Ехъошуа 11
11
ЯпшӀыкӀузэнэрэ шъхьэр
Темыр пачъыхьэхэм зэратекӀуагъэхэр
1Хъацэр къалэ ипачъыхьэу Ябын а къэбарыр зызэхехым гъунэгъу пачъыхьэхэм лӀыкӀохэр афигъэкӀуагъэх. Ахэр Мадон пачъыхьэу Иобаб, Щымрэнрэ Ахъшафрэ япачъыхьэхэр, 2темыр къушъхьалъэм, Къынэрэт#11:2 Ар Гъалыл псыхъураир ары. Джащ фэд мы тхылъым адрэ ичӀыпӀэхэми зэращыхэтыр. икъыблэ Иордан кӀэим, тыгъэкъохьэпӀэ къушъхьэ лъапэхэм, къохьапӀэмкӀэ Дор къушъхьэхэм#11:2 Е: Нэфат-Дор. ащыпсэущтыгъэ пачъыхьэхэр арых. 3Джыри Ябын цӀыф лъэпкъыбэхэм лӀыкӀохэр афигъэкӀуагъэх. Ахэр къокӀыпӀэмкӀи къохьапӀэмкӀи ащыпсэущтыгъэхэ къэнаӀанхэр, амэрхэр, хьатхэр, пэрыцхэр, къушъхьалъэм щыпсэущтыгъэхэ еусхэр, Мыцпэ чӀыналъэм ит Хъэрмон къушъхьэ лъапэм щыпсэущтыгъэхэ хъэухэр арых. 4Арыти, ахэр шъхьадж ежь идзэ игъусэу заом къежьагъэх. ЦӀыфэу акӀыгъур лъытэгъуаеу, хы Ӏушъом Ӏулъ пшахъом фэдагъ, шыхэри купсынкӀэхэри бэ хъущтыгъэх. 5А пачъыхьэхэр зэкӀэ зэкъоуцохи, Мэром псыхъом дэжь къакӀохи, ащ уцупӀэ щашӀыгъ, Израилым езэонхэу загъэхьазырыгъ.
6Ау Зиусхьаным Ехъошуа къыриӀуагъ:
– Уащымыщын. Неущ джырэ фэдэ уахътэм ехъулӀэу ахэр зэкӀэ Сэ израил лъэпкъым къестынхэшъ, езгъэукӀыщтых. Яшыхэм яфэхэр зэпыупкӀых, якупсынкӀэхэри гъэстых.
7Ехъошуарэ ащ идзэрэ Мэром псыхъом дэжь екӀухи, ошӀэ-дэмышӀэу атеуагъэх. 8Зиусхьаными ахэр израилхэм аӀэ къырилъхьагъэхэти, зэхакъутэхи, рафыжьэхи, Цыдон къэлэшхом нэс, Мысрэфот-Маим нэс, тыгъэкъокӀыпӀэмкӀэ Мыцпэ кӀэим нэс афыгъэх. Ащ фэдизым зы нэбгырэ псэоу къэмынэжьыфэ, израилхэм ахэр аукӀыгъэх. 9Зиусхьаным къызэрэриӀуагъэм фэдэу Ехъошуа зекӀуагъэ: ахэм яшыхэм яфэхэр зэпиупкӀыхи, якупсынкӀэхэри ыгъэстыгъэх.
10Ехъошуа къызегъэзэжьым а уахътэм пачъыхьэгъухэм ашъхьэу щытыгъэ Хъацэр къалэр ышти, ащ ипачъыхьэ чатэкӀэ ыукӀыгъ. 11ЗэкӀэ псэ зыпытэу ащ дэсыгъэхэр чатэкӀэ зэтыраукӀэхи, лъэпсэкӀод ашӀыгъэх, зы нэбгыри псэоу къагъэнагъэп. Ехъошуа Хъацэр къалэм машӀо ридзи ыгъэстыгъ.
12ЗэкӀэ а пачъыхьэгъухэр Ехъошуа ыубытыгъэх, япачъыхьэхэри цӀыфэу арысыгъэхэри чатэкӀэ зэтыриукӀагъэх. Зиусхьаным иӀумэтэу Мосэ унашъо къызэрэфишӀыгъэм фэдэу ащ ахэр лъэпсэкӀод ышӀыгъэх. 13Ау израилхэм лъэгапӀэхэм атет къалэхэм ащыщ зыпари агъэстыгъэп, Хъацэр къэлэ закъор ары Ехъошуа ыгъэстыгъэр. 14Къонтхъымрэ былымхэмрэ израилхэм а къалэхэм ащызэбгырахыхи, цӀыфэу ащыпсэущтыгъэхэр зэкӀэ зы нэбгыри псэоу къамыгъанэу чатэкӀэ зэтыраукӀагъэх. 15Зиусхьаным иӀумэт Мосэ унашъоу къыфишӀыгъагъэр, ащ Ехъошуа къыриӀожьыгъэр, адрэм ыгъэцэкӀагъ, Зиусхьаным Мосэ унашъоу къыфишӀыгъэм зыпари хигъэзыгъэп.
16Ехъошуа а чӀыгур зэрэпсэоу ыубытыгъ: къушъхьалъэхэри, зэкӀэ къыблэ шъофнэкӀыри, зэкӀэ Гощэн чӀыгури, тыгъэкъохьэпӀэ къушъхьэ лъапэхэри, Иордан кӀэйри, Израилым икъушъхьэхэри къушъхьэ лъапэхэр зэракӀыгъоу 17СэӀир пэблагъэу щыт Хьэлакъ къушъхьэм щегъэжьагъэу Ливан кӀэим ит Хъэрмон къушъхьэм ылъапэ дэжь щыт БэӀал-Гъад нэс. Ар зэкӀэ пачъыхьэхэм атекӀуагъ, ыубытыхи, ыукӀыгъэх. 18Ехъошуа а пачъыхьэхэм бэрэ язэуагъ. 19ГъыбӀон дэс хъэухэм анэмыкӀ, зы къалэ горэми израилхэм мамыр зэзэгъыныгъэ къадишӀыгъэп, ахэр зэкӀэ заокӀэ аштагъэх. 20Зиусхьаным Мосэ унашъо къызэрэфишӀыгъэм фэдэу гуегъу афамышӀэу ахэр лъэпсэкӀод ашӀынхэм пае ежь, Зиусхьаным, ахэм агухэр къызэшӀуаригъадзэхи, израилхэм къязэонхэм тыригъэгушӀухьагъэх.
21А уахътэм Ехъошуа кӀуи, Ӏэнэкъхэр#11:21 Ахэр лъэгэ дэдагъэх, ялъэгагъэ пае израилхэр ащыщынэщтыгъэх. къушъхьалъэхэм ащиукӀыгъэх: къалэхэу Хъэурэни, Дэбири, Ӏанаби, Ехъудым зэкӀэ икъушъхьалъэхэми, Израилым зэкӀэ икъушъхьалъэхэми. Ехъошуа къалэхэр зэхикъутэхи, цӀыфхэри лъэпсэкӀод ышӀыгъэх. 22Израилхэм ячӀыгу зы Ӏэнэкъ закъуи къинагъэп, ахэр псэоу къызыдэнэжьыгъэхэр Ӏазэ, Гъат, Ащдэд къэлэхэр арых ныӀэп. 23Зиусхьаным Мосэ къызэригъэгугъагъэу джаущтэу Ехъошуа а чӀыгур зэкӀэ ыубыти, израил лъэпкъыр ащ рищи, лӀакъохэм яунэе Ӏахьэу ар афигощыгъ. Заор аухи, чӀыгуми мамыр ыгъотыжьыгъ.
Currently Selected:
Ехъошуа 11: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
