МысырикӀыжь 8

Яенэрэ шъхьэр

ЯтӀонэрэ тхьамыкӀагъор: хьантӀаркъохэр

1Зиусхьаным Мосэ къыриӀуагъ: «Фирхьауным дэжь кӀуи, еӀу: „Зиусхьаным ыӀорэр мары: СицӀыф лъэпкъ, сигъэлъапӀэу шъхьащэ къысфишӀыным пае, къэтӀупщ#8:1 АдыгабзэмкӀэ зэдзэкӀыгъэ я 8-рэ шъхьэм изэкӀэлъыкӀуакӀэ ижъырэ джуртыбзэмкӀэ тхыгъэ Ӏэпэрытхым ия 8-рэ шъхьэ изэкӀэлъыкӀуакӀэ темыфэу, Урыс синодальнэ Библиеми нэмыкӀ бзэхэмкӀэ зэрадзэкӀыгъэхэми зэрахэтым фэд.. 2КъэмытӀупщэу зыбгъэкъаигъэмэ, ащыгъум, хэкур зэрэщытэу хьантӀаркъохэмкӀэ сэгъэпщынэ. 3Нил псыхъо хьантӀаркъохэр къыхэшъэшъхэу хъущт, ахэр ащ къыхэкӀынхэшъ, уиунэ къихьащтых, уичъыяпӀи, уипӀэкӀори, уиӀумэтхэмрэ уицӀыфхэмрэ яунэхэми, уихьакухэми, уитхьацулъэхэми къанэсыщтых. 4Ори, уицӀыфхэми, зэкӀэ уиӀумэтхэми хьантӀаркъохэм шъузэлъакӀущт“». 5Зиусхьаным Мосэ къыриӀуагъ: «Хьарунэ еӀу: „Бэщыр зэрэпӀыгъ Ӏэр псыхъохэм, Нил, псыутӀэхэм атещайи, хьантӀаркъохэр мысыр чӀыгум къытещэх“». 6Хьарунэ бэщыр зэриӀыгъ Ӏэр Мысыр хэгъэгум ипсымэ затырещаем, хьантӀаркъохэр къахэкӀхи, мысыр чӀыгур зэфэдэкӀэ зэлъабгъагъ. 7Мысыр удыхэм шхъухьэ кӀуачӀэхэмкӀэ ардэдэр ашӀагъ, хьантӀаркъохэр мысыр чӀыгум къытыращэхи, ахэр ащ тиз хъугъэх. 8Фирхьауным Мосэрэ Хьарунэрэ къаригъащэхи, ариӀуагъ: «ХьантӀаркъохэр сэри сицӀыфхэми тпэчыжьэ ышӀынхэу Зиусхьаным шъуелъеӀу, сэри израиль цӀыфхэр, Зиусхьаным къурмэн фашӀынэу, стӀупщыщтых». 9Мосэ фирхьауным риӀуагъ: «ХьантӀаркъохэр уадэжь, уиунэхэм арымысыжьхэу, Нил закъом къыхэнэжьынхэм пае, ощ пайи, уиӀумэтхэми, уицӀыфхэм апайи тхьэлъэӀу зысшӀыщт уахътэр ор-орэу къаӀоба». 10Фирхьауным къыӀуагъ: «Неущ». Мосэ риӀожьыгъ: «Зиусхьанэу, ти Тхьэ фэдэ зэрэщымыӀэр пшӀэным пае, о къызэрэпӀуагъэм фэдэу хъущт. 11ХьантӀаркъохэм ори, уиунэхэри, уиӀумэтхэри, уицӀыфхэри къабгынэщтых, Нил закъор ары ахэр къызхэнэщтхэр». 12Мосэрэ Хьарунэрэ фирхьауным дэжь къикӀыжьыгъэх, Зиусхьаным фирхьауным ритӀупщыгъэ хьантӀаркъохэм апае Мосэ мэкъэ ӀэтыгъэкӀэ Ащ елъэӀугъ. 13Арыти Зиусхьаным Мосэ зэриӀуагъэу ышӀыгъ. ХьантӀаркъохэр унэхэм, щагухэм, губгъохэм арылӀыхьагъэх. 14Ахэр аугъоихи, Ӏэтэ-Ӏатэу ашӀыгъэх, чӀыгуми шъумаер тырихэу хъугъэ. 15Арыти, фирхьауным тхьамыкӀагъор зэрэшъхьащыкӀыгъэр зелъэгъум, Зиусхьаным зэриӀуагъэм фэдэу, ыгу зэшӀуидзи, ахэм къядэӀугъэп.

Ящэнэрэ тхьамыкӀагъор: аргъойхэр

16Зиусхьаным Мосэ къыриӀуагъ: «Хьарунэ еӀу: „Уибэщ Ӏэти, чӀыгу сапэм хау, сапэр Мысыр хэгъэгум зэфэдэкӀэ аргъой щыхъущт“». 17Джаущтэуи ахэм ашӀыгъ: Хьарунэ бэщыр зэриӀыгъ Ӏэр ыщэйи, чӀыгу сапэм хэуагъ. Ардэдэм аргъойхэр цӀыфхэми хьайуанхэми атебыбагъэх. ЗэкӀэ чӀыгу сапэр Мысыр хэгъэгум зэфэдэкӀэ аргъой щыхъугъ. 18Удыхэм шхъухьэ кӀуачӀэхэмкӀэ джаущтэу аргъойхэр къашӀы ашӀоигъуагъ, ау афэлъэкӀыгъэп. Ащ къыхэкӀэу аргъойхэр цӀыфхэми хьайуанхэми атизыгъэх. 19Удыхэм фирхьауным раӀуагъ: «Ар Тхьэм иӀэшӀагъ»#8:19 Ижъырэ джуртыбзэмкӀэ тхыгъэ Ӏэпэрытхым мы чӀыпӀэр зэрэхэтыр: «Ар Тхьэм ыӀап». Ар «тхьэ горэм ыӀап» ыӀоуи къыбгурыӀон ылъэкӀыщт.. Ау фирхьауным ыгу зэшӀодзагъэу хъуи, Зиусхьаным зэриӀуагъэу, ахэм къядэӀугъэп.

ЯплӀэнэрэ тхьамыкӀагъор: гъудэхэр

20Зиусхьаным Мосэ къыриӀуагъ: «Неущ жьэу къэтэджи, фирхьауным ыпашъхьэ ихь. Мары, ар псым кӀощтышъ, ащ еӀу: „Зиусхьаным ыӀорэр мары: СицӀыф лъэпкъ сигъэлъапӀэу шъхьащэ къысфишӀыным пае къэтӀупщ. 21Армырмэ, сицӀыфхэр къэмыутӀупщыхэмэ, ащыгъум Сэ ори, уиӀумэт Ӏэшъхьэтетхэми, уицӀыфхэми, уиунэхэми гъудэхэр къястӀупщыщтых. Гъудэхэр мысыр цӀыфхэм яунэхэм арызхэ хъущт. Джаущтэу чӀыпӀэу зыщыпсэухэрэми изхэ хъущт. 22Ау а мафэм Сэ СицӀыфхэр зэрысхэ Гощэн хэкур хэсыушъхьафыкӀыщт, ащ гъудэхэр исыщтхэп, ар – Сэ мы дунаим Сызэри Зиусхьаныр пшӀэным пае. 23Сэ о уицӀыфхэмрэ Сэ СицӀыфхэмрэ зэхэсыушъхьафыкӀыщтых#8:23 Мы чӀыпӀэр ижъырэ урымыбзэмкӀэ тхыгъэ Ӏэпэрытхым фэдэу адыгабзэкӀэ зэдзэкӀыгъ. Ижъырэ джуртыбзэмкӀэ тхыгъэ Ӏэпэрытхым зэрэхэтым имэхьанэ нафэп.. Ар неущ къэнэфэщт“». 24Джаущтэуи Зиусхьаным ышӀыгъ: фирхьауным иуни, ащ уиӀумэт Ӏэшъхьэтетхэм яунэхэми, Мысыр хэгъэгуми зэфэдэкӀэ гъудэхэр бэ дэдэ ащыхъугъ, гъудэхэм къахэкӀэу зэрэхэгъэгоу хьэзабышхом хэтыгъ.

25Арыти фирхьауныр Моси Хьаруни къяджи, къариӀуагъ: «ШъукӀуи, шъуи Тхьэ пае мы хэгъэгум къурмэн щышъушӀ». 26Ау Мосэ къыӀуагъ: «Ар пшӀэ хъущтэп, сыда пӀомэ Зиусхьанэу, ти Тхьэ къурмэн фэтшӀырэр мысыр цӀыфхэм ашӀоемыкӀушху, мысыр цӀыфхэм ашӀоемыкӀушхор ахэм янэрылъэгъоу къурмэн тшӀымэ, мыжъорыокӀэ тызэхаукӀэнба? 27Тэ мэфищ гъогукӀэ шъоф нэкӀым тыкӀонышъ, Зиусхьанэу, ти Тхьэ, къызэрэтиӀощтым фэдэу, къурмэн фэтшӀыщт». 28Арыти фирхьауным къыӀуагъ: «Зиусхьанэу, шъуи Тхьэ шъоф нэкӀым къурмэн щыфэшъушӀынэу шъустӀупщыщт, ау чыжьэу шъуӀумыкӀ. Сэщ пайи Тхьэм шъуелъэӀу». 29Мосэ къыӀуагъ: «Мары уадэжь секӀыжьы, Зиусхьаными селъэӀущт, гъудэхэм фирхьаунри, ащ иӀумэт Ӏэшъхьэтетхэри, ицӀыфхэри неущ къабгынэщтых, ау Зиусхьаным къурмэн фашӀыным пае цӀыфхэр зэримытӀупщыщтыгъэхэу фирхьауным терэмыгъапцӀ». 30Мосэ фирхьауным дэжь къикӀыжьи, Тхьэм елъэӀугъ. 31Зиусхьаным Мосэ зэриӀуагъэу ышӀыгъ, гъудэхэм фирхьаунри, ащ иӀумэт Ӏэшъхьэтетхэри, ицӀыфхэри къабгынагъэх, зызакъуи къэнагъэп. 32Ау фирхьауным ыгу джыри зэ зэшӀуидзи, цӀыфхэр къытӀупщыгъэхэп.

Currently Selected:

МысырикӀыжь 8: АдыТГ

Highlight

Copy