МысырикӀыжь 16

ЯпшӀыкӀухэнэрэ шъхьэр

Тхьэм гъомлапхъэ шъоф нэкӀым къызэрэщаритыгъэр

1Израиль цӀыфхэр зэкӀэ зэрэзэхэтхэу Елым къыдэкӀхи, Мысыр хэгъэгум къызикӀыжьыгъэхэм ыуж зы мазэ тешӀагъэу, Елымрэ Синайрэ азыфагу илъ шъоф нэкӀэу Син къэкӀуагъэх. 2Шъоф нэкӀым итхэу израиль цӀыфхэр зэкӀэ зэрэзэхэтхэу Мосэрэ Хьарунэрэ афэмыразэхэу джыри ягыигъэх.

Израиль цӀыфхэр зэрэгыещтыгъэхэр

3Израиль цӀыфхэм ахэм араӀуагъ: «Е, Зиусхьаным Мысыр хэгъэгум тыригъэкӀодэгъагъэмэ нахьышӀугъ! Ащ лыр зэрылъ щыуанмэ тащыкӀэрысэу, зэтэгъэшхэкӀыфэ хьалыгъур щытшхыщтыгъ. Шъо тызэрэзэхэтэу гъаблэм тежъугъэгъэлӀэнэу шъоф нэкӀым тыкъэшъущагъ». 4ЕтӀанэ Зиусхьаным Мосэ къыриӀуагъ: «Мары, Сэ ощхым фэдэу хьалыгъур ошъогум къышъуфезгъэхыщт. Арышъ, мафэ къэс цӀыфхэр къикӀыхэзэ, мафэм ящыкӀэгъэщтым фэдиз къарэугъойи, Сэ сихабзэ тетэу зекӀощтхэми-мызекӀощтхэми ахэр Сэ згъэунэфыщтых. 5Яхэнэрэ мафэм къахьырэр загъэхьазыркӀэ, ар нэмыкӀ мафэхэм къахьырэм фэдитӀукӀэ нахьыбэу къычӀэкӀыщт». 6Мосэрэ Хьарунэрэ израиль цӀыфхэр зэкӀэ зэрэзэхэтхэу араӀуагъ: «Мысыр хэгъэгум шъукъизыщыжьыгъэр зэрэ Зиусхьаныр пчыхьашъхьэ шъо къэшъушӀэщт. 7Пчэдыжьым Зиусхьаным и Щытхъушхо шъулъэгъущт, сыда пӀомэ Зиусхьаным шъузэрэгыягъэр къызэхихыгъ. Тэ тыхэта шъукъытэгыинэу?» 8ЕтӀани Мосэ къыӀуагъ: «Зиусхьаным пчыхьэм шъушхынэу лы къышъуитэу, пчэдыжьым шъузыфаем фэдиз хьалыгъуи зышъуигъэшхыкӀэ, къэшъушӀэщт, сыда пӀомэ Зиусхьаным шъуфэмыразэу шъузэрэгыерэр Ащ къызэхихыгъ. Тэ тыхэта? Тэрэп шъузэгыирэр, Зиусхьаныр ары нахь». 9Мосэ Хьарунэ риӀуагъ: «Зэрэизраиль цӀыф лъэпкъэу яӀу: „Зиусхьаным ыпашъхьэ шъукъиуцу, сыда пӀомэ шъузэрэгыягъэр Ащ къызэхихыгъ“». 10ЕтӀанэ Хьарунэ зэкӀэ израиль цӀыфхэм адэгущыӀэзэ, ахэр шъоф нэкӀым ылъэныкъокӀэ зэплъэхэм, мары, ошъуапщэм хэтэу Зиусхьаным и Щытхъушхо къафэлъэгъуагъ. 11Зиусхьаным Мосэ къыриӀуагъ: 12«Сэ израиль цӀыфхэм ягые макъэ зэхэсхыгъ. Ахэм яӀу: „Пчыхьашъхьэ лы шъушхыщт, пчэдыжьым хьалыгъукӀэ зыжъугъэшхэкӀыщт“. Сэ сызэрэ Зиусхьаныри сызэрэ шъуи Тхьэри джащыгъум къэшъушӀэщт».

Тхьэм хьалыгъурэ лырэ къызэраритыгъэр

13Пчыхьэм ныбгъухэр къэбыбхи, уцупӀэр зэлъабгъагъ, пчэдыжьым уцупӀэм дэжь осэпсыр телъыгъ. 14Пчэдыжьым осэпсыр зытекӀыжьым, мары, лэжьыгъэ зэтегъэпхъыгъэм ехьщырэу, шъхъашъхъэу, чъэпым фэдэу зыгорэ шъоф нэкӀым ышъхьашъо телъ. 15Израиль цӀыфхэм ар залъэгъум, зэраӀожьыгъ: «Сыда мыр?» Сыда пӀомэ ар зылӀэужыгъор ашӀэщтыгъэп. Мосэ ахэм ариӀуагъ: «Мыр Зиусхьаным хьалыгъоу къышъуитырэр ары. 16Мары Зиусхьаным иунашъор: нэбгырэ пэпчъ ежь фэшхыщтым фэдиз, Ӏомэр зыфаӀорэ шыкъум#16:16 Ӏомэрыр литри 2 фэдиз мэхъу. из къерэугъой, зы нэбгырэм телъытагъэу, шъхьадж ичэтэн гъэӀагъэ чӀэс нэбгырэ пчъагъэм телъытагъэу къэшъуугъой». 17Израиль цӀыфхэм джаущтэу ашӀыгъ, зым нахьыбэу, адрэм нахь макӀэу къаугъоигъ. 18ӀомэрымкӀэ запщым, бэу зыугъоигъэм къемылыекӀэу, макӀэу зыугъоигъэми щыкӀагъэ имыӀэу, шъхьадж фэшхыщтым фэдиз къыугъоигъэу къычӀэкӀыгъ. 19Мыщ дэжьым Мосэ ахэм ариӀуагъ: «Зыми пчэдыжьым нэс мыр къерэмыгъан». 20Ау Мосэ ахэр емыдэӀухэу, зыгорэмэ ащ щыщ пчэдыжьым нэс къагъэнагъ. Арыти хьамлыухэр хидзэхи, шъумэр къыпыу хъугъэ. Мосэ ахэм афэгубжыгъ. 21Джэущтэу пчэдыжьым жьэу ар къаугъоищтыгъэ, шъхьадж ежь фэшхыщтым фэдиз. Тыгъэм къызигъэплъыкӀэ, ар ткӀужьыщтыгъэ.

Тхьэм шэмбэтыр зыгъэпсэфыгъо мафэу къызэрафигъэнэфагъэр

22Мары яхэнэрэ мафэм хьалыгъур фэдитӀукӀэ нахьыбэу, нэбгырэ пэпчъ телъытагъэу Ӏомэр тӀурытӀу къаугъоигъ. ЗэкӀэ израиль цӀыфхэм япащэхэр къакӀохи, Ӏофыр зытетыр Мосэ къыфаӀотагъ. 23Арыти Мосэ ахэм къариӀожьыгъ: «Зиусхьаным къыӀуагъэр мары: неущ зыгъэпсэфыгъу, Зиусхьаным фэгъэхьыгъэ шэмбэт лъапӀэшъ, жъугъэжъэн фаер жъугъажъэ, жъугъэжъон фаери непэ жъугъажъо, къэнэжьырэр зэкӀэ жъугъэтӀылъи, неущ нэс щыжъугъэлъ». 24Мосэ унашъо къызэрафишӀыгъэм тетэу ар агъэтӀылъыгъ, ащ шъуми пыугъэп, хьамлыуи хидзагъэп. 25Мыщ дэжьым Мосэ ариӀуагъ: «Зиусхьаным ихьалыгъу непэ шъушхы: сыда пӀомэ непэ Зиусхьаным ишэмбэт маф, непэ ар шъофым ижъугъотэщтэп. 26Мэфихрэ ар шъуугъой, яблэнэрэ мафэр – шэмбэтышъ, а мафэм ар щыӀэщтэп». 27ЦӀыфхэм ащыщ горэхэр яблэнэрэ мафэм угъоенхэу къыдэкӀыгъэх, ау зи къагъотыгъэп. 28Арыти Зиусхьаным Мосэ къыриӀуагъ: «Сыд фэдизрэ Сиунашъохэмрэ Сихабзэхэмрэ шъумыгъэцакӀэхэу шъухэтыщта? 29Шъуфэсакъ: Зиусхьаным шэмбэтыр къышъуитыгъэшъ, тхьэмафэм ияхэнэрэ мафэ мэфитӀум шъуфикъунэу хьалыгъу Ащ къышъуфырегъэхы. Арышъ, яблэнэрэ мафэм нэбгырэ пэпчъ ядэжь ерэс, хэти ичӀыпӀэ имыкӀэу щэрэс». 30Джаущтэу яблэнэрэ мафэ къэс цӀыфхэм загъэпсэфыщтыгъ. 31Израиль цӀыфхэр хьалыгъум монкӀэ#16:31 Ижъырэ джуртыбзэмкӀэ къызэраӀощтыгъэр: ман. Ащ къикӀырэр: мыр сыд? еджагъэх. Ар къоныкӀэм ехьыщырыгъ, фыжьыгъ, шъоу зыхэлъ хьарыпӀым фэдагъ. 32Мыщ дэжьым Мосэ ариӀуагъ: «Мары Зиусхьаным унашъоу къышӀыгъэр: мысыр чӀыгум шъукъызесэщыжьым, шъоф нэкӀым щышъозгъэшхыгъэ хьалыгъур алъэгъуным пае шъуилӀэуж зэкӀэлъыкӀохэм зыдаӀыгъынэу моныр Ӏомэрым из шъушӀы». 33Мосэ Хьарунэ риӀуагъ: «Зы шыкъу шти, Ӏомэрым из моныр ащ илъхьи, шъуилӀэуж зэкӀэлъыкӀохэм къаухъумэнэу Зиусхьаным ыпашъхьэ игъэуцу». 34Зиусхьаным МосэкӀэ унашъо къызэришӀыгъэм тетэу, Хьарунэ ар шыхьат папкӀэу пхъонтэ лъапӀэм ыпашъхьэ ригъэуцогъагъ.

35Израиль цӀыфхэр зыщыпсэунхэ алъэкӀыщт чӀыгум, КъэнаӀан хэгъэгум игъунапкъэмэ къанэсыфэхэ, моныр илъэс тӀокӀитӀурэ ашхыгъ. 36Ӏомэрыр ефа#16:36 Литрэ 20 фэдиз зэрыфэрэ шыкъу. зыфаӀорэ пщэлъэ шапхъэм фэдипшӀыкӀэ нахь цӀыкӀу.

Currently Selected:

МысырикӀыжь 16: АдыТГ

Highlight

Copy