Хэбзэ тхыжьыгъэр 12

Хабзэу КъэнаӀан хэгъэгум зэрэщыпсэущтхэр

(я 12-рэ – я 26-рэ шъхьэхэр)

ЯпшӀыкӀутӀонэрэ шъхьэр

Тхьэм шъхьащэ зыщыфэпшӀыщт чӀыпӀэ закъор

1Мосэ ипсалъэ лъигъэкӀуати ариӀуагъ: «Шъуятэжъхэм я Зиусхьанэу Тхьэм шъуиунэенэу къышъуитыгъэ чӀыгум шъущэпсэуфэ мафэ къэси шъуегугъузэ жъугъэцэкӀэн фэе шапхъэхэмрэ хэбзэ гъэунэфыгъэхэмрэ зыфэдэхэр мары. 2КъижъугъэкощыкӀыщт цӀыф лъэпкъхэр ятхьэмэ зыщялъэӀухэрэ чӀыпӀэхэу къушъхьэ лъагэхэм, Ӏуашъхьэхэм ащыӀэхэр, чъыг жьаупӀэмэ ачӀэтхэр зэкӀэ зэхэжъугъэкӀуадэх. 3Ахэм якъурмэншӀыпӀэхэр зэхэшъукъутэх, шъхьащэ зыфашӀырэ агъэлъэпӀэрэ мыжъо пкъэухэр зэхэжъугъэшъхъашъхъэх, агъэлъэпӀэрэ пкъэухэр#12:3 Мыщ ехьылӀагъэу еплъ мы тхылъым ия 7-рэ шъхьэ ия 5-рэ усэ. ишъуупкӀых, ятхьэ сурэтхэр жъугъэсты. Ахэм ятхьэнэпцӀыхэр зэхэжъугъэтакъохи, ацӀэхэр а чӀыпӀэхэм агу къащымыкӀыжьыхэнэу шъушӀы. 4Ахэр ятхьэнэпцӀыхэм зэрафэлажьэхэрэм фэдэу шъуи Зиусхьанэу Тхьэм шъуфэлэжьэнэу щытэп. 5ШъуилӀакъохэр зэкӀэ зыщыпсэурэ чӀыпӀэхэм ащыщэу шъуи Зиусхьанэу Тхьэм Ежь ЫцӀэ зэпхыгъэнэу къыхихыщтыр ары ныӀэп шъхьащэ зыщыфэшъушӀын фаер. Джары шъуздэкӀон фаер, 6джащ ешъухьылӀэщтых шъуикъурмэнгъэстхэри, шъуикъурмэнхэри, шъуимылъку ияпшӀэнэрэ Ӏахьи, жъугъэнэфэгъэ тынхэри, тхьэлъанэ зыфэшъушӀыгъэ хэушъхьафыкӀыгъэ тынхэри, шъуигупыкӀ тынхэри, шъуибылым пӀашъэхэмрэ мэл-пчэнхэмрэ къакӀэхъогъэ ящыпэлъфыхэу къахэшъущыгъэхэри. 7Шъуи Зиусхьанэу Тхьэм ынэшӀу къышъущыфагъэшъ, джа чӀыпӀэм шъори шъуибынхэми шъузэгъусэхэу шъуи Зиусхьанэу Тхьэм ыпашъхьэ шъущышхэщт, шъуӀэшъхьитӀукӀэ жъулэжьыгъэ пстэуми шъуакӀэгушӀущт. 8Джы хэти ежь нахь шӀотэрэзым тетэу мыщ зызэрэщыжъугъэпсырэм фэдэу ащ шъущызекӀо хъущтэп, 9шъуи Зиусхьанэу Тхьэм шъуиунэе Ӏахьэу щыт чӀыпӀэхэу гупсэфыпӀэ шъуфэхъунэу къышъуитыхэрэм джыри шъуанэсыгъэпи. 10Ау шъо Иордан псыхъом шъузэпырыкӀынышъ, шъуи Зиусхьанэу Тхьэм шъуиунэенэу къышъуитырэ чӀыгум шъуитӀысхьащт, мамырэу шъупсэуным пае, пыеу къышъогъэтӀысэкӀыгъэщтхэм шъукъамыгъэгумэкӀынэу Ащ ышӀыщт. 11Джащыгъум шъуи Зиусхьанэу Тхьэм Ежь ЫцӀэ зэпхыгъэнэу къыхихыщт чӀыпӀэм сэ унашъо къызэрэшъуфэсшӀырэр зэкӀэ: къурмэнгъэстхэри, къурмэнхэри, шъуимылъку ияпшӀэнэрэ Ӏахьи, жъугъэнэфэгъэ тынхэри, Зиусхьаным дэшъушӀыгъэ тхьэлъанэм тетэу шъуимылъку щыщ анахь ӀахьышӀухэри къешъухьылӀэнхэ фае. 12Джащ шъори, шъукъохэми, шъупхъухэми, шъуиунэӀут хъулъфыгъэхэми бзылъфыгъэхэми, ежьхэм яунаеу чӀыгу Ӏахьи кӀэни зимыӀэ лэуйхэу шъуикъалэмэ адэсхэми шъуи Зиусхьанэу Тхьэм ыпашъхьэ шъущычэф.

Лы зэфэшъхьафхэмрэ къурмэнылымрэ зэрэпшхыщтхэр

13Ау шъо шъугу рихьыщт чӀыпӀэ пэпчъ джаущтэу къурмэнгъэстхэр зэращышъумышӀынхэм шъуфэсакъ. 14Сэ къышъуфэсшӀырэ унашъохэр зэкӀэ жъугъэцакӀэзэ, шъуикъалэмэ ащыщэу Зиусхьаным Ежь ЫцӀэ зэпхыгъэнэу къыхихыщт чӀыпӀэ закъор ары ныӀэп къурмэнхэр зыщышъушӀыщтыр. 15Ау щытми, зэкӀэ шъуздэс къалэхэм былымхэр ащышъуукӀынхи шъуи Зиусхьанэу Тхьэм къышъуфыриӀэ нэшӀущыфэныгъэм ишӀуагъэкӀэ шъузыфаем фэдиз ли ащышъушхын шъуфит. Хабзэм тетэу цӀыф пстэоу зызыукъэбзыгъэми зызымыукъэбзыгъэми къушъхьэ пчэным е бланэм ял фэдэу, а лыр ашхын фитых. 16Ау лъыр зыӀужъугъафэ хъущтэп. Псым фэдэу ар чӀыгум тешъукӀ. 17Шъуугъоижьыгъэ лэжьыгъэм, санэу кӀэшъуфыгъакӀэмрэ дагъэмрэ азыпшӀанэ, шъуибылым, мэл-пчэн Ӏэхъогъухэм ахэт щыпэлъфыхэр, шъуигупыкӀ тынхэр, хэушъхьафыкӀыгъэ тынхэр, нэмыкӀэу пӀон хъумэ тхьэлъанэкӀэ хэшъуушъхьафыкӀыгъэхэр, шъуикъалэхэм шъузэрадэсэу шъушхынэу щытэп. 18Шъуи Зиусхьанэу Тхьэм Ежь ЫцӀэ зэпхыгъэнэу къыхихыщт джа чӀыпӀэм шъо зэкӀэми, шъукъохэми шъупхъухэми, шъуиунэӀут хъулъфыгъэхэми бзылъфыгъэхэми, шъуикъалэмэ адэс лэуйхэми, шъуи Зиусхьанэу Тхьэм ыпашъхьэ шъуисэу а зэкӀэри щышъушхын фае. ЗэкӀэ шъуиӀэшӀагъэмэ шъуакӀэгушӀузэ, шъуи Зиусхьанэу Тхьэм ыпашъхьэ шъуисэу шъушхэн, шъугушӀон фае. 19ШъуичӀыгу шъущыпсэу зэхъукӀэ, лэуйхэр пхъэтэпэмыхь зэрэшъумышӀынхэм шъуфэсакъ. 20Шъуи Зиусхьанэу Тхьэм шъукъызэригъэгугъагъэм тетэу, шъуичӀыгу игъунапкъэхэр зэӀуигъэкӀотхэу, лы шъугу къэкӀэу, „Лы тшхын“ зыщышъуӀоным дэжь, шъузыфаем фэдиз шъушхын шъуфит. 21Шъуи Зиусхьанэу Тхьэм Ежь ЫцӀэ зэпхыгъэнэу къыхихыщт чӀыпӀэр къышъупэчыжьэ хъумэ, унашъо къызэрэшъуфэсшӀыгъэм тетэу, шъуибылым, мэл-пчэн Ӏэхъогъухэу Зиусхьаным къышъуитыгъэхэм ащыщхэр шъуикъалэхэм ащышъуукӀынхэшъ шъушхын шъуфит. 22Къушъхьэ пчэнылым е бланэм ыл афэдэу, ахэр шъушхых. Хабзэм тетэу цӀыфэу зызымыукъэбзыгъэми зызыукъэбзыгъэми ахэр ашхын фит. 23Ау лъыр зыӀушъумыгъаф, сыда пӀомэ лъыр – щыӀэныгъ, щыӀэныгъэмрэ лъымрэ зэгъусэхэу шъушхы хъущтэп. 24Лъыр зыӀужъугъафэ хъущтэп. Псым фэдэу ар чӀыгум тешъукӀ. 25Ар зыӀушъумыгъаф, джащыгъум шъори шъуилъфыгъэхэми шъуиӀофхэр дэгъущт, Зиусхьаным шӀукӀэ, тэрэзкӀэ ылъытэрэр шъогъэцакӀэшъ, Ащ ыпашъхьэ ар щытэрэз. 26Жъугъэнэфэгъэ тынхэу, тхьэлъанэ зыфэшъушӀыгъэ хэушъхьафыкӀыгъэ тынхэу Зиусхьаным фэжъугъэшъошагъэхэр шъуӀыгъхэу Ежь ЫцӀэ зэпхыгъэнэу Ащ къахихыщт чӀыпӀэм шъуекӀуалӀ. 27Шъуи Зиусхьанэу Тхьэм икъурмэншӀыпӀэ къешъухьылӀэх шъуикъурмэнгъэстхэр, лыри лъыри. Лъыр къурмэншӀыпӀэм дэжь щижъугъэчъи, лыр шъушхы. 28Шъусакъ, къышъосӀуагъэхэр зэкӀэ жъугъэцакӀэ, джащыгъум шъуи Зиусхьанэу Тхьэм ыпашъхьэ ар щытэрэзышъ, шъори къышъухэкӀыгъэхэми шъуиӀофхэр зэкӀэ егъашӀэми дэгъущт.

НэмыкӀ тхьэхэм шъхьащэ афэпшӀ зэрэмыхъущтыр

29ЧӀыгоу шъуздакӀорэр шъуиунае зэрэхъунэу, шъуи Зиусхьанэу Тхьэм цӀыф лъэпкъэу ащ исхэр ыгъэкӀодыпэщтых, а чӀыгур шъуубытынышъ, шъуитӀысхьащт. 30Ахэр зэкӀэ гъэкӀодыгъэ зыхъурэм ыуж, хъытыум шъузэримыфэным шъуфэсакъ, ахэм ятхьэмэ шъуакӀэмыупчӀ, „А цӀыф лъэпкъхэм ятхьэмэ сыд фэдэу шъхьащэ афашӀыра? Ахэм афэдэу тэри тшӀыщт“ шъумыӀо. 31Зиусхьаным фэмылъэгъурэ емыкӀушхо зэфэшъхьафыбэхэр ахэм ашӀэхэшъ, ятхьэхэм зэрафэлажьэхэрэм фэдэу шъуи Зиусхьанэу Тхьэм шъуфэлэжьэнэу щытэп, сыда пӀомэ ахэм акъохэмрэ апхъухэмрэ тхьэмэ къурмэн афашӀыхэри, машӀом хагъэстыхьэхэри! 32Арышъ, сэ унашъоу къышъуфэсшӀыгъэхэр зэкӀэ жъугъэцакӀэ. Ахэм зыпари ахэшъумыгъахъу, зыпари ахэшъумыгъэкӀ»#12:32 Мы усэр ижъырэ джуртыбзэкӀэ тхыгъэ Ӏэпэрытхым ия 13-рэ шъхьэ и 1-рэ ус..

Currently Selected:

Хэбзэ тхыжьыгъэр 12: АдыТГ

Highlight

Copy