Хэбзэ тхыжьыгъэр 20

ЯтӀокӀэнэрэ шъхьэр

ЗэошӀыным пылъ унашъохэр

1Мосэ ипсалъэ лъигъэкӀотагъ: «Пыим шъуезэонэу шъузыкӀокӀэ, шыхэр, ку псынкӀэхэр, шъо шъуием нахьыбэ хъурэ дзэр зышъулъэгъухэкӀэ, шъукъэмыщт. Мысырым шъукъизыщыжьыгъэ шъуи Зиусхьанэу Тхьэр шъуигъусэба! 2Заор ежъугъэжьэным ыпэкӀэ къурмэнышӀым зэолӀхэм закъыферэгъази 3къерэӀу: „КъэдаӀу, израил лъэпкъыр! Непэ шъуипыйхэм шъуязэощт. Шъугухэр шъумыгъэкӀодых, шъумыщын, шъукъэмыщт, шъумыгуӀэжь! 4Шъуи Зиусхьанэу Тхьэр шъуигъус, шъощ пае пыим Ар езэонышъ, шъуатыригъэкӀощт“. 5Ӏэшъхьэтетхэм дзэм рарэӀу: „Шъуащыщ горэм унакӀэ ыгъэпси унэчӀэхьажь ымышӀыгъэмэ, ядэжь орэкӀожь. Армырмэ, заом хэкӀодэн ылъэкӀыщтышъ, иунэ нэмыкӀ горэм унэчӀэхьажьыр щишӀыщт. 6Сэнашъхьэ зыгъэтӀысыгъэу, ащ къыпыкӀагъэр къыпичыжьынэу игъо имыфагъэри ядэжь орэкӀожь. Армырмэ, заом хэкӀодэн ылъэкӀыщтышъ, исэнашъхьэ къыпыкӀагъэр нэмыкӀ горэм пичыжьыщт. 7Шъуащыщ горэм къэщэн гъэгугъагъэ иӀэу, ау ар къыщэнэу игъо имыфагъэмэ, ядэжь орэкӀожь. Армырмэ, заом хэкӀодэн ылъэкӀыщтышъ, пшъашъэр нэмыкӀым ыщэщт“. 8ЕтӀанэ Ӏэшъхьэтетхэм зэолӀхэм араӀон фае: „Шъуащыщ горэ щтапхэу е гукӀодыпхэу щытмэ, икъэрэбгъагъэкӀэ илъэпкъэгъухэр зэрэдимыгъэхынхэм пае ядэжь орэкӀожь“. 9Ӏэшъхьэтетхэм зэолӀхэм араӀощтыр къызаухкӀэ, дзэпащэхэр арэгъэнафэх.

10Шъузтебэнэщт къалэм шъузекӀуалӀэкӀэ, къышъомызэожьэу зыкъытынэу ыпэ рапшӀэу ар хэжъугъад. 11Къэлэдэсхэр къезэгъхэу къэлапчъэхэр къызышъуфыӀуахкӀэ, ахэм зэкӀэми шъощ пае егъэзыгъэкӀэ Ӏоф арэшӀ. 12Къалэм зыкъымытэу, къышъозэожьынэу зытыриубытэкӀэ, ар къэшъудзыхь. 13Шъуи Зиусхьанэу Тхьэм къалэр шъуӀэ къызырилъхьэкӀэ, дэс хъулъфыгъэхэр зэкӀэ чатэкӀэ шъуукӀых. 14Бзылъфыгъэу, сабыеу, былымэу, нэмыкӀэу а къалэм къыдэнагъэхэр къонтхъы шъушӀымэ хъущт. Шъуипыйхэм яещтыгъэу шъуи Зиусхьанэу Тхьэм къышъуитыгъэ пстэури жъугъэфедэ. 15КъышъогъэтӀысэкӀыгъэ цӀыф лъэпкъхэм япсэупӀэу щымыт къалэхэу къышъупэчыжьэу щыӀэ пстэуми джар яшъушӀ. 16Ау шъуи Зиусхьанэу Тхьэм шъуиунэенэу къышъуитырэ чӀыгум ит къалэхэм адэс цӀыф лъэпкъхэм ащыщ гори псэоу къэжъугъанэ хъущтэп. 17Шъуи Зиусхьанэу Тхьэм ибгыбзэ ателъышъ, Ащ унашъо къызэрэшъуфишӀыгъэу хьатхэр, амэрхэр, къэнаӀанхэр, пэрыцхэр, еуйхэр, еусхэр зэкӀэ зэхэшъуукӀ. 18Армырмэ яхэбзэ емыкӀушхохэу ахэр ятхьэхэм зэрафэлажьэхэрэм шъуарагъэсэнышъ, шъуи Зиусхьанэу Тхьэм ыпашъхьэ псэкӀод щышъушӀэщт. 19Къалэр шъуштэнэу шъугу хэлъэу, ар къэдзыхьагъэу бэрэ шъуӀыгъымэ, ащ иӀэгъо-блэгъухэм чъыгхэр ащишъумыупкӀ. Ахэм къапыкӀэхэрэр шъушхы, ау чъыгхэр ишъумыупкӀ. Шъофым ит чъыгхэр цӀыфхэп ныӀа, сыд пае ахэр къэдзыхьагъэхэу пӀыгъын фая? 20Пшхымэ хъун къызпымыкӀэрэ чъыгэу шъушӀэхэрэр ишъуупкӀ. ИшъуупкӀхи пыим икъалэ зыкъемытыфэ ащ икъэдзыхьанкӀэ псэолъапхъэу жъугъэфедэх».

Currently Selected:

Хэбзэ тхыжьыгъэр 20: АдыТГ

Highlight

Copy