МысырикӀыжь 23

ЯтӀокӀэнэрэ щырэ шъхьэр

Зэфагъэмрэ гукӀэгъумрэ яхабзэхэр

1Зиусхьаным Мосэ къыдэгущыӀэзэ, къыриӀуагъ: «ПцӀыр къэбаркӀэ къемыхьакӀ, бзэджашӀэм удеӀэу шыхьат нэпцӀ уфэмыхъу. 2ЦӀыф нахьыбэм ер ашӀэми, адемыгъашт, цӀыф нахьыбэм уакӀырыплъэу, шъыпкъэр хьыкумым щымыукъу. 3ЗэрэтхьамыкӀэм пае лажьэ зиӀэм хьыкумым фэгъэкӀотэныгъэ щыфэмышӀ.

4Уипый ицу е ищыд гъощагъэу уапэ къызифэкӀэ, ар зыем фэщэжь. 5Уиджэгъогъу ищыд хьылъэу телъым зэхигъэфагъэу уапэ къызифэкӀэ, ащ уемыбгъукӀоу, дэӀэпыӀи, щыдым ытхыцӀэ телъхэр къыдытехых.

6УитхьамыкӀэ фэзафэу идэон Ӏофхэр хьыкумым щызэхэфых. 7Хыемрэ зафэмрэ укӀ къатемыфэным пае ямылажьэр атемылъхь, сыда пӀомэ хэбзэнчъэу зекӀорэр Сэ сыухыищтэп. 8Къуалъхьэ къаӀымых, сыда пӀомэ зынэ плъэхэрэр къуалъхьэм нэшъу ешӀых, зафэхэм яӀоф зэщегъакъо.

9Хэхэсыр емыгъэз, хэхэсым ыгу ихъыкӀырэр зыфэдэр ошӀэ, сыда пӀомэ ори Мысыр хэгъэгум хэхэсэу уисыгъ».

Мэфэ гъэнэфагъэхэм апылъ хабзэхэр

10Зиусхьаным джыри къыӀуагъ: «Илъэсихэ чылапхъэр уичӀыгу халъхь, лэжьыгъэри угъоижь. 11Яблэнэрэ илъэсым чӀыгум зегъэгъэпсэф, ежь-ежьырэу ащ къыщыкӀыгъэр уилъэпкъ щыщ тхьамыкӀэхэм гъомылэ афэхъунэу. Ахэм къялыжьырэр губгъо хьэкӀэ-къуакӀэмэ арэшх. Джащ фэдэу адэзекӀу уисэнэшъхьэ хати, уизэйтун хати. 12Мэфихэ уиӀофхэр зэшӀохыхи, уицуи уищыди загъэпсэфынэу, уипщылӀ бзылъфыгъэ ыкъуи, хэхэсми жьы къаӀухьанэу, яблэнэрэ мафэм зыгъэпсэф.

13ЗэкӀэ Сэ къышъосӀуагъэхэм шъунаӀэ атежъугъэт, нэмыкӀ тхьэмэ шъуямылъэӀу, ахэм ягугъу шъумышӀы.

14Сэщ пае илъэсым къыкӀоцӀ щэ жъугъэмэфэкӀы. 15Хьалыгъу мыкӀумыпшым имэфэкӀ хэжъугъэунэфыкӀ. Мэфиблэ хьалыгъу мыкӀумыпшыр шъушхы, Сэ унашъо къызэрэшъуфэсшӀыгъэу, Абиб мазэм#23:15 Мыщ ехьылӀагъэу еплъ мы тхылъым ия 13-рэ шъхьэ ия 4-рэ усэ. иуахътэу къэзгъэнэфагъэм тефэу, сыда пӀомэ а мазэм шъо Мысырым шъукъикӀыжьыгъ. ӀэнэкӀэуи сапашъхьэ къерэмыхьэх.

16Апэрэ лэжьыгъэу хэшъулъхьагъэхэр зышъуугъоижьхэкӀэ, хыныгъом имэфэкӀ хэжъугъэунэфыкӀ. Бжыхьэм, чӀыгум хэшъулъхьагъэр зэкӀэ зышъуугъоижьыкӀэ, лэжьыгъэугъоижьыным имэфэкӀ хэжъугъэунэфыкӀ.

17Хъулъфыгъэу шъуиӀэр зэкӀэ илъэсым къыкӀоцӀ щэ Зиусхьанэу Тхьэм ыпашъхьэ ихьанхэ фае.

18Къурмэн къысфэшъушӀырэм лъэу кӀэкӀыгъэм щыщ тэджэпс зыхалъхьэгъэ хьалыгъум тешъумыкӀ, мэфэкӀ къурмэнэу къысфэшъушӀырэм къытешъухыгъэ шэр пчэдыжьым нэс къэжъугъанэ хъущтэп.

19Апэрэ лэжьыгъэу хэшъулъхьагъэм инахьышӀур Зиусхьанэу шъуи Тхьэ и Унэ къэшъухь. Янэ ибыдзыщэ хэлъэу чэцӀыр шъумыгъажъо».

Гъэгугъэныгъэхэмрэ ушъыинхэмрэ яхьылӀагъ

20Зиусхьаным икъэгущыӀэн лъигъэкӀотагъ: «Мары мэлэӀичыр уапэ итынэу къэсэгъакӀо гъогум укъыщиухъумэнэу, Сэ къыпфэзгъэхьазырыгъэ чӀыпӀэм уищэнэу. 21Ащ ыпашъхьэ щызыфэсакъыжь, къыӀорэм едэӀу, упэмыуцужь, сыда пӀомэ шъузэремыдэӀурэр къышъуфигъэгъущтэп Сэ силъэкӀ ащ хэлъышъ. 22Ащ къыӀорэм уедэӀоу, къыуасӀорэр зэкӀэ бгъэцакӀэмэ, уипыймэ пыи сафэхъущт, къыппэшӀуекӀохэрэми сапэшӀуекӀощт. 23СимэлэӀич уапэ итэу кӀощт, Ӏамэр, хьат, пэрыц, къэнаӀан, хъыу, еус цӀыф лъэпкъхэм адэжь уищэщт, ахэри згъэкӀодыщтых. 24Ахэм ятхьэхэм шъхьащэ афэшъумышӀ, шъуафэмылажь, а лъэпкъхэм ашӀэхэрэр апэшъумышӀыжь, ау ятхьэнэпцӀхэр зэхэжъугъэтакъох, япкъэухэри зэхэшъукъутэх. 25Зиусхьанэу шъуи Тхьэ шъхьащэ фэшъушӀи, шъуфэлажьи, шъуихьалыгъуи шъуипси Сэ СынэшӀу къащысфэщт, узхэми шъуащысыухъумэщт. 26Игъо къэмысыгъэу сабый къызфэхъурэ е сабый зыхэмыкӀырэ бзылъфыгъэ шъуихэгъэгу исыщтэп, жъугъэшӀэщт мафэхэм япчъагъэ изгъэкъущт. 27Сищынэгъошхо шъуапэ итэу згъэкӀощт. ШъузэрыкӀощт гъогум шъуапэ къыщифэщт цӀыф лъэпкъ пстэури гузэжъогъушхом хэсыдзэщтых, зэкӀэ шъуипыйхэм кӀязгъэӀэжьыщт. 28АшӀэжьыщтыр амышӀэу Сэ ахэр гуӀэным хэсыдзэщтых, хъыу, къэнаӀан, хьат лъэпкъхэр хэгъэгум исфыщтых. 29Ау зы илъэскӀэ Сэ ахэр исфыщтхэп, чӀыгур бгынагъэу зэрэмыхъуным, губгъо хьэкӀэ-къуакӀэхэр къышъобэкӀыхэу щымыбэгъонхэм пае. 30Шъо нахь лъэпкъышхо шъохъуфэ, шъубагъоу, хэгъэгур шъуӀэ къешъогъэхьафэ Сэ а лъэпкъхэр мэкӀэ-макӀэзэ шъукӀэлъырысфыщтых. 31Шъуихэгъэгу игъунапкъэхэр хытӀуалэу Къамылым#23:31 Мы чӀыпӀэм зигугъу къыщишӀырэр Акабэ хытӀуалэр ары. къыщегъэжьагъэу Средиземнэ хым нэс, Шъоф нэкӀым къыщыублагъэу Евфрат псыхъом анэзгъэсыщтых, сыда пӀомэ а хэгъэгум щыпсэухэрэр зэкӀэ шъуӀэ къислъхьанхэшъ, шъуанэӀу ишъуфыщтых. 32Ежьхэми ятхьэхэми Ӏуагъэ адэшъумышӀ. 33Ахэр шъуихэгъэгу исынхэу щытэп – шъукъыспэшӀуекӀоу псэкӀод шъуамыгъэшӀэным пае ятхьэмэ шъхьащэ афэшъумышӀ, сыда пӀомэ ахэм шъуафэлажьэ зыхъукӀэ, ар кӀодыпӀэ шъуфэхъущт».

Currently Selected:

МысырикӀыжь 23: АдыТГ

Highlight

Copy