Luka 5
5
Yeso esoko ɓakpata ngʉɓɔ pɛɨ
(Mat 4:18-22; Mlk 1:16-20; Yɔa 1:40-42)
1Ɓisi mʉngana, Yeso a꞉ɓio amutii wɔ ipuu yɛta ɨja, ino ɓɔ Gɛnɛjalɛtɨ.#5:1 Gɛnɛjalɛtɨ: pɔ ɓɔ Ɨgalilaya Ga ambaja ɔ ɓombi anɔ ambamba angɔ ɓɔ kuuu, anʉka mapanʉ kɔ Asɔɓɨɨ. 2Ɛ꞉na lɨngbɔɔ ɗepini, lɨfɔmakɛ amutii wɔ ipuu ɓɔ. Ɓombi ɓɔ sipe ɓa꞉ɓio ɓɔ ɓɔchwʉchwakeni amati ɔngɔ, ɨɓɔ tɨa agyaɓaka mayia ngɨyeɓo. 3Ɔ꞉ɗeto akɔ ɨngbɔɔ mɛngana ngɨyɛ ya꞉ɓio yɔ Simoni, nɔ, ɔ꞉mɨta ɓɔ itutuo ɨngbɔɔ bele ati ɔ lisini. Yeso ɔ꞉wolo amati ɔ ɨngbɔɔ, nɔ, ɔ꞉pʉnga panɨa ambaja ɔ ɓombi.
4Ndʉ a꞉pipo yaka, ɔ꞉musigio Simoni ɓɔ: «Tutuo ɨngbɔɔ akɔ ʉmʉa ngʉwa wɔta ɗu ɗu ɗu, nɔ, giseni mayia ngɨyeno amati ɔ mipo anɨfa sipe.»
5Simoni ɔ꞉mutosio ɓɔ: «Mʉpananakɨa, angu ɔ꞉tisio pɛngɛ ta ɓʉtʉʉ naɓutu iti. Yakamɛngana, dɔ ʉwɛ wɔsugo, nagiso gɔ ɓata-sɨ mayia ta gisoni.» 6Ɨɓɔ agiso mayia ta giso ɓɔ, ga sipe ɓee! Mayia yɛ꞉ka tinene atinyoo. 7Ɨyɛ ɓɛ꞉na ɓanɨ, ɓɛ꞉soko ɓangɛ ngʉɓa ɓa꞉ɓio aɨngbɔɔ ngɨyɛmɔ nɔ lɨkɔndɔ, naɓɔ anɨkɨa isingo. Ɓɛ꞉ka, nɔ, ɓɔ꞉hukiso lɨngbɔɔ ngɨleɓo ɗepini, nɔ sipe ta ɓɔ kyɛɛ kyɛɛ, tinene ɓɔ lɨmwaka mipo. 8Angbinga ngɨa Simoni ngɨa ino ɓɔ Pɛtɛlɔ, ɛ꞉na-ɔɔ yaka ngɨyɛnɛnɨ, ɔ꞉gbʉkʉmɨa amɨtɨndɨ yɔ Yeso, nɔ, ɔ꞉musigio ɓɔ: «Hii, Makwasɛmɨ, kɛla ɓaka tinene nɛmɨ, dɔ ɨmɨ, na mombi ɔ ɓʉɓɨɓɨ.»
9Akɔnɨna sipe yɛta ɨja ngɨyɛnɛnɨ ɓa꞉fa, Simoni, ɨɓɔ nɔ ɓombi ɓaɓomu ngʉɓa ɓa꞉ɓio ɨhɔ nayɔ, yɔ꞉ɓʉmbangɨa ta mbangɨa. 10Gʉtʉ ta ɓawai ɓeɓo atɨ Yakɔɓɔ, nɔ Yɔanɨ, ɓana ɓɔ Jɛbɛdayɔ, yɔ꞉ɓʉmbangɨa kʉ mbangɨanɨ. Ga Yeso nɔ Simoni ɓɔ: «Watɨkwamʉ ʉɓá, dɔ, anɨngwa ɨtakɨtakɨ ngɨyɛ, wa꞊ɓio nɛmɨ ahatɨa tɨa ɓombi, kʉndʉ wa꞉ɓio pɛ anɨfa sipe.»
11Ɨyɛ ndʉ ɓɛ꞉ka afɔmaka lɨngbɔɔ amutii wɔ lisini, ɓɔ꞉sɨa lɨkyɛmʉ liɓomu nɔ, ɓɔ꞉pʉnga kpataka tɨta Yeso.
Yeso ɔheiso mombi ɔ keɓukeɓu
(Mat 8:2-4; Mlk 1:40-44)
12Ɓisi mʉngana, Yeso a꞉ɓio amati ɔ gʉlʉ mʉngana ɓɔ, gue mʉngana ngɨa a꞉ɓio nɔ keɓukeɓu ndʉtʉ ta iɓomu, ɔ꞉tɔchwɛanɨa ga wɛɛ. Ndʉ amɨna Yeso, ɔ꞉gbʉkʉmɨa nɔ mau, mesu akɔ ɛsɨ, nɔ, ɔ꞉mʉndɨanɨa ɓɔ: «Hii Makwɔɓɨɨ, wɔkʉndeni, anagyaɓaka ɓaka kaɓu ngɨa gyaɓakanɨ.»
13Yeso ɔ꞉yomo ɨkɔndɔ nayɔ aɓoto, ga ɨyɔ ɓɔ: «Ii, nɔbayɔ bayanɨ, gyaɓanakɨa!» Ta gagaa ngɨananɨ, keɓukeɓu ɔ꞉mʉngwa mombi ngɨananɨ ta nɨngwa. 14Kʉdɔ, Yeso ɔ꞉minjo ʉpanʉ ɓɔ: «watɨɓɨamʉ mombi pɔ mʉngana yaka ngɨyɛnɛnɨ, yakamɛngana, sa atɨ kumukumu ɨnakangaka. Nɔ, aka wɔhɛyɔ-ɔɔ keɓukeɓu, injo mutebii ngʉwɔ mʉgyaɓa, akɔkpatanakɨa nɔ mapanʉ kɔ Musa#5:14 mapanʉ kɔ Musa: ya꞉ɓitanɨa aninjo mutebii, ambise ɔ hɛa keɓukeɓu. Ɨyɛnɛnɨ, yapananiso aɓʉmba ɓɔ wɔhɛyɔ hɛyanɨ.»
15Awɨa ngɨyɔ Yeso, ɔ꞉pʉnga nɨsa tɨta nɨsa. Ambaja ɔ ɓombi ata mʉja tɨa hooo, anɨka anʉka mapanʉ, nɔ akɔhata ɓɔ ɓɨɓuheiso ɓakaɓu. 16Yakamɛngana, ɨyɔ Yeso, ɔ꞉ɓio ta anɨsa anɨta Asɔɓɨɨ, aɨda ngɨyɛ aki ɓombi ɓangɔmʉ-ɛɛ.
Yeso ɔhɛiso mombi ɔ majangi
(Mat 9:2-8; Mlk 2:3-12)
17Ɓisi mʉngana, Yeso a꞉ɓio akɔpanɨa, Ɓafalisayɔ nɔ ɓapananakɨa ɓɔ mapanʉ ɓa꞉weleke kʉ ananɨ. Ɓa꞉ngwa alɨkʉmbʉ liɓomu ngɨlɔ Galilaya, Yudɛa nɔ Yelusalɛma. Angu ngɨyɔ Makwɔɓɨɨ, ɛ꞉nɨanɨa akʉʉ ɔ Yeso ɨngbaa akɔheiso ɓombi ɓɔ ɓakaɓu. 18Ndʉ aka nasugo-ɔɔ aka, ga ɓague nɔ kalagba ɓɔ chikichiki, ɓɔ꞉tʉmbeni mombi ɔ kaɓu ngɨa lɨsɨgɨsɨgɨ lɔ ndʉtʉ la꞉mʉkatanaka. Ɓa꞉ɓio ahata ga ɓakumonio ta aki Yeso a꞉ɓio-ɛɛ, nɔ ga ɓamudiso ta apɛɨ angɔ. 19Yakamɛngana, ndʉ ɨngbaa ya꞉kɛnɨɔmʉ nayɔ akumoniso, akɔ yaka yɔ ambaja ɔ ɓombi, kʉdɔ, ɓa꞉ɗeto nayɔ tɨta akʉʉ ɔ ʉpaʉ, ɓɔ꞉gana ihoo, nɔ, ɓɔ꞉mudiso nɔ kalagba apɛɨ ɔ Yeso ga kputuku. 20Ndʉ ɛ꞉na báya ngɨyɛnɛnɨ yeɓo ɓanɨ, kʉdɔ ga ɨyɔ, nɔ mombi ɔ kaɓu ɓɔ: «Ha gue, ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ.»
21Ɓafalisayɔ nɔ ɓapananakɨa ɓɔ mapanʉ, ɓɔ꞉pʉnga tɨa ɓokuono akɔsugo ɓɔ: «Gue ngɨa ɔ꞉sugo-sɨ ɓanɨ, dɔtanɨ? Ɨyɛnɛnɨ, ya sɛyaka Asɔɓɨɨ! Anɨ akɛ ɛneni, ɛpaakɨa mombi ɓʉɓɨɓɨ, yɔkɔɓienimʉ ta Asɔɓɨɨ nangana?»
22Yakamɛngana, ndʉ Yeso ɛ꞉mbɨa itungwio ngɨyeɓo, kʉdɔ, ɔ꞉ɓusigio ɓɔ: «Ɨkananja yɔ itungwio ngɨyɛ nánayɔ amati eno ɓanɨ, yɛkɔ gbanɨ? 23Ɨmanɨ dɔ-sɨ, ya siasia, ga pɔ asugo ɓɔ: ‹Ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ›, ga pɔ ɓɔ: ‹Ɨmaa, nɔ kyɛndaka?› 24Ɛɛ, ɨmbɨeni dɔ iɗo ɓɔ, Mwana ngɨyɔ Mombi, anɔ ʉpanʉ wɔ nɨpaakɨa ɓʉɓɨɓɨ amati ɔ dɔdɔ ngɨa.» Kʉdɔ, ɔ꞉sigio jikɛsɨ ɓɔ: «Nanɔwɛ asigio ɓɔ: ‹Ʉngwa ɨkʉʉ, nɔ, sɨka kalagba ngɨasɔɔ, nɔ, wɔtɔa andɔɔ andei.›»
25Ta akɔ angbinga ngɨananɨ, mombi ngɨananɨ ɔ꞉ngwa ɨkʉʉ ta amesu keɓo. Ɔ꞉tʉmba kalagba ngɨa a꞉ɓio-ɔɔ ɓakwaɛ, kʉdɔ, ɔ꞉sa andɔngɔ ɨyɔ tɨta akɔbibiso Asɔɓɨɨ. 26Yaka ngɨyɛnɛnɨ, yɔ꞉mbangɨa ɓombi ɓaɓomu. Ɓɔ꞉bibiso Asɔɓɨɨ, nɔ, ɓɔ꞉huo nɔ ʉɓá, ga ɨɓɔ ɓɔ: «Tɛ꞉nɔ ɓaka yaka yɛta ɨmbangɛ ɓʉɓʉnʉ-e!»
Nisokonio ngɨyɔ Lawi
(Mat 9:9-13; Mlk 2:14-17)
27Ambise ɔ yaka ngɨyɛnɛnɨ, Yeso ɔ꞉chwɛa, ɔ꞉tɛna mombi ɔ lipisa manjanja mʉngana, ino ɓɔ Lawi, ɓawele aɨda yɔ lipisa manjanja ngɨangɔ. Ga ɨyɔ nayɔ ɓɔ: «Ha gue, anakpata!» 28Kʉdɔ, ɔ꞉sɨa ɓayaka ɓaɓomu, ɛ꞉maa, nɔ, ɔ꞉mʉkpata.
29Lawi ɔ꞉mudyisio Yeso ʉmbɔ wɔta ʉja andɔngɔ, nɔ ambaja ɔ ɓombi ɓɔ lipisa manjanja, nɔ ɓombi ngaɓɔmɔ, ʉɓa ɓa꞉ɓio akɔdyakaka ɨhɔ naɓɔ. 30Kʉdɔ, Ɓafalisayɔ nɔ ɓapananakɨa ɓɔ mapanʉ ngʉɓeɓo, ɓɔ꞉pʉnga ndʉndwanakɨa Yeso anɔ ambamba ɔ ɓakpata ngʉɓangɔ akɔsugo ɓɔ: «Nákɔdyakaka nɔ nɨmwa, ɨhɔ nɔ ɓombi ɓɔ lipisa manjanja, nɔ ɓombi ɓɔta ɓɨɓɨ ɓɔ, dɔtanɨ?»
31Yeso ɔ꞉ɓutosio ɓɔ: «Ɓombi ɓɔta ɓʉmʉ ɓʉmʉ ɓangɔhatamʉ akɔnɨnana nɔ mʉnganga, yakamɛngana, ta ɓombi ɓɔ ɓakaɓu. 32Nɛ꞉kamʉ anɨsoko ɓombi ɓɔta ngbingbii, yakamɛngana, nɛ꞉ka anɨsoko ɓombi ɓɔta ɓɨɓɨ ɓɔ ɓɨnataniso mɨtɨma.»
Ɓafalisayɔ ɓɔɓokuo yaka akʉʉ ɔ taa idyo
(Mat 9:14-17; Mlk 2:18-22)
33Kʉdɔ, Ɓafalisayɔ ɓɔ꞉musigio Yeso ɓɔ: «Ɓakpata ngʉɓɔ Yɔanɨ nɔ ʉɓeso, ɓakyɔtaa idyo akɔ angbinga gagaa gagaa akɔ yaka yɔ nɨta Asɔɓɨɨ. Yakamɛngana, ɓakpata nga ɓɔsɔɔ, ɓakɨa ɨɓɔ ta dyakanaka nɔ mwakanaka.»
34Yeso ɔ꞉ɓutosio ɓɔ: «Nákwanana ndɨ titio ɓombi ngʉɓa, ɓa꞉ɓisoko akɔ ʉmbɔ wɔ mʉsɨkana ataa idyo akɔ angbinga, ɓɔɓieni-sɨ kʉ ɨhɔ nɔ atɨ makwɔ ɔ mʉsɨkana? 35Yakamɛngana, ya꞊ɓio sungo nɔ ɓisi mʉngana, ʉɓa, ɓa꞊ɓungusio-ɔɔ swaɨ ɔ moi, ambɔ kyɛnda ngɨyeɓo, akɔtaa idyo akɔ angbinga, tɨa ɨyɛnɛnɨ.»
36Kʉdɔ, Yeso ɔ꞉ɓusigio nɔ isisenio ɓɔ: «Mombi pɔ mʉngana angɔkwananamʉ anatʉa ɨpʉkʉ yɔ ɨtakɨtakɨ, nɔ, ɔnapɨa tɨa ɨɗaka yɔngɔ akʉʉ ɔ ɨnjanjaka yɔ ɨpʉkʉ. Ɔkɨeni ɓanɨ, ɨpʉkʉ ngɨyɛ ɨtakɨtakɨ yanatʉanɨa, nɔ ɓata ʉgbaa ngʉwɔnanɨ wɔ ɨtakɨtakɨ wangɔsisekiomʉ akʉʉ ɔ ɨpʉkʉ ngɨyɛ ɨjɛnɛ, kʉɓanɨ. 37Ngbanga kʉɓanɨ, mombi pɔ mʉngana angɔkwananamʉ nuto ʉkyɛpʉ wɔ ɨtakɨtakɨ, amati ɔ lɨkɔchɔ lɛjɛnɛ, ngɨlɛ ɓa꞉lɨkɨa nɔ mamba kɔ ɓanama. Dɔ, ɔkɨeni ɓanɨ, ʉkyɛpʉ ngʉwɔnanɨ wɔ ɨtakɨtakɨ, wafʉa nɔ wanatʉa lɨkɔchɔ ngɨlɛnɛnɨ. Nɔ ʉkyɛpʉ wayabuo akɔ ɛsɨ, nɔ, lɨkɔchɔ lɔyanaka tɨa kʉ yanakanɨ. 38Yakamɛngana, yɔsisekio nuto ʉkyɛpʉ wɔ ɨtakɨtakɨ kʉ amati ɔ lɨkɔchɔ lɔ ɨtakɨtakɨ. 39Nɔ, mombi pɔ mʉngana ɔmweni ʉkyɛpʉ ngʉwɔ ɨjɛnɛ, angɔbaya ɓata nɨmwa ʉwɔ ɨtakɨtakɨ, dɔ, asugo ta ɓɔ: ‹Ʉwɔ ɨjɛnɛ akɛ, wa uɗo.›»
Currently Selected:
Luka 5: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
