Хэбзэ тхыжьыгъэр 29

Мосэ иящэнэрэ псалъ

(я 29-рэ – я 30-рэ шъхьэхэр)

ЯтӀокӀэнэрэ бгъурэ шъхьэр

Моаб хэгъэгум щызэдашӀыгъэ зэзэгъыныгъэр

1 # 29:1 Мы усэр ижъырэ джуртыбзэкӀэ тхыгъэ Ӏэпэрытхым ия 28-рэ шъхьэ ия 69-рэ усэу щыт. Зиусхьаным израил цӀыфхэм Синай къушъхьэм дэжь къащадишӀыгъэ зэзэгъыныгъэм нэмыкӀэу ахэм Моаб хэгъэгум ащадишӀынэу Мосэ къыриӀогъэ зэзэгъыныгъэр зыфэдэр мары. 2Мосэ израил цӀыфхэр зэкӀэ къызэӀуигъакӀи ариӀуагъ: «Зиусхьаным фирхьауными, ащ иӀумэт Ӏэшъхьэтетхэми, ихэгъэгуи зэрэщытэу Мысырым зэкӀэ ащаришӀагъэхэр шъунитӀукӀэ шъулъэгъугъэ. 3Шъо шъулъэгъугъэ ушэтыпӀэшхохэр, гъэунэфыпӀэшхохэр, шӀэгъошӀэгъэ инхэр. 4Ау мы мафэм нэс Зиусхьаным къыжъугурыӀонэу акъыл, шъулъэгъунэу нэхэр, зэхэшъухынэу тхьакӀумэхэр къышъуитыгъэхэп. 5Илъэс тӀокӀитӀум шъоф нэкӀым шъукъыщесщэкӀыгъ, ау шъуищыгъынхэри шъуицуакъэхэри лэжьагъэхэп. 6Зиусхьаныр зэрэшъуи Тхьэр шъушӀэнэу хьалыгъу шъушхыгъэп, сани шъуати шъуяшъуагъэп#29:6 Мыщ ехьылӀагъэу еплъ мы тхылъым ия 8-рэ шъхьэ ия 3-рэ усэ.. 7Мы чӀыпӀэм тыкъэсыгъэу Хъэщбэным ипачъыхьэу Сыхъонрэ Бащаным ипачъыхьэу Ӏогърэ къытэзэонхэу къызытпэуцужьхэм, ахэр зэхэтыукӀагъэх. 8Ахэм ячӀыгухэр тыубытхи, Рубэнрэ Гъадрэ ялӀакъохэм, Мынасэ илӀакъо ыныкъо яунэе Ӏахьэу яттыгъэх.

9ШъуиӀофхэр зэкӀэ къызэрэжъудэхъунхэу мы зэзэгъыныгъэм итхагъэр зэкӀэ дэх имыӀэу жъугъэцакӀэ. 10-11Непэ шъо зэкӀэми – шъуилӀакъомэ япащэхэми, шъуинахьыжъ упчӀэжьэгъухэми, шъуиӀэшъхьэтетхэми, зэкӀэ адрэ израил хъулъфыгъэхэми, шъуикӀалэхэми, шъуишъузхэми, хымэ цӀыф лъэпкъхэм къахэкӀыгъэу пхъэр шъуфэзыкъутэу, псыр къышъуфэзыхьэу шъуиуцупӀэ дэсхэри зэрэшъуигъусэхэу шъуи Зиусхьанэу Тхьэм ыпашъхьэ шъуит. 12Шъуи Зиусхьанэу Тхьэм гущыӀэ пытэкӀэ къыушыхьатыжьырэ зэзэгъыныгъэр дэшъушӀынэу непэ мыщ дэжьым шъущыт, 13шъукъызэригъэгугъагъэу, шъуятэжъхэу Ибрахьимэ, Исхьакъ, Якъубэ гущыӀэ пытэ къызэрадишӀыгъагъэу, Ежь ицӀыф лъэпкъэу непэ шъузэришӀыным, шъо шъуи Тхьэу Ежь зэрэщытыным пае. 14Тхьэм къызэрэшъуиӀоу, шъо шъуизакъоп мы зэзэгъыныгъэу гущыӀэ пытэкӀэ къэгъэшъыпкъэжьыгъэр Ащ зыдишӀырэр, 15ти Зиусхьанэу Тхьэм ыпашъхьэ непэ мыщ дэжь итхэм язакъоп, ау тапэкӀэ къышъухэкӀыщтхэри ары.

16Мысырым псэукӀэу щытиӀагъэр зыфэдэри мыщ тыкъакӀо зэхъум хэгъэгухэр къызэрэзэпытчыгъэ шӀыкӀэри шъори шъошӀэ. 17Ахэм шъо ащышъулъэгъугъэх пхъэмрэ мыжъомрэ, тыжьынымрэ дышъэмрэ ахашӀыкӀыгъэ емыкӀушхохэмрэ тхьэ сурэтхэмрэ. 18Арышъ, ти Зиусхьанэу Тхьэр гум изынэн, мы цӀыф лъэпкъхэм ятхьэмэ адэжь кӀонышъ, ахэм афэлэжьэн хъулъфыгъэ е бзылъфыгъэ, бын е лӀакъо шъо джы къышъухэрэмыт. Щэнаутымрэ уц дыджымрэ лъапсэу зиӀэ къышъухэрэмыт.

19Ащ фэдэу мы бгыбзэр зэхэзыхыгъэ цӀыфэу, „Сикъаигъагъэ сытемыкӀыщтми, сынасыпышӀощт“ зэриӀожьызэ, ыгукӀэ зыщытхъужьырэр шӀу къыдэхъуным щэрэмыгугъ. Ащ зэкӀэми тхьамыкӀагъо къафихьыщт: ежьыми адрэ цӀыфхэми.#29:19 Ижъырэ джуртыбзэкӀэ тхыгъэ Ӏэпэрытхым зэрэхэтыр: «псы зыкӀагъахъорэ чӀыгури чӀыгу гъугъэри зэдэкӀодыщтых». 20Зиусхьаным ащ фэдэм фигъэгъущтэп. Ар лъэшэу къэгубжынышъ, иешъугъун, машӀом фэдэу, а цӀыфым тыритэкъощт. Мы хэбзэ тхыгъэм хэт бгыбзэхэр зэкӀэ ащ къытефэнхэшъ, Зиусхьаным ащ ыцӀэ агу къэмыкӀыжьынэу ошъо чӀэгъым щыхаригъэтхыкӀыжьыщт. 21Тхьэм мы и Хэбзэ тхыгъэ зэкӀэ хэт бгыбзэмэ къапкъырыкӀэу тхьамыкӀагъохэр къехъулӀэнэу Зиусхьаным а цӀыфыр Израилым илӀэкъо пстэуми ахиушъхьафыкӀыщт.

22ШъуаужыкӀэ къэхъущт шъуикӀалэхэми, хымэ цӀыф лъэпкъхэм ащыщэу, чӀыпӀэ чыжьэхэм къарыкӀынхэшъ къышъухэхьащтхэми Зиусхьаным мы чӀыгум къыфыригъэхыгъэ тхьамыкӀагъохэри узэу ащ къыфигъэкӀуагъэхэри алъэгъущтых. 23ЧӀыгур зэфэдэкӀэ тхъомзашхъомрэ щыгъумрэ зэлъакӀугъэу, машӀом ыстыгъэм фэдэу, щытыщт – зыпари щыжъулэжьыщтэп, зыпари къытекӀэщтэп, къэкӀырэ лъэпкъ гори ащ тетыщтэп. Зиусхьаныр лъэш дэдэу губжи, къалэхэу Сэдомрэ Ӏаморэрэ, Адмэрэ ЦэуӀаррэ зэригъэкӀодыгъапэхэм ар фэдэщт. 24ЦӀыф лъэпкъ пстэури кӀэупчӀэщт: „Сыд пае Зиусхьаным мы чӀыгум мыр ришӀагъа? Сыд пае ащ фэдэу лъэш дэдэу къафэгубжыгъа?“ 25Ахэм джэуап аратыжьыщт: „Ятэжъхэм я Зиусхьанэу Тхьэм ахэр Мысырым къызырещыжьхэм мы цӀыф лъэпкъым къыдишӀыгъэ зэзэгъыныгъэр ащ къызэрибгынагъэм пае. 26Ахэм нэмыкӀ тхьэхэм зафагъази, амышӀэщтыгъэу, Зиусхьаным къаримытыгъэ тхьэхэм, афэлажьэхэу рагъэжьагъ. 27Джащ пае Зиусхьаныр мы чӀыгум лъэшэу къыфэгубжыгъ, мы хэбзэ тхыгъэм хэт бгыбзэхэр зэкӀэ къыфигъэкӀуагъэх. 28Зиусхьаныр лъэш дэдэу губжыгъэу ахэр ячӀыгу къырифхи, джы зэрэтлъэгъоу, нэмыкӀ хэгъэгу ыдзыгъэх“. 29Ти Зиусхьанэу Тхьэр ары шъэфыр зыӀэ илъыр, ау нафэр тэри къытхэкӀыщт тикӀалэхэми егъашӀэм къытфызэӀухыгъэшъ, Тхьэм мы и Хабзэ итхагъэр зэкӀэ дгъэцэкӀэн фае».

Currently Selected:

Хэбзэ тхыжьыгъэр 29: АдыТГ

Highlight

Copy