Mʉkpanganɨa 42
42
Yakɔɓɔ ɔtʉmɔ ɓana ɓangɔ anɔ Misili
1Ɨyɛ ndʉ, Yakɔɓɔ ɛ꞉mbɨa ɓɔ idyo ya anɔ Misili, ga ɨyɔ nɔ ɓana ɓangɔ ɓɔ: «Nɔwoloko ɓɔ pisi pisi ɓanɨ, dɔtanɨ?» 2Ga ɨyɔ ɓɔ: «Nɔkɔ ɓɔ idyo ya anɔ Misili. Seni nesu akaya idyo. Tatɨwenimʉ taá, inu ɓana ɓɔsɛmɨ.» 3Kʉdɔ, ɓamanye ɓɔ Yɛjɛfʉ tɛkɛɓɛ, ɓɔ꞉ngwɨa kyɛnda anɨsa akaya nganɔ anɔ Misili. 4Yakɔɓɔ, a꞉mʉsɨamʉ Bɛnjamɛ ngɨa ɓa꞉chwɛa ɓʉa mʉngana nɔ Yɛjɛfʉ, anɨsa ɨhɔ nɔ ɓangɛ, dɔ, a꞉ɓio nɔ ʉɓá ɓɔ ɨkyɛmʉ ya꞉tɨmʉkɨamʉ. 5Kʉdɔ, ɓana ɓɔ Ɨsalaɛlɛ ɓa꞉ngwɨa kyɛnda, ɨhɔ nɔ ɓombi ngaɓɔmɔ, ʉɓa, ɓa꞉ɓio anɨsa kʉ akaya idyo, dɔ, ayende a꞉ɓio tɨa mʉja nɔgbɛ, amati ɔ ɨkʉmbʉ yɔ Kanana.
Yɛjɛfʉ ɔnapɨɔ ɓamanye aikanio
6Ambɔgɔ ɓɔ pe, inani anɔ Misili, Yɛjɛfʉ a꞉ɓio tɨa ngama ata mʉja, nɔ kʉ ɨyɔ akɛ a꞉ɓigabɨa ɓombi ɓaɓomu idyo. Ɨyɛ ndʉ ɓamanye ɓɔ Yɛjɛfʉ, ɓa꞉ɓɔya nayɔ, ɓɔ꞉gbʉkʉmakɨa nɔ mau apɛɨ angɔ, aɓɔya mesu ta aɨsɨ. 7Ɨyɛ Yɛjɛfʉ ɛ꞉na ɓamanye, ɔ꞉ɓɨmbɨa ta gagaa. Yakamɛngana, ɔ꞉kɨaniso apɛɨ eɓo ta ndʉ mombi ata di. Ɔ꞉ɓuɓokuo nɔ iso yɛta ɓʉkaɓʉkaɨ ɓɔ: «Inu ɓagwa! Nɔngwɔ gbanɨ?» Ga ɨɓɔ nayɔ ɓɔ: «Tɔ꞉ngwɔ anɔ Kanana, tɛkɔ akɔkaya idyo.» 8Yɛjɛfʉ ɛ꞉mbɨa ɓamanye, yakamɛngana, sɔkɔmʉ ɨɓɔ ɓamanye ɓɨ꞉mɨmbɨa, pɔ bele. 9Kʉdɔ, Yɛjɛfʉ a꞉tunguo lɨwɔtɔ ngɨlɛ a꞉takanaka jɛnɛ, akʉʉ ɔ ɓamanye. Ga ɨyɔ naɓɔ ɓɔ: «Nɛkɔ ndʉ ɓatetete andɔngaka lindu lɔ ɨkʉmbʉ ngɨlɛ langɔmʉ nɔ angu!» 10-11Ga ɨɓɔ nayɔ ɓɔ: «Yangɔmʉ ɓanɨ, makweso! Isu, ta nɔwɛ anʉngɨa ta ingono. Tangɔmʉ ɓatetete, ta isu, ɓombi ɓɔ tɛa ɓɔsɔɔ, isu ɓaɓomu ɓana ɓɔ gue mʉngana. Tɛkɔ isu, akaya ta idyo» 12Ga ɨyɔ naɓɔ ɓɔ: «Mʉjɛɛ ʉwɔnanɨ! Nɛkɔ ta akɔndɔngaka lindu lɔ ɨkʉmbʉ!» 13Ga ɨɓɔ nayɔ ɓɔ: «Ndɛsɔ aki anɔ Kanana. Ta꞉chwɛa atɨ aba ɓague tɛkɛɓɛ nɔ ɓapɨnɨ. Mupipekio ngʉweso ɔ꞉tukoo pɛngɛ aki aba-ɛɛ. Gwa ngɨyɔmɔ a꞉wo jɛnɛ woni.» 14Kʉdɔ, Yɛjɛfʉ a꞉ɓio naɓɔ ɓɔ: «Ɨmɨ, nanenu aɓɨa ɓɔ, na ta ɓatetete ananɨ na-ɔɔ! 15Nanenu achaniso amati ɔ ikanio. Manja ta ngama ngɨyɔ Misili, nángɔchwɛamʉ aka, mupipekio ngʉweno ɔkɔɓɔyenimʉ aka ta ingono. 16Ndʉ ɛka, ingono ngɨyeno yɛmbɨanɨa dɔ. Sɔkɔmʉ ɓanɨ, manja ta ngama ngɨyɔ Misili, ambɔ ná gɔ ɓatetete ta ingono! Sɨkeni mombi mʉngana ati eno, ɨsa nayɔ akpataka. Inu ɓombi ngʉɓɔmɔ nákumonio-sɨ ta aboloko ɓɔ sɛ.»
17Kʉdɔ, Yɛjɛfʉ ɔ꞉ɓʉfa ɓaɓomu ta akɔ boloko, amati ɔ makwaa kaatʉ. 18Ambise ɔ makwaa kaatʉ, ga Yɛjɛfʉ naɓɔ ɓɔ: «Ɨmɨ, nakumo ta Asɔɓɨɨ, akʉnda ɓɔ nátɨdʉkamʉ, kɨeni ɓɔ: 19ndʉ náɓio ɓombi ɓɔ ingono, mombi mʉngana ati eno, itukuo aboloko aka. Inu ɓombi ngʉɓɔmɔ, nɔ́꞊sa aninjo ɓanja ngʉɓeno idyo, dɔ, ayende ɔbeluo. 20Ɛkɨeni ɨmɨ, ta nɔ mupipekio ngʉweno. Kʉɓanɨ, ingono ngɨyeno yɛmbɨanɨa, iɗo ambɔ, ná꞊tɨdʉkamʉ.» Kʉdɔ ɨɓɔ, ɓa꞉baya tɨa kʉɓanɨ. 21Ɓɔ꞉potio yakanaka ati eɓo asugo ɓɔ: «Isu ingainga, ta꞉kɨa jɛnɛ nduku eso ta ɓʉɓɨɓɨ. Ɨnadɔ, tɛ꞉na jɛnɛ ikoko ngɨyɛ a꞉ɓio amati ɔngɔ ta ɨnanɨ, aka a꞉ɓio-ɔɔ nesu andɨanɨa. Yakamɛngana, sɔkɔmʉ isu tɔ꞉mʉka pɔ bele. Tɨa kʉɓanɨ, ɓʉkaɓʉkaɨ ɓɔngɔ ɓa nesu tɨa atɔya ɨtakɨtakɨ ngɨyɛ.» 22Kʉdɔ, Lubeni a꞉ɓio aka ɓɔ: «Na꞉kɔnisigio ndɨ-sɨ ɓɔ, nátɨkɨenimʉ mwana ngɨananɨ ɓʉɓɨɓɨ? Yakamɛngana, inu, sɔkɔmʉ nɔ́꞉nɔka pɔ bele. Ɨtakɨtakɨ ngɨyɛ, ta tɨa anɨdya mʉkaya wɔ ingwo ngɨangɔ.» 23Ati eɓo nɔ Yɛjɛfʉ, mombi mʉngana a꞉ɓio naɓɔ anechekio yaka. Kʉɓanɨ, ɨɓɔ ɓɛ꞉mbɨamʉ ɓɔ Yɛjɛfʉ anʉka yakanaka ngiyeɓo ta iɓomu ɓɔ sɛ. 24Yɛjɛfʉ ɔ꞉ngwa ananɨ ɓa꞉ɓio-ɔɔ, ɔ꞉sa andɨa. Mbise ɔngɔ, ɔ꞉tɔwa ɓata ayakanaka naɓɔ. Ta ananɨ amesu kɔ eɓo, ɔ꞉mʉfisiso Simoni, nɔ ɓɔ꞉mʉmaya aboloko.
Ɓana ɓɔ Yakɔɓɔ ɓɔtɔwɔ andaɓʉ anɔ Kanana
25Yɛjɛfʉ ɔ꞉titio ɓɔ ɓihukiso ɓasakɨ ngʉɓeɓo nɔ nganɔ, ɓɔ kyɛɛ kyɛɛ, ɓenjo kʉ nɔ idyo akɔ yaka yɔ ɨngbaa. Ɓɔ꞉tɔsio mombi nɔ mombi ɓagyɛgyɛ ngʉɓangɔ, ta amati ɔ sakɨ ngɨangɔ. Ɓa꞉ɓʉkɨa ngbanga ta ndʉ ananɨ. 26Kʉdɔ, ɓa꞉tʉmbaka idyo ngɨyeɓo, akʉʉ ɔ ɓapunda ngʉɓeɓo, nɔ, ɓɔ꞉sa yeɓo. 27Tɨa aka ɓa꞉kwala-ɔɔ, mombi mʉngana ati eɓo, ɔ꞉gana sakɨ ngɨangɔ, aninjo punda idyo. Ɔ꞉tɛna tɨa ɓagyɛgyɛ akɔ moni kɔ sakɨ ngɨangɔ. 28Ga ɨyɔ nɔ ɓamanye ɓɔ: «Hu! Ɓɔ꞉toso ɓata ɓagyɛgyɛ ta iyani amati ɔ sakɨ ngɨasɛmɨ!» Kʉdɔ, ɓa꞉kwa ʉɓá, nɔ, ɓɔ꞉gʉgʉma ɓɔ kpu kpu kpu. Ɓɔ꞉pʉnga yakanaka ati eɓo ɓɔ: «Ɨmanɨ ɨyɛ, Asɔɓɨɨ ɔ꞉tɨkɨɔ ɓanɨ?»
29Ɨyɛ ndʉ, ɓa꞉tɔwa inani, anɔ Kanana atɨ ɨsɛ eɓo, ɓɔ꞉mʉngakɨa yaka iɓomu ngɨyɛ ya꞉kyananakɨa. Ga ɨɓɔ ɓɔ: 30«Gue ngɨa a ngama ɔ ɨkʉmbʉ, a꞉tɨyakɨa pɔngɔ nɔ ɓʉkaɓʉkaɨ, ga isu ta ɓatetete. 31Kʉdɔ, isu ta꞉mutosio pɔngɔ ɓɔ: ‹Tanʉnga ingono, tangɔmʉ isu ɓatetete. 32Isu, ta꞉chwɛa ɓague tɛkɛɓɛ nɔ ɓapɨnɨ, ɓana ɓɔ gue mʉngana. Mombi mʉngana angɔ tii. Gwa ngɨa a mupipekio, a꞉tukoo pɛ aki aba-ɛɛ anɔ Kanana.› 33Ɨyɔ, ngama ngɨananɨ, ɔ꞉sugo ɓata kʉ ɓɔ: ‹Ɨmɨ, anɨmbɨa ɓɔ nánʉnga ingono, ya ɓɔ: Sɨeni nduku eno mʉngana alɨkɔndɔ lɨsɛmɨ aka. Inu, sɨkieni ɓanja ngʉɓeno idyo akɔ yaka yɔ ayende ngɨa. Seni 34nɔ, nɔ́꞊nɛkɨa ɨmɨ, ta nɔ mupipekio ngʉweno. Kʉdɔ ɨmɨ, na꞊baya suo ɓɔ nángɔmʉ ɓatetete ta ingono, nɔ, ɓɔ yaka ngɨyɛ nánʉngaka ya ngbingbii. Kʉdɔ, ná꞊nitosio nduku eno, nɔ, nɔ́bayeni gabanaka amati ɔ ɨkʉmbʉ aka, nɔ́gabanaka.›»
35Ɨyɛ ndʉ, mombi nɔ mombi a꞉ɓʉngʉa sakɨ ngɨangɔ ɓɔ hɔɔ, ɔ꞉tɛna ikwe yɔ ɓagyɛgyɛ ngʉɓangɔ ta amati ɔngɔ. Ɨɓɔ nɔ atɨ ɨsɛ eɓo ɓaɓomu, ɓɛ꞉na ɓagyɛgyɛ ngʉɓɔnanɨ ɓeɓo, kʉdɔ, ɓɔ꞉huo nɔ ʉɓá nɔgbɛ. 36Ga ɨsɛ eɓo Yakɔɓɔ naɓɔ ɓɔ: «Akɔ yaka yeno, nɔmanɔ ajanga ɓana ngʉɓɔsɛmɨ ta ɓaɓomu. Yɛjɛfʉ angɔmʉ ɓata, Simoni angɔmʉ ɓata kʉɓanɨ, nɔ, nákʉnda sɨka tɨa kʉ nɔ Bɛnjamɛ. Ɨnadɔ, yaka ngɨyɛnɛnɨ iɓomu, ya ta akʉʉ asɨmɨ!» 37Ga Lubeni nɔ ɨsɛ ɓɔ: «Ndʉ ɨmɨ Lubeni, na꞊ngɔnatɔyamʉ suo nɔ Bɛnjamɛ aka ɓɔ, wɔ꞊maa suo ɓana ɓapɨnɨ ngʉɓɔsɛmɨ, ta ɓaɓomu ɓɔ sɛ. Wanenjo ɨyɔ ɨmɨ, nɔ, na꞊natɔya suo nayɔ tɔyani.» 38Kʉdɔ ɨsɛ, a꞉mutosio ɓɔ: «Haa! Mwana asɛmɨ, angɔmʉ anɨsa ɨhɔ nenu. Dɔ, manye a꞉wo pɔngɔ tɨa kʉ woni. Ɨyɔ, ɔtukoo tɨta mukpekpe wɔngɔ nangana atɨ inye. Ndʉ ɨkyɛmʉ ya꞉mʉkɨa amati ɔ kyɛnda ngɨyɛnɛnɨ yeno, ɨmɨ, nábi ɨkyɛmʉ yɔ ikweikwei yɔngɔ aɓʉbɨɨ, nɔɓieni tɨta amati ɔ ikoko, ngɨyɛ yapipenekio akʉʉ eno.»
Currently Selected:
Mʉkpanganɨa 42: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
