Хэбзэ тхыжьыгъэр 7

Яблэнэрэ шъхьэр

Хымэ лъэпкъхэр ифыгъэнхэр

1Мосэ израил цӀыфхэм ариӀуагъ: «Шъуи Зиусхьанэу Тхьэм шъуубытыщт чӀыгум шъуиунае хъунэу шъузырищэкӀэ, цӀыф лъэпкъыбэхэр, шъощ нахьыбэу, нахь лъэшэу щыт цӀыф лъэпкъиблыр, шъукӀэлъырифыщтых. Ахэр хьатхэр, гъыргъащхэр, амэрхэр, къэнаӀанхэр, пэрыцхэр, еуйхэр, еусхэр арых. 2Шъуи Зиусхьанэу Тхьэм ахэр шъуӀэ къырилъхьэхэу зызэхэшъукъутэхэкӀэ, ащыщ къэмынэу зэхэшъуукӀэнхэ фае. Зэзэгъыныгъи адэшъумышӀ, гукӀэгъуи афэшъумышӀ. 3Къэщэн-дэкӀон ӀофкӀэ ахэр пыщэгъу къызфэшъумышӀых. Шъупхъухэр ахэм якӀалэмэ адэшъумыгъакӀу, япхъухэр шъуикӀалэмэ къяшъумыгъащ. 4Армырмэ ахэм япхъумэ шъуикӀалэхэр Зиусхьаным кӀэлъыращынхэшъ, шъхьащэ афарагъэшӀынэу нэмыкӀ тхьэхэм афащэщтых, Зиусхьанри шъуилъэпкъ къыфэгубжынышъ, шъуигъэкӀодыщт. 5Мары ахэм шъузэрадэзекӀощтыр: якъурмэншӀыпӀэхэр зэхэшъукъутэх, шъхьащэ зыфашӀырэ агъэлъэпӀэрэ мыжъо пкъэухэр зэхэжъугъэшъхъашъхъэх, агъэлъэпӀэрэ пкъэухэр#7:5 АшэрэкӀэ заджэхэрэ тхьэнэпцӀым шъхьащэ фашӀыным пае мыхэр агъэфедэщтыгъэх. ишъуупкӀых, ятхьэ сурэтхэр жъугъэстых.

6Шъо шъуи Зиусхьанэу Тхьэм ицӀыф лъэпкъ лъапӀэу шъущытба, шъуи Зиусхьанэу Тхьэм Ежь иунэе Ӏэхьэ лъапӀэу шъущытынэу, шъурилъэпкъынэу дунаим тет адрэ цӀыф лъэпкъ пстэуми шъукъахихыгъ. 7Зиусхьаным шъо шъукъызкӀахихыгъэр нэмыкӀ цӀыф лъэпкъхэм анахьыбэу шъущытыгъэкӀэ арэп, пчъагъэмкӀэ шъунахь мэкӀагъэба. 8ШӀу шъузэрилъэгъурэм, тятэжъмэ адишӀыгъэ гущыӀэ пытэр ымыукъоным пае Зиусхьаным шъукъызкӀахихыгъэр. Ащ ыкӀочӀэ лъэшкӀэ шъукъахищыжьыгъ, пщылӀыпӀэм шъукъырищыжьыгъ, Мысырым ипачъыхьэ фирхьауным шъукъыӀэкӀихыжьыгъ. 9ЗэжъугъашӀэ: шъуи Зиусхьанэу Тхьэр ар Тхьэ закъу. Ар фэшъыпкъэныгъэ зиӀэ Тхьэу щыт, Ежь шӀу зылъэгъухэу, иунашъохэр зыгъэцакӀэхэрэм къахэкӀыгъэ лӀэуж минхэр игукӀэгъурэ зэзэгъыныгъэу адишӀыгъэмрэкӀэ къеухъумэх. 10Ау Ежь зымыгъэлъапӀэу, зыфэмылъэгъурэ пстэури Ащ ыгъэкӀодыщт. Ежь зымыгъэлъапӀэу, зыфэмылъэгъурэ пстэуми ымыгъэгужъоу яфэшъуашэ аригъэгъотыщт. 11Арышъ, непэ шъузыфэзгъэсэрэ унашъохэр, шапхъэхэр, хэбзэ гъэунэфыгъэхэр жъугъэцакӀэх».

ДэӀоным ишӀуагъ

12Мосэ къыӀуагъ: «А хэбзэ гъэунэфыгъэхэм шъуафэсакъэу, шъуадэмыхэу жъугъэцакӀэхэмэ, шъуи Зиусхьанэу Тхьэм тятэжъхэм гущыӀэ пытэ къызэрадишӀыгъэм тетэу, Ежь къышъуфыриӀэ гукӀэгъумрэ зэзэгъыныгъэу къыжъудишӀыгъэмрэ къыухъумэщт. 13Ащ шъо шӀу шъуилъэгъущт, ынэшӀуи къышъущыфэщт, лъэпкъыри ыгъэбэгъощт. Бынэу къышъухэкӀыщтхэм, шъуичӀыгу къыщыкӀхэрэм, лэжьыгъэм, сэнэ кӀэфыгъакӀэм, зэйтын дагъэм, шъуибылым, мэл-пчэн Ӏэхъогъухэм къакӀэхъощтхэм шъуӀэ къырилъхьанэу шъуятэжъхэр гущыӀэ пытэкӀэ къызфигъэгугъагъэхэ чӀыгум Ащ ынэшӀу къащищыфэщт. 14Адрэ цӀыф лъэпкъ пстэуми анахьэу нэшӀущыфэныгъэ шъуиӀэщт; сабый къызхэмыкӀырэ хъулъфыгъи бзылъфыгъи шъухэтыщтэп, шъуибылымхэм къахэмыхъоуи къэнэщтхэп. 15Зиусхьаным уз пстэуми шъуащиухъумэщт. Мысырым щыжъугъэунэфыгъэ уз Ӏаемэ ащыщ гори Ащ къышъуфигъэкӀощтэп, ау шъузфэмылъэгъурэ пстэуми ахэр къафигъэкӀощт. 16Шъуи Зиусхьанэу Тхьэм шъуӀэ къырилъхьащт цӀыф лъэпкъ пстэури зэхэшъуукӀэх. Ахэм шъугу яшъумыгъэгъу, ятхьэхэми шъхьащэ афэшъумышӀ, ахэм шъуафэлажьэ зыхъукӀэ, ар кӀодыпӀэ шъуфэхъущт.

17Шъо шъугу къихьан ылъэкӀыщт: „А цӀыф лъэпкъхэр тэщ нахьыбэу сыдэущтэу ахэр ячӀыгу итфышъущтха?“ 18Ау ахэм шъуащымыщынэу, шъуи Зиусхьанэу Тхьэм фирхьаунми зэрэ Мысырэуи аришӀагъэхэр шъугу къэжъугъэкӀыжь. 19Шъуи Зиусхьанэу Тхьэм илъэшыгъэрэ ыкӀуачӀэрэкӀэ ушэтыпӀэхэмкӀэ, гъэунэфыпӀэхэмкӀэ, шӀэгъошӀагъэхэмкӀэ Мысырым шъукъызэрэрищыжьыгъэр шъо шъунитӀукӀэ шъулъэгъугъэ. Шъуи Зиусхьанэу Тхьэм джы шъо шъузщыщынэрэ лъэпкъ пстэуми джар аришӀэщт. 20Ащ къыщымыуцоу шъуи Зиусхьанэу Тхьэм ахэр гуӀэным хидзэщтых#7:20 Ижъырэ джуртыбзэкӀэ тхыгъэ Ӏэпэрытхым зэрэхэтыр: «къэцыгъонэшхохэр къатыригъэбэнэщтых»., псэоу къэнэжьыгъэу шъо зышъушӀозгъэбылъхэри зы нэбгырэ къэмынэу кӀодыщтых. 21Шъо щъуигъусэ шъуи Зиусхьанэу Тхьэр – Ар кӀочӀэшхоу, щынагъошъ, ахэм шъуащымыщын. 22Шъуи Зиусхьанэу Тхьэм игъорыгъоу цӀыф лъэпкъхэр шъукӀэлъырифыщтых. Ау шъо ахэр зэу зэхэшъуукӀэнхэ шъулъэкӀыщтэп, армырмэ губгъо хьэкӀэ-къуакӀэхэр къышъобэкӀыхэу зэлъыбэгъощтых. 23Шъуи Зиусхьанэу Тхьэм а цӀыф лъэпкъхэр шъуӀэ къырилъхьащтых, ахэр емыгъэкӀодыфэхэ, гузэжъогъушхом хигъэтыщтых. 24Ахэм япачъыхьэхэр Ащ шъуӀэ къырилъхьанхэшъ, егъашӀэми агу къэмыкӀыжьынхэу, кӀодыкӀае шъушӀыщтых. ЗэкӀэри зэхэшъумыукӀэфэ, хэти къышъупэуцужьын ылъэкӀыщтэп. 25Ахэм ятхьэ сурэтхэр жъугъэстынхэ фае. Ядышъи ятыжьыни шъуямынэцӀ, къэшъумыштэх, армырмэ лъахъэ шъуфэхъущтых. Шъуи Зиусхьанэу Тхьэм ар шӀоемыкӀушху. 26ЕмыкӀушхор шъуиунэмэ арышъумыхь, армырмэ ащ телъ бгыбзэр шъори къышъутефэнышъ, шъукӀодыщт. А зэпстэури хьэрам шъушӀы, сыда пӀомэ Тхьэм ибгыбзэ ахэм ателъ».

Currently Selected:

Хэбзэ тхыжьыгъэр 7: АдыТГ

Highlight

Copy