МысырикӀыжь 19

ЯпшӀукӀубгъонэрэ шъхьэр

Тхьэм израиль цӀыфхэм Синай къушъхьэм дэжь зыкъызэрэщафигъэнэфагъэр

1Израиль цӀыфхэр Мысыр хэгъэгум къызикӀыжьыгъэхэм иящэнэрэ мазэ, ошъогу мэзакӀэр къызщихьагъэм иапэрэ мафэ тефэу, ахэр Синай шъоф нэкӀым къынэсыгъэх. 2Израиль цӀыфхэр Рефидим икӀыхи, Синай шъоф нэкӀым къызэсхэм, къушъхьэм пӀэчӀынатӀэу уцупӀэ щашӀыгъ. 3Мосэ Тхьэм дэжь къушъхьэм зыдэкӀуаем, Зиусхьаныр къушъхьэм къеджыхи, ащ къыриӀуагъ: «Якъубэ къытекӀыгъэ израиль цӀыфхэм моущтэу яӀу: 4„Мысыр цӀыфхэм ясшӀагъэри, бгъэм ытамэхэм шъуатесым фэдэу Сэ шъукъызэресхьакӀыгъэри, Садэжь шъукъызэрэнэзгъэсыгъэри шъо шъулъэгъугъэ. 5Арышъ, Сэ сӀорэм шъуишъыпкъэу шъукъедэӀоу, Ӏуагъэу къыжъудэсшӀыгъэр жъугъэцакӀэмэ, шъо цӀыф лъэпкъ пстэуми къахэсхыгъэ Сиунэе Ӏэхьэ лъапӀэу шъущытыщт, сыда пӀомэ зэрэдунаеу зиер Сэры. 6Тетыгъо зиӀэ хэӀэтыкӀыгъэ хэушъхьафыкӀыгъэ къурмэнышӀхэу, Сапашъхьэ ит Сиунэе лъэпкъ лъапӀэу шъущытыщт“. Мы гущыӀэхэр ары израиль цӀыфхэм япӀожьыщтыр». 7Арыти Мосэ къушъхьэм къехыжьи, лъэпкъым инахьыжъ упчӀэжьэгъухэр къызэӀуигъакӀэхи, Зиусхьаным унашъо къыфишӀыгъэ гущыӀэхэр зэкӀэ ариӀожьыгъэх. 8ЦӀыфхэм зэкӀэми зэдырагъаштэу къаӀуагъ: «Зиусхьаным къыӀуагъэр зэкӀэ дгъэцэкӀэщт». Арыти Мосэ цӀыфхэм къаӀуагъэр Зиусхьаным лъигъэӀэсыжьыгъ. 9Зиусхьаным Мосэ къыриӀуагъ: «Мары, ошъопщэ Ӏужъум сыхэтэу уадэжь сыкъэкӀощт, Сэ сыкъызэрэбдэгущыӀэрэр лъэпкъым зэхихынэу, о пӀорэр сыдигъуи ашӀошъ хъунэу». Моси цӀыфхэм ягущыӀэхэр Зиусхьаным риӀожьыгъэх.

10Джыри Зиусхьаным Мосэ къыриӀуагъ: «ЦӀыфхэм адэжь кӀуи, непэрэ неущырэ зягъэукъэбз, ящыгъынхэр ягъэгыкӀых, 11ящэнэрэ мафэм фэрэхьазырых: сыда пӀомэ а мафэм цӀыфхэм янэрылъэгъоу Зиусхьаныр къехынышъ, Синай къушъхьэм къытеуцощт. 12ЦӀыфхэр къыблэмыкӀынхэу къушъхьэ лъапсэр къэгъэтхъыхьи, афэгъэпыт: „Шъуфэсакъ, къушъхьэм шъудэмыкӀуай, ащ ылъапи шъунэмыс; хэтыми къушъхьэм нэсырэм хьадэгъур къыфэкӀощт“. 13Къушъхьэм нэсыгъэ цӀыфым цӀыфыӀэ нэрэмыс, ащ нэсыгъэр орэхьайуан, орэцӀыф фаеми, мыжъокӀэ е щэбзащэкӀэ аукӀын фае, псэоу къэбгъанэ хъущтэп. ЗыригъэукӀыхьэу бжъэмыем ымакъэ къызщыӀурэм, ахэр къушъхьэм дэкӀоенхэ фитых».

14Мосэ къушъхьэм къехыжьи, цӀыфхэм заригъэукъэбзыгъ, ящыгъынхэри ахэм агыкӀыгъэх. 15ЕтӀанэ Мосэ цӀыфхэм ариӀуагъ: «Ящэнэрэ мафэм зыфэжъугъэхьазыр, шъуишъузхэм шъуагомыхь».

16Ящэнэрэ мафэм, пчэдыжьыр къызэсым, шыблэр гъуагъоу, пчыкӀэр джэгоу ошъопщэ Ӏужъур къушъхьэм къышъхьарыуцуи, бжъэмыем ымакъэ лъэш дэдэу къызэӀум, уцупӀэм щыӀэ цӀыфхэр зэкӀэ къызэлъыкӀэзэзыгъэх. 17Мыщ дэжьым Мосэ цӀыфхэр Тхьэм ӀукӀэнхэу уцупӀэм къырищхи, ахэр къушъхьэ лъапэм дэжь къыщыуцугъэх. 18Зиусхьаныр машӀом хэтэу Синай къушъхьэм къызэрэщехыгъэм къыхэкӀэу ар Ӏугъом зэлъиштэгъагъ. Хьакум Ӏугъор къызэрэрихырэм фэдэу, Ӏугъор ащ къыпыкӀыщтыгъ, къушъхьэр зэрэпсэоу лъэш дэдэу тӀыгурыгущтыгъ. 19Бжъэмыем ымакъэ зэпымыоу нахь лъэш хъущтыгъ. Мосэ къэгущыӀэ къэс Зиусхьаныр шыблэ гъогъо макъэм хэтэу ащ къыдэгущыӀэжьыщтыгъ. 20Зиусхьаныр Синай къушъхьэм, къушъхьэ шыгу дэдэм, къызыщехым, къушъхьэм дэкӀоенэу Мосэ къеджагъ. Арыти Мосэ ащ дэкӀоягъ. 21Зиусхьаным Мосэ къыриӀуагъ: «Зиусхьаныр тлъэгъущт аӀоу къезэрэмыфыжьэнхэм, ащыщыбэхэр мыкӀодынхэм пае ехыжьи, цӀыфхэм афэгъэпыт. 22Зиусхьаным ымыукӀынхэм пае Ащ ыпашъхьэ ит къурмэнышӀхэми зарэукъэбз». 23Мосэ Зиусхьаным риӀожьыгъ: «ЦӀыфхэр Синай къушъхьэм къыдэкӀоенхэ алъэкӀыщтэп, сыда пӀомэ къушъхьэр къэдгъэтхъыхьанышъ, Тхьэм фыхэхыгъэ къушъхьэ лъапӀэу ар тлъытэнэу О къытфэбгъэпытэгъах». 24Зиусхьаным ащ къыриӀожьыгъ: «КӀо, ехыжьи, Хьарунэ уигъусэу етӀанэ къыдэкӀоежь. Ау Зиусхьаным къурмэнышӀхэмрэ цӀыфхэмрэ ымыгъэкӀодынхэм пае Ащ дэжь къыдэкӀоенхэу ахэр къезэрэрэмыфыжьэх». 25Арыти Мосэ къехыжьи, къэбарыр цӀыфхэм къафиӀотэжьыгъ.

Currently Selected:

МысырикӀыжь 19: АдыТГ

Highlight

Copy