Luka 3
3
Yɔanɨ ɔɓɨakɨɔ ɨsaʉ
(Mat 3:1-10; Mlk 1:3-8)
1Ya꞉ɓio akɔ igo ngɨyɔ tɛkɛɓɛ nɔ ɓɔkʉ, yɔ ɓʉngama ngʉɓɔ ngama ata mʉja ngɨyɔ Ɓalɔma, ino ɓɔ Tibelio, angbinga ngɨa Pɔsɨ Pilato a꞉ɓio-ɔɔ ngama ngɨa ɔ Yudɛa. Hɛlɔdɛ a꞉ɓio ɨyɔ ngama anɔ Galilaya, nɔ mwana ɔ ɨsɛ Filipo, ngama ɔ ihoi yɔ Ɨtʉlɛa nɔ Talakoniti, nɔ, Lisania a꞉ɓio ɨyɔ ngama ɔ Abilɛnɛ. 2Angbinga ngɨananɨ, Ana nɔ Kayafa ɓa꞉ɓio ɨɓɔ ɓangama ɓɔ ɓakumukumu anɔ Yelusalɛma. Yaka yɔ Asɔɓɨɨ, ya꞉mijeyo Yɔanɨ mwana ɔ Jakalɨa, amukengu. 3Kʉdɔ, Yɔanɨ a꞉pʉnga nɨsa akɔɓɨakɨa ɓombi ɨsaʉ, aihoi ngɨyɛ ya amutii wɔ Yɔlɔdanɨ ɓɔ: «Kweni uɓatiso, akɔpananiso ɓɔ nánecho mʉkyananakɨa ngʉweno nachoni, iɗo ambɔ Asɔɓɨɨ ɨnɨpaakɨa ɓʉɓɨɓɨ ngʉɓeno.» 4Kʉndʉ yatɛndanakɨa amati ɔ ɨtaɓʉ ngɨyɔ Ɨgbɛ Isaya ɓɔ:
«Mombi akɔtʉɓɨa inani amukengu ɓɔ:
‹Tambanakeni ɨngbaa ngɨyɔ Makwɔɓɨɨ,
yomokeni lingbaa ngɨlɛ lɛta lipingonokie ɓɔ gɔ gɔ,
5kuteni libadu liɓomu nɔ ɨtaka,
kwaiseni lɨkpangba ngɨlɛ lɛta lɨkpɔkpɔ nɔ ɨlɛ lɛta bele bele, liɓomu ngbanga.
Yomokeni lɨngbaa ngɨlɛ lɛta lipingonokie,
nɔ lɨngbaa ngɨlɛ lanɔ mapɨa ɓilihitio ngbanga.
6Nɔ ɓombi ɓaɓomu, ɓɛ꞊na sina aka Asɔɓɨɨ a꞊heiso-ɔɔ ɓombi.›»#popoko Isa 40:3-5
7Ɓombi ɓaja ɓa꞉ɓio anɨka atɨ Yɔanɨ ɓɔ iɓuɓatisa, ga ɨyɔ naɓɔ ɓɔ: «Inu ʉmbɛkɛ wɔ ɓasɨɨ ngʉwa! Anɨ akɛ ɔnititio atʉgbʉa ʉnganga ngʉwɔ Asɔɓɨɨ, wa suo anɨka? 8Pananiseni gɔ mʉkyananakɨa ngʉwa wembiiso ɓɔ ná꞉nataniso mʉtɨma natanisoni. Nɔ, Nátɨtunguomʉ amati ɔ mɨtɨma ngɨyeno ɓɔ, isu ta ɓanɔnɔ ɓɔ Abalaama. Dɔ, nanenu asigio ingono ɓɔ, Asɔɓɨɨ akwanana kʉɔ achweiso ɓanɔnɔ ɓɔ Abalaama, ta amati ɔ makopi ngʉka. 9Ɨtakɨtakɨ ngɨyɛ, angbaka a tɨa mʉgɛ, akɔɓɛtɨa kwaka matɨ alitindindi lɔngɔ. Ɓʉtɨ ngʉɓa ɓangɔɓiomʉ anumo lipumo lɛta liɗo, ɓa꞊ɓʉkwaka, nɔ, ɓɔ꞊ɓugiso adyaa.»
10Kʉdɔ, ambaja ɔ ɓombi a꞉muɓokuo Yɔanɨ ɓɔ: «Tɔsisekio dɔ kɨa tɨa tanɨ?»
11Ɔ꞉ɓutosio ɓɔ: «Mombi ngɨa anɔ lɨpʉkʉ ɗepini, iminjo mangɛ ngɨa angɔmʉ nayɔ, nɔ, mombi ngɨa anɔ idyo, ɨkɨa kʉɓanɨ.»
12Nɔ ɓombi ɓɔ lipisa manjanja ɓɔ꞉mɨkɨa kʉ ɓɔ iɓuɓatiso. Ga ɨɓɔ nayɔ ɓɔ: «Mʉpananakɨa, isu tɔsisekio kɨa tanɨ?»
13Ɔ꞉ɓutosio ɓɔ: «Nátɨtamʉ ɓagyɛgyɛ akɔchana ʉɓa ʉpanʉ wakɔnɨta.»
14Ɓasʉda ɓɔ꞉muɓokuo ɓɔ: «Nɔ isu, tɔsisekio kɨa tanɨ?»
Ɔ꞉ɓutosio ɓɔ: «Nátɨhɨnɨamʉ mombi lɨkyɛmʉ nɔ ɓʉkaɓʉkaɨ, pɔ akɔsingekio mombi mʉjɛɛ. Yakamɛngana, kweni inu ɨgyagya tanɔ mʉkaya ngʉweno.»
15Ɓombi ɓa꞉ɓio aɓɛtɨa nɔ mʉsasa nɔgbɛ, nɔ mombi nɔ mombi aɓokuono amati ɔ mʉtɨma ɓɔ: «Yɔanɨ a mbɨ ndɨ dɔ Klisito?» 16Kʉdɔ, Yɔanɨ ɔ꞉ɓusigio ɨɓɔ ɓaɓomu ɓɔ: «Ɨmɨ, nanenu akɔɓatiso amati ɔ mipo, yakamɛngana, mombi ngɨa a꞊nɨka, anɔ angu nɔgbɛ nɛmɨ anagaaka. Ɨmɨ, nɔsisekiomʉ pɔ akɔɓoo muki wɔ lɨkpakʉ ngɨlangɔ. Ɨyɔ, a꞊nɨɓatiso suo nɔ Mʉtɨma wɔta Tu nɔ dyaa. 17Ɨyɔ anɔ lungu alɨkɔndɔ, akɔnagbonyoko mʉpʉnga, nɔ lifoko lɔngɔ. A꞊mɔma sina mʉpʉnga aɨkáá yɔ masɔɔ ngɨangɔ, yakamɛngana, ɔ꞊ya lifoko akɔ dyaa ngɨyɛ ya꞊ngeboniomʉ sina.» 18Yɔanɨ ɔ꞉ɓʉngakɨa ɓata yaka nga yɛmɔ ɨja, nɔ, naɓɔ aɓɨakɨa Ɨsaʉ yɛta Iɗo.
19Yakamɛngana, Yɔanɨ agɔga ngama Hɛlɔdɛ, dɔ, a꞉sɨka Hɛlɔdɨa, moi ɔ manye, nɔ, ɔ꞉ɓio akɨa yaka yɛta ɓɨɓɨ nga yɛmɔ kʉ ɨja. 20Akʉʉ ɔ ɓʉɓɨɓɨ ngʉɓɔnanɨ ɓuɓomu, Hɛlɔdɛ ɔ꞉tɔmatɨa ɓata ɓɔmɔ, anɨfa Yɔanɨ aboloko.
Yɔanɨ ɔɓatiso Yeso
(Mat 3:13-17; Mlk 1:9-11)
21Angbinga ngɨa ɓombi ɓaɓomu ɓa꞉ɓisa-ɔɔ anɨkwa uɓatiso atɨ Yɔanɨ, Yeso a꞉kwa ɨyɔ uɓatiso tɨa kʉ ananɨ. Ɨyɛ ndʉ, a꞉ɓio tɨa anɨta Asɔɓɨɨ, ga ɓisi ɓɔ ga. 22Mʉtɨma wɔta Tu wɔ꞉jo akʉʉ angɔ ndʉ anjua. Nɔ isó yɔ꞉kanɨa akʉʉ ɔ ɓisi ɓɔ: «Ʉwɛ, wa mwana ngɨasɛmɨ ɔ ɓʉkʉnda, wanɛkataa nɔgbɛ.»
Ɨfananja yɔ Yeso
(Mat 1:1-17)
23Angbinga ngɨa Yeso a꞉pʉnga-ɔɔ tɛa ngɨangɔ, a꞉ɓio tɨa nɔ mago tinetine ndʉ ɓatɛkɛɓɛ ɓaatʉ. Amati ɔ itungwio ngɨyɔ ɓombi, Yeso a꞉ɓio mwana ɔ Yɛjɛfʉ. Ɓɛsɛngʉʉ ɓɔ Yɛjɛfʉ ɓaɓio ɓɔ: 24Heli mwana ɔ Matatɨ, Matatɨ, mwana ɔ Lawi, Lawi mwana ɔ Meleki, Meleki mwana ɔ Yɔnaɨ, Yɔnaɨ mwana ɔ Yɛjɛfʉ. 25Yɛjɛfʉ mwana ɔ Matatɨa, Matatɨa mwana ɔ Amosi, Amosi mwana ɔ Naʉmʉ, Naʉmʉ mwana ɔ Esili, Esili mwana ɔ Nagaɨ. 26Nagaɨ mwana ɔ Mati, Mati mwana ɔ Matatɨa, Matatɨa mwana ɔ Simei, Simei mwana ɔ Yɔsɛkɨ, Yɔsɛkɨ mwana ɔ Yɔda. 27Yɔda mwana ɔ Yʉananɨ, Yʉananɨ mwana ɔ Lɛsa, Lɛsa mwana ɔ Jʉlʉbabɛlɨ, Jʉlʉbabɛlɨ mwana ɔ Salatieli, Salatieli mwana ɔ Neli. 28Neli mwana ɔ Meleki, Meleki mwana ɔ Adi, Adi mwana ɔ Kɔsamʉ, Kɔsamʉ mwana ɔ Elimadamu, Elimadamu mwana ɔ Eli. 29Eli mwana ɔ Yɔsʉa, Yɔsʉa mwana ɔ Ɨlɨɛjɛlɨ, Ɨlɨɛjɛlɨ mwana ɔ Yɔlamʉ, Yɔlamʉ mwana ɔ Matatɨ, Matatɨ mwana ɔ Lawi. 30Lawi mwana ɔ Simeoni, Simeoni mwana ɔ Yuda, Yuda mwana ɔ Yɛjɛfʉ, Yɛjɛfʉ mwana ɔ Yɔnamʉ, Yɔnamʉ mwana ɔ Ɨlɨakɨmʉ. 31Ɨlɨakɨmʉ mwana ɔ Mɛlɛa, Mɛlɛa mwana ɔ Mɛna, Mɛna mwana ɔ Matata. Matata mwana ɔ Natanɨ. Natanɨ mwana ɔ Dawidi. 32Dawidi mwana ɔ Yɛsɛ, Yɛsɛ mwana ɔ Obedi, Obedi mwana ɔ Bɔajɨ, Bɔajɨ mwana ɔ Salamɔnɨ, Salamɔnɨ mwana ɔ Nasoni. 33Nasoni mwana ɔ Amɨnadabʉ, Amɨnadabʉ mwana ɔ Adimini, Adimini mwana ɔ Alini, Alini mwana ɔ Hɛsɨlɔnɨ, Hɛsɨlɔnɨ mwana ɔ Pɛlɛsɨ, Pɛlɛsɨ mwana ɔ Yuda. 34Yuda mwana ɔ Yakɔɓɔ, Yakɔɓɔ mwana ɔ Isaka, Isaka mwana ɔ Abalaama, Abalaama mwana ɔ Tela, Tela mwana ɔ Naholi. 35Naholi mwana ɔ Selugi, Selugi mwana ɔ Lagau, Lagau mwana ɔ Pelegi, Pelegi mwana ɔ Ɨbɛlɛ, Ɨbɛlɛ mwana ɔ Sɛla. 36Sɛla mwana ɔ Kainana, Kainana mwana ɔ Alufakisadi, Alufakisadi mwana ɔ Sɛmʉ, Sɛmʉ mwana ɔ Nɔa, Naɔ mwana ɔ Lameki. 37Lameki mwana ɔ Mɛtʉsɛla, Mɛtʉsɛla mwana ɔ Ɛnɔka, Ɛnɔka mwana ɔ Yaledi, Yaledi mwana ɔ Mahaleli, Mahaleli mwana ɔ Kenani. 38Kenani mwana ɔ Enosi, Enosi mwana ɔ Sɛtɨ, Sɛtɨ mwana ɔ Adamʉ, Adamʉ mwana ɔ Asɔɓɨɨ.
Currently Selected:
Luka 3: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
