Хэбзэ тхыжьыгъэр 13

ЯпшӀыкӀущэнэрэ шъхьэр

Пегъымбар нэпцӀыхэм зэрафэсакъыщтхэр

1Мосэ джыри ариӀуагъ: «ЗыгорэкӀэ пегъымбар е пкӀыхьэпӀэзэхэф горэ къышъухэкӀэу, мэхьанэшхо зиӀэ хъугъэ-шӀагъэ е шӀагъо горэ шӀэхэу къэхъущтэу къыӀуагъэу, 2ащ къыӀуагъэр хъуи, ежь ар дэдэм шъумышӀэщтыгъэ нэмыкӀ тхьэхэм зафэжъугъэзэнэу, ахэм шъхьащэ афэшъушӀынэу шъутыригъэгушӀухьэ зыхъукӀэ, 3шъо а пегъымбарым е пкӀыхьэпӀэзэхэфым къыӀорэм шъуедэӀу хъущтэп: шъугурэ шъупсэрэкӀэ шӀу шъолъэгъумэ зэригъэшӀэнэу шъуи Зиусхьанэу Тхьэм джаущтэу шъуеушэты. 4Шъуи Зиусхьанэу Тхьэм ыуж шъуит, щынагъо фышъуиӀэу жъугъэлъапӀэ, Ащ иунашъохэр жъугъэцакӀэ, шъуедэӀу, Ащ шъуфэлажь, шъуфэшъыпкъ. 5А пегъымбарыр е пкӀыхьэпӀэзэхэфыр арми Мысырэу пщылӀыпӀэм тыкъизыщыжьыгъэ шъуи Зиусхьанэу Тхьэм шъупэуцужьынэу шъутыригъэгушӀухьагъэшъ, укӀыгъэн фае. Шъуигъэплъэхъунышъ, шъуи Зиусхьанэу Тхьэм шъузтетын фэе гъогоу унашъо къышъуфишӀыгъэм шъукъытырищынэу ар фэягъ. А бзаджэр зыхэжъукъэкӀодыкӀ.

6Пшэу, уикӀалэу, уипшъашъэу, уишъуз кӀасэу е упсэ пэблэгъэ уиныбджэгъоу щэрэт фаеми, ори уятэжъхэми шъумышӀэщтыгъэ нэмыкӀ тхьэхэм адэжь укӀонышъ, шъхьащэ афэпшӀынэу шъэфэу утыригъэгушӀухьэ зыхъукӀэ, 7шъо къышъупэгъунэгъу е къышъупэчыжьэ цӀыф лъэпкъхэу дунаим ичӀыпӀэ зэфэшъхьафмэ ащыпсэухэрэм ятхьэхэм, 8а цӀыфым дешъуемыгъашт, ыӀорэми шъуемыдэӀу. Ащ шъугу ешъумыгъэгъу. Шъушъхьамыс ащ, чӀэшъумыухъум. 9УкӀы ар! АукӀ зыхъукӀэ, апэу о еу, етӀанэ адрэхэр ерэох. 10Мысырэу пщылӀыпӀэм шъукъизыщыжьыгъэ шъуи Зиусхьанэу Тхьэм тызтетын фэе гъогоу унашъо къытфишӀыгъэм шъукъытырищынэу пылъыгъэшъ, ыпсэ хэкӀыфэ мыжъокӀэ шъуеозэ ар шъуукӀы. 11Джащыгъум а къэбарыр зэрэизраил лъэпкъэу зэхихынышъ, къыгъэтӀыгурыгущт, ащ фэдэ бзэджагъэ шъуащыщ горэми тапэкӀи ышӀэщтэп.

12Шъуи Зиусхьанэу Тхьэм шъузщыпсэунэу къышъуитырэ къалэмэ ащыщ горэм 13шъо шӀумышӀэщтыгъэ нэмыкӀ тхьэхэм адэжь кӀонхэшъ шъхьащэ афашӀынэу адрэ къэлэдэсхэр дэзыгъэхыгъэ цӀыф бзаджэхэр дэсхэу зышъушӀэкӀэ, 14а Ӏофыр зэхэшъуфы, зэкӀэри зэжъугъашӀэ, нахь тэрэзэу шъукӀэупчӀ. ЗэкӀэри шъыпкъэу къызычӀэкӀыкӀэ, ащ фэдэ емыкӀушхо ашӀагъэу къызычӀэкӀыкӀэ, 15а къалэм дэсхэр зэкӀэ чатэкӀэ зэхэшъуукӀэх. Къалэри, цӀыфэу дэсхэри, былымэу дэтхэри кӀодыкӀае ижъугъафэх. 16Къонтхъэу къыдэкӀыгъэр зэкӀэ къэлэ пчэгум къежъугъэуалӀи, ежьыри имылъкуи зэрэзэгъусэхэу, шъуи Зиусхьанэу Тхьэм пае къурмэнгъэст папкӀэу, зыпари къэмынэу жъугъэсты. Хэкужъ Ӏуашъхьэу орэхъуи, джаущтэу егъэшӀэрэу къэрэн, ныбжьи икӀэрыкӀэу зэтырарэмыгъэпсыхьажь. 17Бгыбзэ зытелъым щыщ гори къэшъумышт. Джащыгъум Зиусхьаным игубж щигъэзыенышъ, гукӀэгъу къышъуфишӀыщт, шъуятэжъхэм гущыӀэ пытэ къызэрадишӀыгъэуи шъуилъэпкъ нахь ыгъэбэгъощт. 18Шъуи Зиусхьанэу Тхьэм ыӀорэм шъуедэӀоу, Ащ иунашъохэу джы шъузыфэзгъасэхэрэр зэкӀэ жъугъэцакӀэмэ, Зиусхьаным къекӀущтыр шъушӀэмэ, джары хъущтыр».

Currently Selected:

Хэбзэ тхыжьыгъэр 13: АдыТГ

Highlight

Copy