Ехъошуа 9
9
Ябгъонэрэ шъхьэр
ГъыбӀонхэм израилхэр къызэрагъэпцӀагъэхэр
1Иорданым итыгъэкъохьэпӀэ лъэныкъо щыпсэурэ пачъыхьэхэм зэкӀэм ар зызэхахым – къушъхьалъэхэм, къушъхьэ лъапэхэм, Ливаны нэсэу Хышхо Ӏушъом зэрэпсэоу Ӏус лъэпкъхэу: хьатхэм, амэрхэм, къэнаӀанхэм, пэрыцхэм, хъэухэм, еусхэм япачъыхьэхэр, – 2ахэр зэрэугъоихи, Ехъошуарэ израилхэмрэ къязэонхэу зыч-зыпчэгъоу зэкъоуцуагъэх.
3Ау Ехъошуа къалэхэу Ерыхъэурэ Ӏайрэ аришӀагъэр ГъыбӀон дэсхэм хъэухэм зызэхахым, 4тхьагъэпцӀыгъэм ечъэжьыгъэх: кӀохи, гъомылэ агъэхьазырыгъ#9:4 Ижъырэ джуртыбзэкӀэ тхыгъэ Ӏэпэрытхым итыр гурыӀогъошӀоп. Мыр гурыӀуакӀэу щыӀэмэ ащыщ., дзыо дыжьыгъэхэмрэ санэ зэрагъахъорэ шъонтыжъ зэӀэтхъыгъэ зэхэдыжьыхьагъэхэмрэ ящыдхэм атыралъхьэхи, гъогу къытехьагъэх. 5Цуакъэу алъакъомэ апылъхэри жъы дэдэхэу дыжьыгъагъэх, щыгъыныжъхэри ащыгъыгъэх. Хьалыгъоу зыдаштагъэр зэкӀэ гъугъэу, зэхэтэкъуагъэу щытыгъ. 6Гъылгъал щыт уцупӀэм Ехъошуа дэжь ахэр къакӀохи, ащи зэкӀэ израилхэми:
– Тэ чӀыгу чыжьэ тыкъикӀыгъ. ЗэшӀу Ӏуагъэ къыддэшъушӀ, – аӀуи къараӀуагъ.
7Израилхэр хъэухэм яупчӀыгъэх:
– Шъукъытпэмычыжьэу шъопсэункӀи мэхъуба? Арэу зыхъукӀэ, сыдэущтэу Ӏуагъэ къыжъудэтшӀынэу ара?
8Джащыгъум Ехъошуа зыфагъэзагъ:
– Тэ о тыуипщылӀ.
Ар заӀом Ехъошуа яупчӀыгъ:
– Шъо шъухэта? Тыда шъукъыздикӀыгъэри?
9Арыти, адрэхэм джэуап къыратыжьыгъ:
– Тэ, уипщылӀхэм, Зиусхьанэу уи Тхьэ ищытхъу зэхэтхыгъэти, чӀыгу чыжьэ дэдэ тыкъикӀыгъ. Тэ Ащ пае зэхэтхыгъ: зэкӀэ Мысырым Ащ щишӀагъэри, 10амэр пачъыхьитӀум – Хъэщбэн пачъыхьэу Сыхъонрэ Бащан пачъыхьэу Ӏащтарэт тетыгъор щызыӀыгъыгъэ Ӏогърэ – Иордан итыгъэкъокӀыпӀэ щаришӀагъэри зэкӀэ. 11Гъогу гъомылэ къыздэтштэнышъ, тыкъышъупэгъокӀынышъ: «Тэ тышъуипщылӀ. ЗэшӀу Ӏуагъэ къыддэшъушӀ», тӀонышъ къышъотӀонэу тинахьыжъ упчӀэжьэгъухэмрэ зэкӀэ тихэгъэгу ис цӀыфхэмрэ унашъо къытфашӀыгъ. 12Мары тихьалыгъу, гъогу тыкъызытехьэ мафэм ар джыри фэбагъ. Шъуадэжь тыкъызэсым, джы мары, шъолъэгъу, ар зэрэгъугъэри, зэрэтэкъуагъэри. 13Мары шъонтхэри. Ахэм санэ къазырытэгъахъом кӀагъэх, джы ахэр зэрэзэӀэтхъыгъэхэр шъолъэгъу. Тищыгъыни тицуакъэхэри гъогуонэ кӀыхьэм ылэжьэгъапэх.
14Израилхэр Зиусхьаным емыупчӀыхэу ахэм ягъомлапхъэхэр къаплъыхьагъэх. 15ЯщыӀэныгъэ ыухъумэу джаущтэу Ехъошуа мамыр зэзэгъыныгъэ адишӀыгъ, израилым ипащэхэм ар тхьэлъанэкӀэ агъэпытэжьыгъ.
16Ӏуагъэ зызэдашӀыгъэм ыуж мэфищ тешӀагъэу ахэр зэрягъунэгъухэр, апэмычыжьэу зэрэщыпсэухэрэр израилхэм къашӀагъ. 17Арыти, израилхэр гъогу техьэхи, мэфищ зытешӀэ нэуж хъэухэм къалэхэу ГъыбӀон, Къэфирэ, БэӀэрот, Къыриат-ЕӀэрим анэсыгъэх. 18Ау израил лъэпкъым ипащэхэм Зиусхьанэу Израилым и ТхьэкӀэ тхьэлъанэ ашӀыгъэти, ахэм атеуагъэхэп. Пащэхэм афэмыразэу зэрэлъэпкъэу гъум-тӀымыгъ, 19ау адрэхэм израил цӀыфхэм араӀожьыгъ:
– Зиусхьанэу Израилым и ТхьэкӀэ тхьэлъанэ тшӀыгъэшъ, джы тэ ахэм танэсы хъущтэп. 20Арышъ, мары ахэм тызэрадэзекӀощтыр: тхьэлъанэу афэтшӀыгъэм тызэрепцӀыжьырэм пае губжыр къыттемыонэу ахэр тэ псэоу къэдгъэнэщтых.
21ЕтӀани пащэхэм къыпагъэхъожьыгъ:
– Орэпсэух.
Джащ щегъэжьагъэу ахэм зэкӀэ израил лъэпкъым пхъэр фызэпаупкӀы, пси къыфахьы. Джаущтэу пащэхэм гущыӀэу атыгъэр аукъуагъэп.
22Ехъошуа гъыбӀонхэм къяджи, ариӀуагъ:
– Сыд пае гъунэгъоу шъущыпсэу пэтзэ: «Тэ чӀыпӀэ чыжьэ тыщэпсэу» шъуӀуи, тыжъугъэпцӀагъа? 23Ащ пае джы шъо нэлат къышъутефагъ. Арышъ, егъашӀэми шъутипщылӀыщт, си Тхьэ иунэ пае пхъэр зэпышъуупкӀыщт, пси къэшъухьыщт.
24Арыти, ахэм джэуап къатыжьыгъ:
– Зиусхьанэу уи Тхьэ иӀумэтэу Мосэ мы чӀыгур зэкӀэ къыритынэуи, ащ ис цӀыф пстэури шъуапашъхьэ щыригъэкӀодыкӀынэу унашъо зэришӀыгъэри тэ, уипщылӀхэм, зэхэтхыгъ. Ащ къыхэкӀэу, тищыӀэныгъэ тытещыныхьажьыгъэти ары аущтэу тызкӀэзекӀуагъэр. 25Джы, мары, о пӀэ тилъ. Нахь тэрэзэу, зэфагъэу плъытэрэм тетэу къыддэзекӀу.
26Арыти, Ехъошуа ахэр израилхэм ащиухъумэхи, аригъэукӀыгъэхэп. 27А мафэм щегъэжьагъэу ахэм пхъэ зэпаупкӀынэу, псы къахьынэу израилхэмрэ Зиусхьаным икъурмэншӀыпӀэрэ, сыд фэдэ чӀыпӀэ Зиусхьаным къыхихыгъэми, а Ӏофыр щагъэцэкӀэнэу Ехъошуа ыгъэнэфагъэх. Непэ къызнэсыгъэми ахэм ар агъэцакӀэ.
Currently Selected:
Ехъошуа 9: АдыТГ
Highlight
Share
Copy

Want to have your highlights saved across all your devices? Sign up or sign in
© Институт перевода Библии, 2002-2023