Ехъошуа 20
20
ЯтӀокӀэнэрэ шъхьэр
ЗыкъэухъумэжьыпӀэ къалэхэр
1ЕтӀанэ Зиусхьаным Ехъошуа къыриӀуагъ:
2– Мосэ къызэресӀогъагъэм фэдэу зыкъэухъумэжьыпӀэ къалэхэр къыхахынхэу израилхэм яӀу. 3ХэукъуагъэкӀэ, ымышӀахэу хэтми цӀыф зыукӀырэр, ащ ечъэжьынышъ, лъышӀэжьым зыщиухъумэн ылъэкӀыщт. 4Ащ ышъхьэ а къалэхэм ащыщ зырихьылӀэжьыкӀэ, къэлэ дэхьэпӀэ къэлапчъэхэм адэжь орэуцуи, а къалэм дэс нахьыжъ упчӀэжьэгъухэм иӀоф зытетыр арерэӀуат. Ащ ыуж адрэхэм ар къалэм дарэгъахьи, ахэсэу зыщыпсэущт чӀыпӀэр къыфарэгъэнаф. 5ЛъышӀэжьым илъэуж къыфымэ, ыукӀыгъэр ымышӀахэу, гухьэ-гужъ фыримыӀэу ӀэкӀэукӀагъэшъ, къылъыкӀуагъэм рарэмыт. 6Хьыкум тырашӀыхьанэу къэлэдэсхэм апашъхьэ къемыуцофэ, къурмэнышӀ шъхьаӀэу а уахътэм яӀэр олӀэжьыфэ ар а къалэм къыдэрэн. КъурмэнышӀ шъхьаӀэр зылӀэкӀэ укӀакӀом ышъхьэ къыздихыжьыгъэ къалэм, иунэ ыгъэзэжьын ылъэкӀыщт.
7Джаущтэу зыкъэухъумэжьыпӀэ къэлищ Иордан псыхъом итыгъэкъохьапӀэкӀэ щагъэнэфагъ. Ахэр Нафталый къушъхьалъэм хахьэрэ Гъалыл ит Къэдэщ, Ефраим къушъхьалъэм щыӀэ Щэхэм, Ехъудэ къушъхьалъэм щыӀэ Къыриат-АрбаӀ (Хъэурэн) арых. 8Ерыхъэу пэгъунэгъоу Иордан псыхъом икъокӀыпӀэкӀи къэлищ щагъэнэфагъ: Рубэн лӀакъом ичӀыгу итэу шъофнэкӀым ит бгы тешъом тет Бэцэр, Гъад лӀакъом ыӀыгъ ГъылыӀад чӀыналъэм ит Рамот, Мынасэ лӀакъом ичӀыгу хэхьэрэ Бащан чӀыналъэм ит Гъолан. 9А къалэхэр зэкӀэ израилхэмрэ хымэ лъэпкъэу ахэсхэмрэ зыухъумэжьыпӀэ къалэхэу агъэнэфэгъагъэх. Хэтми ымышӀахэу зыгорэ зыукӀыгъэр хьыкум тырашӀыхьанэу къэлэдэсхэм апашъхьэ къемыуцофэ, а къалэхэм ащыщ ечъэжьын, лъышӀэжьым зыщиухъумэн ылъэкӀынэу щытыгъ.
Currently Selected:
Ехъошуа 20: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
