Хэбзэ тхыжьыгъэр 9
9
Ябгъонэрэ шъхьэр
Израил цӀыфхэр зэрэмыдэӀуагъэхэмрэ Тхьэм ифэшъыпкъэныгъэрэ
1Мосэ израил лъэпкъым риӀуагъ: «КъэдаӀу, израил лъэпкъыр, ощ нахьыбэ хъурэ, ощ нахь лъэшэу щыт цӀыф лъэпкъхэр зэрыс чӀыгоу, зидэпкъхэр уашъом нэс кӀэорэ къэлэшхохэр зэрытыр уиунае зэрэхъунэу, ащ щыпсэухэрэр къипфынхэу Иордан джы узэпырыкӀыщт. 2А цӀыфхэр кӀочӀэшхох, лъагэх – ахэр Ӏэнэкъ иныжъым къыхэкӀыгъэхэр ары. Ахэм якъэбар ущыгъуаз, „Ӏэнэкъ къыхэкӀыгъэхэм хэт атекӀон зылъэкӀыщтыр?“ зэраӀори зэхэпхыгъэ. 3Ау джы къызгурыгъаӀу: уи Зиусхьанэу Тхьэр узышхырэ мэшӀошхом фэдэу уапэ итэу кӀощт. Ащ ахэр ыгъэкӀодыщт, Ащ ахэр пӀэ къырилъхьащт. Уи Зиусхьан укъызэригъэгугъагъэм фэдэу, о ахэр епфыжьэнхэшъ, псынкӀэу зэхэуукӀэщт. 4Уи Зиусхьанэу Тхьэм ахэр зыпкӀэлъырифхэкӀэ, „Сишъыпкъагъэ пае Зиусхьаным мы чӀыгур сиунае зэрэхъунэу мыщ сыкъыщагъ“ пӀоу зэмыӀожь. Хьау, янэпэнчъагъэ пае Зиусхьаным мы цӀыф лъэпкъхэр зыпкӀэлъырифыщтхэр. 5Уизэфагъэрэ уишъыпкъагъэрэ паеп ахэм ячӀыгу уиунае зэрэхъунэу узыкӀакӀорэр. Уи Зиусхьанэу Тхьэм тятэжъхэу Ибрахьимэ, Исхьакъ, Якъубэ гущыӀэ пытэу къадишӀыгъэр ыгъэцэкӀэжьынэу янэпэнчъагъэ пае джа цӀыф лъэпкъхэр пкӀэлъырифыщт. 6ЗэгъашӀэ: уишъыпкъагъэ паеп уи Зиусхьанэу Тхьэм мы чӀыгушӀур уиунэенэу къызкӀыуитырэр, сыда пӀомэ о зыгу зэшӀодзэгъэ цӀыф лъэпкъэу ущыт».
ШкӀэ теплъэ зиӀэ тхьэнэпцӀыр дышъэм зэрэхашӀыкӀыгъэр
7«Шъоф нэкӀым шъуит зэхъум шъуи Зиусхьанэу Тхьэр зэрэжъугъэгубжыщтыгъэр шъугу ижъугъэлъ, зыщышъумыгъэгъупш. Мысырым шъукъызщикӀыжьыгъэ мафэм щегъэжьагъэу мыщ тыкъэсыфэ Зиусхьаным ренэу шъупэуцужьыгъ. 8Синай къушъхьэм дэжь Зиусхьаныр лъэшэу зэрэщыжъугъэгубжыгъэм нахь хэмылъэу шъуигъэкӀодыпэным Ар фэхьазырыгъ. 9МыжъобгъуитӀур, Зиусхьаным шъо къыжъудишӀыгъэ зэзэгъыныгъэр зытетхэгъэ мыжъобгъуитӀур, къэсхьынэу къушъхьэм сызыдэкӀуаем, къушъхьэм мэфэ тӀокӀитӀурэ чэщ тӀокӀитӀурэ сыкъэтыгъ; хьалыгъуи зыӀуслъхьагъэп, пси зыӀузгъэфагъэп. 10Зиусхьанэу Тхьэм Ежь ыӀэкӀэ ытхыгъэ мыжъобгъуитӀур сэ къыситыгъ. ШъукъызщызэӀукӀэгъэгъэ мафэм къушъхьэр зыхэтыгъэ машӀом Зиусхьаным шъощ пае къыхиӀукӀыгъэ унашъохэр зэкӀэ ахэм атетхэгъагъэх. 11Мэфэ тӀокӀитӀурэ чэщ тӀокӀитӀурэ зытешӀэм зэзэгъыныгъэр зытетхэгъэ мыжъобгъуитӀур Зиусхьаным къыситыгъ. 12Зиусхьаным къысиӀуагъ: „Мысырым къипщыжьыгъэ цӀыфхэр зэӀыхьагъэхэшъ, псынкӀаӀоу мыщ ехыжь! Сэ унашъо къызэрафэсшӀыгъэ гъогум ахэр псынкӀэу дэхыгъэх: тхьэнэпцӀыр зыфашӀыжьыгъ“. 13Арти Зиусхьаным къысиӀуагъ: „Сэлъэгъу Сэ а цӀыф лъэпкъыр, ыгу зэшӀодзагъ а цӀыф лъэпкъым. 14СкӀэрыкӀыжь, ахэр Сэ зэхэзгъэкӀодэщтых, ацӀэхэри агу къэмыкӀыжьынхэу ошъо чӀэгъым щахэстхыкӀыжьыщтых, ау нахь лъэшэуи нахьыбэ хъоуи цӀыф лъэпкъ о къыптезгъэкӀыщт“. 15Къэзгъэзэжьи, машӀоу стырэ къушъхьэм сыкъехыжьыгъ. Зэзэгъыныгъэр зыбгъухэм атетхэгъэ мыжъобгъуитӀур сӀыгъыгъ. 16Сыкъызэплъэм, шъуи Зиусхьанэу Тхьэм ыпашъхьэ псэкӀод зэрэщышъушӀагъэр, шкӀэ теплъэ зиӀэ тхьэнэпцӀыр дышъэм зэрэхэжъугъэткӀукӀыгъэр, Зиусхьаным унашъо къызэрэшъуфишӀыгъэ гъогум псынкӀэу шъузэрэдэхыгъэр слъэгъугъэ. 17Мыжъобгъухэр къасшти чӀэсыдзыгъэх, шъулъэгъузэ ахэр зэхэзгъэшъхъэшъхъагъэх. 18ЕтӀанэ Зиусхьаным инэрылъэгъоу бзэджагъэкӀэ псэкӀод зэрэшъушӀагъэм, ащ пае Ар зэрэжъугъэгубжыгъэм къахэкӀэу Зиусхьаным ыпашъхьэ зыщесыдзыхи джыри мэфэ тӀокӀитӀурэ чэщ тӀокӀитӀурэ хьалыгъу зыӀуслъхьагъэп, пси зыӀузгъэфагъэп. 19Зиусхьаным игубж лъэш сыщыщынэщтыгъ, сыда пӀомэ Ащ игубж къызэрэзэкӀэнагъэм къыхэкӀэу шъуигъэкӀодыным фэхьазырыгъ. Ау Зиусхьаныр мызэгъогуми къысэдэӀугъ. 20Зиусхьаныр Хьаруни ыгъэкӀодыпэным нэсэу къыфэгубжыгъагъ, ау Хьарунэ паи Тхьэм селъэӀугъ. 21ШкӀэ теплъэ зиӀэ а тхьэнэпцӀэу псэкӀодкӀэ шъушӀыгъэр сшти, машӀом хэзгъэстыхьагъ. Ар зэхэскъути, сапэм фэдэу схьаджыжьи, къушъхьэм къечъэхырэ псым хэстэкъожьыгъ. 22Джащ фэдэу чӀыпӀэхэу ТапӀэрах, Масэ, Къыбрэт-Хьэтау#9:22 Мыщ ехьылӀагъэу яплъ тхылъхэу «МысырикӀыжь» 17:1-7; «Мосэ ияплӀэнэрэ тхылъ» 11:1-2, 31-37 адэжь Зиусхьаныр шъо ащыжъугъэгубжыгъагъ. 23ЕтӀанэ Зиусхьаным чӀыпӀэу Къадэщ-Барнэ къышъуигъэбгынэ зэхъум къышъуиӀогъагъ: „ШъукӀуи, Сэ къышъостынэу гущыӀэ пытэ зыфэсшӀыгъэ чӀыгур шъуиунэенэу шъуубыты“. Ау шъо шъуи Зиусхьанэу Тхьэм иунашъо шъупэуцужьыгъ. Ащ цыхьэ фэшъушӀыгъэп, ыӀорэми шъуедэӀугъэп. 24Сэ шъузщысшӀэрэм щегъэжьагъэу шъо Зиусхьаным шъупэуцужьщтыгъ. 25Зиусхьаным шъуигъэкӀодынэу къысиӀуагъэти, Ащ ыпашъхьэ зыщесыдзыхыгъэу мэфэ тӀокӀитӀурэ чэщ тӀокӀитӀурэ сыщылъыгъ. 26Зиусхьаным селъэӀузэ есӀощтыгъ: „ЗэкӀэ зыӀэ илъэу Зиусхьан, О уиунэе уилъэпкъэу, уилъэшыгъэкӀэ Мысырым къипщыжьыгъэр умыгъэкӀод. 27Угу къэгъэкӀыжьхэба уиӀумэтхэу Ибрахьимэ, Исхьакъ, Якъубэ. Мы цӀыф лъэпкъым икъаигъагъэ, инэпэнчъагъэ, ипсэкӀодшӀагъэ уямыплъыба. 28Армырмэ О тыкъызэрыпщыжьыгъэ хэгъэгум щаӀонба: ‘Къызэригъэгугъэгъэхэ чӀыгум зэрэримыщэшъугъэхэмрэ зэрэфэмылъэгъухэмрэ къахэкӀэу, шъоф нэкӀым ригъэкӀодэнхэу Зиусхьаным ахэр рищыгъэх’. 29Ау ахэр гъунэ зимыӀэ О уилъэшыгъэрэ пкӀуачӀэрэкӀэ къахэпщыжьыгъэ уиунэе уицӀыф лъэпкъыба!“».
Currently Selected:
Хэбзэ тхыжьыгъэр 9: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
