ngɨananɨ, a꞉tɨnɔtanɨamʉ gɔ jɛnɛ pɔ nɔtanɨa!
Yeso ɔpʉngɔ nɨdya idyo yɔ ʉmbɔ ɨhɔ nɔ ɓakpata
22Akɔ angbinga ngɨa ɓa꞉ɓio-ɔɔ tɨa adyakaka, Yeso ɔ꞉sɨka mʉkatɨ, nɔ, ɔ꞉bibiso Asɔɓɨɨ, ɔ꞉ʉɓundo, nɔ ɔ꞉ɓinjekio ɓakpata. Nɔ ɔ꞉ɓusigio ɓɔ: «Sɨkeni, ɨyɛnɛnɨ, ya ndʉtʉ ngɨyɛsɛmɨ!» 23Mbise ɔngɔ, ɔ꞉tɔsɨka tɨa ʉpata, nɔ, ɔ꞉bibiso ɓata Asɔɓɨɨ, ɔ꞉tɔɓinjo, nɔ, ɓɔ꞉mwa ta ɓaɓomu. 24Kʉdɔ, a꞉ɓio naɓɔ ɓɔ: «Ʉkyɛpʉ ngʉwakɛ, wa menike ngʉkɔsɛmɨ, ʉka, kɔ Agɔmɛ ngɨyɔ ɨtakɨtakɨ, ʉka ka꞊njɨlaka akɔ yaka yɔ ɓombi ɓaja. 25Nanenu asigio ta ingono, na꞊ngɔmwa sina ɓata ʉkyɛpʉ ngʉwa, akɔɓɔya ta aka na꞊mwa sina-ɔɔ, ʉwa, wɔ ɨtakɨtakɨ akɔ Ɓʉngama ngʉɓɔ Asɔɓɨɨ.»
Pɛtɛlɔ ɔmanɔ atata Yeso
26Tɨa ananɨ, ɓɔ꞉sʉa ʉmbɔ#14:26 ʉmbɔ: Ɓayuda, angbinga ngɨa ɓa꞉ɓipipo-ɔɔ idyo yɔ Ʉmbɔ wɔ chwɛa aɓubaya, ɓɔ꞉sʉa Mambɔ, popoko Mmb 115—118 wɔ bibiso Asɔɓɨɨ. Mbise ɔngɔ, ɓɔ꞉chwɛa, nɔ ɓɔ꞉sa aɨkpangba yɔ Mijeituni. 27Ga Yeso naɓɔ ɓɔ: «Inu ɓaɓomu, nɔmanɔ suo anɨkwa ambamba. Dɔ, ya꞉tɛndanakɨa ɓɔ:
‹Na꞊wa mʉpɛmakɨa wɔ ɓakɔndɔlɔ.
Nɔ, mutunduga wɔ ɓakɔndɔlɔ, wɔ꞊gbengono.›#popoko Jak 13:7
28Gʉtʉ ɓanɨ, na꞊jʉkana akɔ ingwo ta jʉkananɨ, nɔ, nabi nenu aɓɛtaka tɨta anɔ Galilaya.» 29Ga Pɛtɛlɔ nayɔ ɓɔ: «Gʉtʉ báya ngɨyɛ ɓombi ngʉɓɔmɔ ɓaɓomu yɔkweni akʉʉ asɔɔ, pɛpɛ akɔ ɨmɨ, pɔ bele.» 30Yeso ɔ꞉mutosio ɓɔ: «Nanɔwɛ asigio ingono ɓɔ, naɓutu ngɨyɔ ɓʉɓʉnʉ, pɛɨ ngɨa kɔɓɔ anatɨa-ɔɔ machaa kapɨnɨ, ʉwɛ Pɛtɛlɔ, wa꞊natata machaa kaatʉ.» 31Ɨyɔ, Pɛtɛlɔ ɔ꞉kpakpa ta ɓɔ ndi, ɓɔ: «Gʉtʉ yɔɓieni ta ɓɔ ɨmɨ, niwo ɨhɔ nɔwɛ, pɛpɛ ɨmɨ nɔwɛ atata, fi fili fi.» Ɨɓɔ ɓaɓomu, ɓɔ꞉kwakɨa asugo ta yaka mɛngana ngɨyɛnɛnɨ.
Yeso anɨta Asɔɓɨɨ anɔ Gɛtɛsɛmanɨ
32Ɓɔ꞉tejoo tɨa aʉmʉa ngʉwa wa꞉ɓio ino ɓɔ Gɛtɛsɛmanɨ. Ga ɨyɔ nɔ ɓakpata ɓɔ: «Inu, uwolokeni aka, angbinga ngɨa ɨmɨ, na꞊ɓio akɔnɨta Asɔɓɨɨ.» 33Yakamɛngana, a꞉sɨka ta atɨ Pɛtɛlɔ nɔ Yakɔɓɔ nɔ Yɔanɨ, kʉdɔ, ɔ꞉pʉnga tɨa nɨkwa ʉɓá, ɨhɔ nɔ mbambanio. 34Ga ɨyɔ naɓɔ ɓɔ: «Mʉtɨma wɔnasioko nɔ ikoko tinene nɔ ingwo. Inu, tukoeni aka, nɔ, ɓieni ta ɓaɓɨsɨnɨ.» 35Mbise ɔngɔ, ɨyɔ anɨsɨngana ta nɔ pɛɨ ndʉ aka, ɔ꞉kwa aɨsɨ ga kpu, nɔ, ɔ꞉potio nɨta ɓɔ: «Yiɓio gɔ pɛngɛ adaa ngɨa, angbinga ngɨa ɔ ikoko akɛ, akɛlɔ-ɔɔ kɛlanɨ, mba!» 36Ga ɨyɔ ɓata ɓɔ: «Iii, akɔ ʉwɛ, Aba, yaka yɛta ɓʉkaɨ yangɔmʉ. Akelisio ɓaka ʉpata wɔ ɓʉkaɓʉkaɨ ngʉwa kelisioni. Yatiɓiomʉ dɔ ndʉ ɓʉkʉnda ɓɔsɛmɨ, yakamɛngana, yiɓio ndʉ ɓʉkʉnda ɓɔsɔɔ.» 37Ɨyɛ, a꞉tɔa nayɔ agbʉka ɓakpata, ɔ꞉ɓʉgbʉka ɓɔfanani tɔɔ. Ga ɨyɔ nɔ Pɛtɛlɔ ɓɔ: «Hoo, ha Simoni! Ɨyɛ yɔ tɔɔ yɔkwɔ pɛpɛ-sɨ tanɨ? Wangɔɓiomʉ gʉtʉ pɛngɛ ɓaɓɨsɨnɨ ta amati ɔ saa mʉngana ɓʉtʉʉ? 38Ɓieni ta ɓaɓɨsɨnɨ, nɔ, anɨta Asɔɓɨɨ, dɔ, nátɨkumoniomʉ ikanio! Mʉtɨma wa ɨwɔ ta nɔ angu, yakamɛngana, ndʉtʉ yanɔ majɛjɛ.» 39Ɔ꞉ɓʉsɨa ɓata, nɔ, ɔtoyo ɓata kʉ nɨta mɛngana ngɨyɛnɛnɨ. 40Ɔ꞉tɔa ɓata aki ɓakpata ɓa꞉ɓio-ɛɛ, nɔ, ɔ꞉ɓʉgbʉka ta atɔɔ. Dɔ, mesu ka꞉ɓio naɓɔ tɨa ngbangii ngbangii nɔ tɔɔ. Sɔkɔmʉ pɔ ɓɨmbɨa ɓɔ, ɓa꞉mutosio tanɨ. 41Ɔ꞉ka ɓata kyɛnda ngɨyɔ ɓeetu, ga ɨyɔ naɓɔ ɓɔ: «Eeɓe, ná ta amati ɔ tɔɔ, nɔ, nuhomuono! Angbinga ɔndanɔ dɔ tɨa ʉndananɨ-e! Ɨna, mwana ngɨyɔ mombi ɨyananɨ, ɓɔ꞉mʉgabɔ ɓanɨ alɨkɔndɔ lɔ ɓombi ɓɔta ɓɨɓɨ-e! 42Jʉkaneni, tɨseni! Ineni-sɨ, mombi ngɨa ɔ꞉nagabɔ ɨyakɛ, a tɨa tinene-a!»
Ɓɔfɔ Yeso
43Ta gagaa ngɨananɨ, Yeso ta ɓɔ angɔpipenimʉ akɔyaka, ga Yuda ɓɔ buu, mʉngana wɔ ɓakpata tɛkɛɓɛ nɔ ɓapɨnɨ ngʉɓangɔ. Ɨyɔ, a꞉ɓio ananɨ tɨa ɨhɔ nɔ ndiba ɔ ɓombi ɓɔ ɗite, tɨa akɔ mbɔtɨa, tɨa akɔ mangbe. Ɓangama ɓɔ ɓakumukumu nɔ ɓapananakɨa ɓɔ mapanʉ, ɨhɔ nɔ ɓagʉgʉ ɓɔ Ɓayuda, akɛ ɓa꞉tʉma ɓombi ngʉɓɔnanɨ. 44Yuda ngɨa a꞉mʉgaba a꞉ɓio ɓɔ enjekieni ɓangbanga ɓɔ: «Mombi ngɨa nabimuɓokuo nayɔ anɨmwa ɨngʉngʉ, ambɔ ɨyɔ ɨyananɨ, mufeni ta nɨfa, nɔ, nɔsa nayɔ ta nɨsa.» 45Ɨyɛ a꞉ɓɔya nayɔ, ɛ꞉sɨngana tinene nɔ Yeso, ga ɨyɔ ɓɔ: «Ha mʉpananakɨa!» Nɔ, ɔ꞉mʉmwa ɨngʉngʉ ta ɓanɨ. 46Kʉdɔ, ga ɓombi ngʉɓɔnanɨ, lɨkɔndɔ akʉʉ ɔ Yeso ga hrii, ga ɨɓɔ nayɔ ɓɔ kwɨ. 47Mombi mʉngana atɨ ɔ ɓakpata ngʉɓa ɓa꞉ɓio ananɨ, ɔ꞉chwɛiso mapi ga fʉa. Nɔ, ɔ꞉mʉtɨna mombi ɔ tɛa mʉngana ɔ ɓakumukumu uchwei ga chwaa. 48Kʉdɔ, ga Yeso naɓɔ ɓɔ: «Ya tanɨ ɨyɛ nɔ́꞉nɛkɨɔ-ɔɔ ɓɔ ngbutungbutu, nɔ mapi, nɔ mangbe, nɛmɨ anɨfa ndʉ niɓio mombi ɔ ndiɓo ɓanɨ? 49Sɨ maɓisi maɓomu ta꞉ɓio pɔngɔ ta ɨhɔ nenu, ɨmɨ, akɔpanɨa amati ɔ ɨkáá yɔ Asɔɓɨɨ ngɨyɛ yɛta ɨja, sɔkɔmʉ nɨnafa pɔ ɓisi pɔ mʉngana. Yakamɛngana, ya ta dɔ yaka ngɨyɛ ya꞉tɛndanakɨa amati ɔ Mabii, yɨkyananakɨa.» 50Kʉdɔ, ɓakpata ɓaɓomu ɓɔ꞉mʉsɨa, nɔ, ɓɔ꞉nanjana nɔ bangʉ ga waa.
51Ta nɛgbama mʉngana ngɨa akɛ a꞉ɓio ɓɔ ɔpɛnɨeni malɨkana, ɛ꞉sɨnganaka kpataka Yeso ambise. Ɓɔ꞉kanio ga ɓamʉfa, 52yakamɛngana, ɔ꞉ɓʉsɨa nɔ ɨpʉkʉ ga vu, ga ɨyɔ bangʉ munduu ga gɔɓɔɓɔ.
Ɓɔkio mʉkɔmbʉ ngʉwɔ Yeso
53Kʉdɔ, ɓa꞉ɓɔya nɔ Yeso atɨ kumukumu ngɨa ata mʉja ga buu. Tɨa ananɨ, ɓangama ɓɔ ɓakumukumu ɓaɓomu, ɨhɔ nɔ ɓagʉgʉ ɓɔ Ɓayuda nɔ ɓapananakɨa ɓɔ mapanʉ ɓaɓomu, ɓɔ꞉mɔmanakɨa ananɨ ga kyɔ kyɔ kyɔ. 54Pɛtɛlɔ a꞉ɓio naɓɔ akpataka ta ambise ɗu ɓɔ kɛlɛ. Ɨyɛ, e꞉joo akɔ ɨmbaa ngɨyɔ kumukumu ngɨa ata mʉja, ɨyɔ, Pɛtɛlɔ ɔ꞉sa awolo atɛa dyaa, ɨhɔ nɔ ɓombi ɓɔ tɛa.
55Ɓakumukumu, ɨhɔ nɔ ubua ngʉwa wɔta ʉja, ɓa꞉ɓio ahata ɓadɛmʉ ɓɔ mʉjɛɛ, dɔ, ɓɨna ɨngbaa ngɨyɛ ɓamuwisiso nayɔ Yeso. Sɔkɔmʉ ɓɨ꞉na ɨngbaa yɔngɔ pɔ bele. 56Dɔ ɓombi ɓaja, ɓa꞉ɓio nayɔ asingekio ta mʉjɛɛ. Yakamɛngana, ɓa꞉ɓiomʉ anʉkana ati eɓo. 57Ɓombi nganangana, ɓa꞉sa nayɔ asingekio mʉjɛɛ asugo ɓɔ: 58«Tɔ꞉ka pɛ ɨyɔ asugo ɓɔ: ‹Ɨmɨ na꞊panja suo ɨkáá yɔ Asɔɓɨɨ ngɨyɛ, ɓa꞉kɨa nɔ lɨkɔndɔ. Ambise ɔ makwaa kaatʉ, nɔ꞊tuɓoko yɔmɔ, sɔkɔmʉ ɓata ɨyɛ lɨkɔndɔ lɔ ɓombi ɓa꞉ɨkɨa.›» 59Gʉtʉ ta nɔ ɨngbaa ngɨyɛnɛnɨ, sɔkɔmʉ mʉjɛɛ ngʉweɓo wɨjɛa pɔ bele.
60Mbise ɔngɔ, ɨyɔ kumukumu ngɨa ata mʉja, ɛ꞉maa ga gba, ati ɔ ambaja ɔ ɓombi, ɔ꞉potio ɓɔkwoko Yeso yaka. Ga ɨyɔ nayɔ ɓɔ: «Wangɔ ndɨ atosio ɨkyɛmʉ? Wa-sɨ ʉwɛ, asugo tanɨ akɔ chɔngɨa ngɨyɛ ɓanɔwɛ achɔngɨa nayɔ ɨpɛ ɓɔ?» 61Yeso ɔ꞉gbaa ta ɓɔ woo, sɔkɔmʉ imutosio yaka pɔ mɛngana. Yakamɛngana, kumukumu ngɨa ata mʉja ɔ꞉muɓokuo ɓata kʉ ɓɔ: «Wa ndɨ Klisito, mwana Asɔɓɨɨ ngɨa ɓamubibiso?» 62Kʉdɔ, Yeso a꞉ɓio nayɔ ɓɔ: «Ya ɓanɨ, nɛ́꞊na sina mwana ngɨyɔ mombi ɓawele aɨkɔndɔ yɔ guongɔ, yɔ Asɔɓɨɨ ngɨa ɔ angu, nɔ, anɨka amati ɔ lɨkʉɓa lɔ ɓisi.» 63Kʉdɔ, kumukumu ngɨa ata mʉja ɔ꞉natʉa lɨpʉkʉ ngɨlangɔ ga hua hua, ga ɨyɔ ɓɔ: «Tahata dɔ ɓata ɓadɛmʉ nga ɓeno tanɨ? 64Sɨ nɔkɔ aki ɔ꞉sɛaka-ɛɛ Asɔɓɨɨ tɛ. Inu, nɛ́nɔ tanɨ?» Ga ɓombi ɓaɓomu ɓɔ: «Ɔsisekio ta nɔ ingwo!»
65Ɓombi ngaɓɔmɔ ati eɓo ɓɔpotio nayɔ tokoko nɔ maɗaʉ gbɛgbɛ ta ananɨ. Ɓɔ꞉mʉsanga mesu nɔ ʉgbaa wɔ ɨpʉkʉ, nɔ ɓɔ꞉potio nayɔ ɓɛnda makɔfɨ ɓɔ mba mba, nɔ, ɓɔ꞉muɓokiso ɓɔ: «Kwa ɨgbɛ, nɔ, wɔchwa mombi ngɨa ɔnaɓɛndɔ!» Nɔ ɓapɛmakɨa, ɓɔ꞉mʉtɛtɨa ta nayɔ natʉa lɨkɔndɔ ɓɔ hua hua.
Pɛtɛlɔ ɔtatɔ Yeso
66Angbinga ngɨa Pɛtɛlɔ a꞉ɓio-ɔɔ ta inani akɔ ɨmbaa, moi mʉngana, mombi ɔ tɛa ɔ kumu-kumu, ɛ꞉ka. 67Ɛ꞉na Pɛtɛlɔ ananɨ a꞉ɓio-ɔɔ atɛa dyaa, ɔ꞉mʉkanga ɓɔ ngbee, ga ɨyɔ nayɔ ɓɔ: «Ʉwɛ ananɨ wa-ɔɔ, ná꞉ɓio pɛ ta ɨhɔ nɔ atɨ Yeso ngɨa Mʉnajalɛtɨ.» 68Pɛtɛlɔ ɔ꞉tata mesu ta ɓɔ ngbakalʉ, ga ɨyɔ ɓɔ: «Nangɔmʉ ɨmɨ nayɔ anɨmbɨa, nɔ, nangɔmʉ anɨmbɨa ɓɔ wakʉnda asugo tanɨ.» Mbise ɔngɔ, ɔ꞉sa anambamba ɔ umongu ngʉwa wɔta ʉja. Nɔ, kɔɓɔ akɔnatɨa. 69Moi mʉngana ngɨa ta ananɨ, ɔ꞉tɔmɨna ɓata ta ɨnanɨ, ga ɨyɔ nayɔ ɓɔ: «Gue ngɨa, a ta mʉngana ɔ ɓombi ngʉɓɔnanɨ.» 70Pɛtɛlɔ ɔ꞉tata ɓata kʉ tata. Agbalanɨa ndʉ aka, ɓombi ngʉɓa ɓa꞉ɓio ananɨ, ɓɔ꞉musigio ɓata kʉ ɓɔ: «Ya ta ingono ɓɔ, ʉwɛ, wa mʉngana ɔ ɓombi ngʉɓɔnanɨ, dɔ ʉwɛ, wa kʉ Mʉgalilaya.» 71Kʉdɔ, ɨyɔ Pɛtɛlɔ ɔ꞉kio silika ɓɔ: «Asɔɓɨɨ ɨnakɨa ɓʉɓɨɓɨ nɔsugeni mʉjɛɛ! Manja ta aba, ɨmɨ nangɔmʉ anɨmbɨa gue ngɨananɨ, nákɔsugo yaka yangɔ pɔ bele.» 72Pɔ gbalanɨa ndʉ aka, kɔɓɔ ngɨyɔ ɓepini ɔ꞉natɨa ɓata. Nɔ, Pɛtɛlɔ ɔ꞉tunguo yaka ngɨyɛ Yeso a꞉musigio ɓɔ: «Pɛɨ ngɨa kɔɓɔ anatɨa-ɔɔ machaa kapɨnɨ, wa꞊natata machaa kaatʉ.» Kʉdɔ, ɔ꞉chwɛa aɓei gagaa, nɔ, ɔ꞉potio tɨta ndɨa.
Currently Selected:
Malɨkɔ 14: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
